¹ Uganiya ugino me uwui wa Asabar uni, yeso ma wata a tiruu ti bisana, anu manza ume me wa kunna ikomo, wa tubi uhuba u bisana me are me. ² Sa Afarisawa wa ira anime, wa gun in Yeso, "Ira, anu manza uwe me wa zinu wuza imum ige sa ida rizi a wuzi unu wui Asabar ba." ³ Ma gun we, daki ya mu bata imum me sa Dauda maa wuzi uganiya sa ma kunna ikomo ba, nan anu sa waa zi nan me? ⁴ Sa maa ribe udange Asere ma ri imum yare sa yazi ya Asere igebe sa yazi daki yare ime ba, nan aroni ame me wa ri, anu adang akatuma ka Asere wani cas waa rizi. ⁵ Nani daki ya mu bata anyimo atize ta Asere, unu wui Asabar, anu akatuma ka Asere wa di wuzi katuma unu uwui Asabar sarki u ira aburi? ⁶ In boo shi uye be sa ma teki udenge Asere ma ye. ⁷ Da agi i rusa ani me, 'Mi ticukum ti urunta tini in nyara daki u nya unice ba,' daki idada ira shi ayari unu zatu aburi ba. ⁸ Barki vana unu me mani ugomo Asere Asabar. ⁹ Sa Yeso ma ceki abini me ma ribe udenge Asere awe me. ¹⁰ Ure unu maa rani desa tari me ta wi, anu bezi urusa wa iki Yeso, wa gu, "Ya wunna uri ahuman in unu rono Asabar?" Vatt anime barki wa kem me in madini. ¹¹ Yeso ma gun we, " Aveni anyimo ashi me ingi ma zin in kutam ku inde, ingi ka rizo anyimo uwa u concong rono Asabar, ma da suso ba? ¹² Adi wu aneni abati u gongong unu nan bitam! Barki ani me i rizi a wuzi imum iriri inu uwui Asabar." ¹³ Yeso ma gun inu unu me, "Wito tari tuwe me." ma witi, ti kuri ti huma gusi ti kure me. ¹⁴ Anu ubezi urusa wa suri, wa gamirka tize anice nume me, unu nyara una uhuna ume. ¹⁵ Sa yeso ma tinka we, ma hiri ahira me, anu gbardang wa tarsi me, ma human in we vat. ¹⁶ Ma kpadi we kati wa buki aye abanga me ba, ¹⁷ A'anime barki a myincika ubuka Ishaya unu ukurzuzo utize ta Asere agi, ¹⁸ "Ira ni, urere um desa sa ma zauka; ma hem in me, de sa ma rumzam iriba kang. Indi wu bibe bum a me, ma di buki uweki utize ahira anu zatu tarsa Asere. ¹⁹ Ma da wuza matara nan uhunu nani uye ma kunna nimyirang nume me a tina. ²⁰ Ma da pura nisubu sa na biki pura ba; ma da bito me mucungo mu nigoni ni upita ba, senke ma gamirka uweki utize uhana ure aje." ²¹ Anu uzatu tarsa Asere wa di inki iriba a niza nume me.'' ²² Abini me a ehn Yeso ure urubo, desa ma zin agbergene, ma human in me, uturu ma buki tize aje me pokino. ²³ Vat nigura me wa kunna biyau wa gu, "Nani unu uge me usam u Dauda mani?" ²⁴ Sa anu ubezi urusa wa kunna imum ibiyau bi ge me, wagu, "Unu me ma suzo agbargene in nikara ni Bezebul ugomo agbergene." ²⁵ A anime Yeso ma rusi imum me sa wa zinu ubasa me ma gun we,"Vat Tigomo sa ta harzina ti da tonno me ba, vat nipin nani akura sa aharzina adi rizi. ²⁶ Ingi unu uburi ma suzo unu uburi, ma hara nice nu me. Adi wu aneni tigomo tume ti tonno? ²⁷ Ingi in suzo agbergene in u bari u Bezebul ahana ashi me wa suzo in nikara na veni? Barki anime