¹ Sa Yeso ma mara u dungara anu tarsa ume me ukirau in ware, ba ma ceki ahira agino me ma dusa uka dungara nan ubezizi tize ta Asere atipinpin tuwe me. ² Uganiya me yuhana ma rani akura a nirere. Sa ma kunna timumum me sa yeso ma zi inu wuza me ma tumi are anu tarsa ume me ahira ame me. ³ Wa gun me "Hu mani unu aye me nani ti inki aje a uye?" ⁴ Yeso ma kabirka ma gun we "Kuroni i ka buka yuhana imum be sa ya ira nan ige sa ya kunna. ⁵ Arubo wa kem u ira, anu zati u tibuna wazin tanu, ahumza akuturu, aturi wa zinu kunna utize, azin unu uvengizi umu kizi ini ivai, anu u nyara azinu ubezizi abanga urunta. ⁶ Unu ringirka mani de sa daki ma pilko ba barki mi." ⁷ Sa wa dusa yeso ma ri aje inu boo anu tizi anice ni yuhana ma gu, "Ya aye anija i iri nyanini- i iri tikpe ti jojoko sa upebu u zuni u hurse me? ⁸ Shi nyanini ya suiro a matara i hiri- unu in tirunga ti lubu-lubu? Kadure andesa, wa sonsi tirunga ti lubu-lubu wa ciki akura a tigomo. ⁹ Shi nyanini ya suro a matara i hiri?- Unu kurzo u tize ta Asere? Ee, in boo shi ma teki unu kurzuzo utize ta Asere. ¹⁰ Me mani sa a nyerttike anice nume me inu guna." Imbe ma tuma unu akadura kam aje ashi me, de sa ma di barka shi una sa i di tarsi.' ¹¹ Kadundare, in boo shi anyimo andesa aha a eh wa yozo daki amu yoo uye sa ma teki yuhana unu uzorso unu gbardang unee ugeme ba. Vat ani me unu cing a tigomo ta Asere ma teki me. ¹² Datti uganiya u Yuhana unu zurso anu u aye ukani, tigomo ta Asere tizin unu kenzi ijunguta, anu ijunguta wa nyara wa buri ti gomo ta Asere in nikara. ¹³ Vatt anu kurzuzo u tize nan u weki u tize wa kurzuzo tize ta Asere vat wa buu abanga ati gomo me uhana uganiya u Yuhana, ¹⁴ ingi i zi in iriba u kaba me, Iliya ma zige me, de sa maa zi ma di eh. ¹⁵ Una titui tu kunna ma kunna. ¹⁶ Nyanini indi batti ucara uge me ni? Ka si ahana ani buji ni biranza, wake wa cukuno inu tisa acece. ¹⁷ Inu gusa, 'Ta hurse shi ishiriwa ya game morso ta wuza shi alali iwono ya game aso.' ¹⁸ Sa yuhana ma eh sarki are sarki usa, wa gu, 'Ma zin agbergene. ¹⁹ Sa vana unu ma aye ma ri a ma sizi wa gu ma zin tire kang nan bisizasiza, uroni wa anu kabsa ikirfi i manyanga nan anu a madini, vat ani me urusa ubezi katuma ka uni." ²⁰ Yeso ma wuzi kubung a tipin me sa ma wuzi timum ti dandang barki sa wa game ubarka. ²¹ "Wa de, hu u Korasin! Wa de hu u Betsaida! Dagi timumum ti dandang sa a wuzi anyimo ashi me ani a wuzi u Taya nan Usidon wa da barka datti wa tiri mapori wa hummi muto apum awe me. ²² In boo shi ahira Ugomo Asere adi kunna ugogoni wa anu u Taya nan u Sidon rono uweki utize in shi. ²³ Hu, u Katarnahum u bassa adi nonzo we uhana Asesere? Umh-mh adi tuzo we adizi uhana akura ura. Dagi timum tidandang sa awuzi we tini a wuzi u Sodom,ti da biki uye kani me. ²⁴ In boo si adi taki inu kunna ugogoni u manyanga mu Sodom in hu rono uweki utize." ²⁵ Uganiya u gino me uni yeso ma gu, "Ma Nonziko we Aco Ugomo Asere wa Asesere nan unee, barki sa wa hunze anu rusa nan anu poko aje timumum tige me wa kuri wa bezi anu zatu urusa, kasi ahana acicing. ²⁶ Eh, Aco, barki sa imum me sa ya wunna we reb ya zigenne me. ²⁷ Aco am ma nyam timum vat, aco me mani ma rusa vana me cas vana me ma rusi aco me cas nan de sa vana me ma hem im me ma bezi me. ²⁸ Aye ni ahira am, shi an de sa izin ijassi nan ucira ugittak in di nya shi u venke. ²⁹ Nyani ace ashi me atize tum barki mi unu kunnna u gongoni mani nan iriba isheu, idi kuri ikem uvenke amuriba mushi me. ³⁰ Barki tize tum ti zi sheu, ucira um u zome gittak ba."