we wani wa di weki shi tize tishi me. ²⁸ Ingi in suzo agbergene in bibe ba Asere bini, tigomo ta Asere ta aye shi ²⁹ Adi wu aneni unu ma ribe akura una nikara ma cuzi me turunga sarki utuba utirza ume? Ma di ku cuzi turunga ta akura ame me. ³⁰ Desa ma zo nan mi ba, uroni u'eru um mani, desa daki ma oro nan mi ba unu samara mani. ³¹ Barki anime in gusan shi, vat ucara abanga nan tizogo adi vete ni, tizogo ti bibe bilau ba Asere ada vete ni ba. ³² Vat desa ma buka tize ti buri anice nu vana unu,adi vete ni. Desa ma buka tize ti buri anice ni bibe bilau ada vete ni ba anyimo unee, nani uhana imum be sa i ehze. ³³ Nuka ni utiti uriri ahana wa di cukuno a riri nani i nuki utiti uzenzeng ahana me wa di cukuno zenzeng, barki ake rusi utiti ahira ahana uni. ³⁴ Shi ahana iwa, anu aburi, idi wu aneni i buki imum iriri? Barki anyimo ugbem iriba anyo aka buki. ³⁵ Unu huma anyimo u'inko imum ihuma anyimo iriba ime me ma ke ma buki imum ihuma,unu buri anyimo imum iburi sa ma'inko iriba ime me ma ke ma buki imum be sa izi iburi. ³⁶ In boo shi, rono iweki utize anu a buri wa di kurzo tize ti buri sa wa boo. ³⁷ Usuro utize idi kem ubura,usuro utize tishi me adi hu shi." ³⁸ Aye anu dungara wan Afarisawa, wa kabirka me wa gu, "Unu dungara, ti nyara ti iri ahira aweme." ³⁹ Yeso ma kabirka we ma gu, "Anu uneh ana aburu. Anu bezi uzatu hem, wa nyara wa iri bihuri, bi huri bi zoni sa adi bezzi we in daki bi Yunasa unu ukurzo. ⁴⁰ Kasi sa Yunusa mawu tiye ti taru uwui nan niye anyimo apuru abicere, ane ani vana unu madi wu tiye ti taru niye nan nuwui anyimo adizi. ⁴¹ Anu u Neniba wa di teki anu ucara uge me rono uweki u tize wa kuri wa u rizo uwe. Barki waa hem inu siziki uwe a tize ti Yunana, ira ni, uye sa ma teki Yunana ma yene. ⁴² Rono uweki utize ti ukruma u kudu, ma di tonno ace anu unee uge me ma di reki we. Maa eh usuro upingaru unee ma kunna urusa u Sulemanu. Desa ma teki sulemanu ma yene. ⁴³ Sa ugbergene u bit ma suro anyimo unu me, ma tarsi ti hira ti uzati u myei inu nyara u venke, daki ma kem ba. ⁴⁴ Ba ma gu, 'In di kuri akura am sa ma suro ni.' Ingi ma biki, ma kem a visa lau. ⁴⁵ Abinime ani madi ha ma ka inta agbergene usunare sa wa teki me in imum iburi, Wa ribe wa cukuno abini me. Unu ugino me ticukum ta dumo me ti teki ti aje me uni curno me. Ane ani idi cukuno unee uburi uge me." ⁴⁶ Sa Yeso maa ra anyimo atize nan nigura me, a'ino me nan anu henu me wa turi a matara. Wa nyari wa buki tize wan me. ⁴⁷ Uye ma gun me, "Ira a'ino uwe me nan anu henu uwe me wa turi a matara wa nyara ubuka utize nan hu." ⁴⁸ Ma kabirka ma gun me aveni ma buka me,, "Aveni a'ino am nan anu henu am?" ⁴⁹ Ba ma witi tari uwatu anu tarsa ume me, ma gu, "Ira, a'ino am be nan anu henu am! ⁵⁰ Vat desa ma wuza imum me sa aco am anyimo asesere ma nyara, me mani uhenu um, nan ka ino um."