¹ Yeso ma titi anu manza ume me ukirau in ware wa gino me, ma nya we nikara ni u suzo ibe iburi, wa humzan in tikoni sasas. ² Anu tarsa u Yeso ukirau nan ware tiza tiye, unu tuba saminu desa atisa me Bitrus nan nu henu me Andarawus; a yakubu usam u Zabadi, nan u henu me yuhana. ³ A filibus, nan Bartamawus, nan Toma, a matiyu unu kabsa ikirfi i manyanga, nan yakubu vana u Halfa, nan yahuza. ⁴ A Siman Bakaniye, nan yahuda isikarayoti desa ma nya me. ⁵ We ukirau in ware yeso ma tumi we, ma buki we, ma gu, "Kati irebe a manyanga ma anu tame tize ta Asere, nani nipin ni a masamariyawa. ⁶ Senke i ha ahira itam me sa ya hunzine ya akura isaraila. ⁷ Ingi i zin tanu i haki i buu tize turunta, inu gusa, 'Tigomo ta Asere ta aye mamu.' ⁸ Humuzani ina anu zatu nihuma, i hirziza anu wijo, i visi akuturu, i suzo agbergene. Kasi gusi sa ya kaba a nyanki shi, anime ani idi nyinzi. ⁹ Kati i inta ikirfi ya zumo a wal-wal ba, nani azumo alau, nani azumo abit a mabadau mashi me. ¹⁰ Kati iziki ubadau atanu tishi me, nani turunga kare, nani akpatak nan ubina, ya wunna uri unu u katuma ma ri anyimo akatuma kame. ¹¹ Vat nigo me sa ya ribe ni, i nyari unu u tep anyimo me, i wuzi nigenu nishi me ni u hana uganiya sa i di hiri. ¹² Inki idi ribe akura me i gu gajiya ushi. ¹³ Inki akura a huma ani, wa di kabi kabi ca ni'isi nishi me ni kuri ashi, inki a zo me ahuma ba idi kuri wa da kaba ba. ¹⁴ Andebe sa wa game ukaba u shi, nani ukunna ushi, inu usuro ushi i kuburka ususur u tibuna tishi me idusa. ¹⁵ Kadundure in boo shi, rono uweki u tize me adi teki inu ceki u nipin u Saduma nan u Gomarata in nipin nigino me. ¹⁶ Ira, iye ma tuma shi kasi itam atii i nyaunyau. Anime cukuno ni jinjing kasi iwa, anu zatu ticari kasi ihurbe. ¹⁷ Wuza ni seke ina ananu, wadi hanshi a tigomo, wa cobi shi a tidenge tini nonzo nuwe me. ¹⁸ Wa di han shi aje a magumna nan agomo barki mi, barki i buki imum aje anu zatu urusa utize ta sere. ¹⁹ Uganiya sa wa hannan shi, kati i wuzi ma aye ma tize sa idi buki ba, barki imumum me sa i di buki adi nya shi uganiya ugino me. ²⁰ Daki she wani idi buki tize me ba, bibe bi acoo ushime bini bi di buki ati nyo tishi me. ²¹ U henu ma di nya uhenu a hu me, a coo ma di nya vana. Ahana wa di wuzi u zatu kunna wa wu a hu an kacoo. ²² Konde avi ma di game shi barki niza num, vat desa ma tonno in nikara, me mani ma di kem u bura. ²³ Inki wa yomko shi a nipin nige, i aki uhana aje. Kadure kani in boo shi, Vana unu ma di eh a shi i da sarki ukate uti pin-pin ti isaraila. ²⁴ Unu tarsa u dungara ma da aka me unu dungara ume ba,nani urere ma aki una kura ame ba. ²⁵ Ya bari unu tarsa unu dungara ma cukuno kasi unu dungara ume, urere kasi unu akura ame, inki wa tita unu akura ba'alzabul, anu akura me wa di titti me ani! ²⁶ "Kati i kunna biyau buwe ba, barki imum be sa i impi idi pokino nani imum be sa izi nihunzi a di da rusa ini ba. ²⁷ Imum be sa ma buka shi in mareu, buka in masaa mu uwui, nan imum me sa ya kunna sheu in titui tishi me, nyene assrere udenke i boo ni. ²⁸ Katti i kunna biyau bi ande sa wa huza apum sa wa dake hu bibe ba, senke i kunna biyau bi de sa ma dake ma hu bibe me nan nipum vat akura ura. ²⁹ Daki ahana i nyin ware wani a ziza ikobu ini re ini ba? Daki bire ba rizo adizi sarki u rusa acoo ashi me. ³⁰ Ma rusa vat ugbardang u tice ti shi me. ³¹ Kati kunna biyau ba. I teki inyi gbardang inu gancang. ³² Ana me vatt desa ma bezum aje anabu, mi cangi in di bezi me aje acoo um desa ma ra asesere. ³³ Desa ma ga mi aje anabu, mi cangi indi ga me aje acoo um desa ma ra asesere. ³⁴ Kati i basa ma aye inu urunta uni a nyimo unee. Daki ma aye inu urunta uni ba, uvira udang uni. ³⁵ Ma aye ini in patti unu ishina ini nan ka coo me, u ca nan ka ino me, unee nan ugiri me. ³⁶ I di cukukono anu akura wani ani aroni ishina unu. ³⁷ Desa ma teki inu uhem in kacoo nani a'ino daki um mani mazi ba; nan desa ma teki inu uhem vana nani uca daki um mani ba. ³⁸ Desa daki ma zika uzito ume me ma tarsam ba, daki ya wunna uri ma cukuno um ba. ³⁹ Vat desa ma hem in nice nume, ma di diri nini. Vat desa ma dira nice nume barki mi ma di kem nini. ⁴⁰ Desa maa kaba shi, ma kaba mi mani, desa kabam ma kaba desa ma tumam. ⁴¹ Desa ma kaba unu kurzuzo u tize ta Asere barki me unu kurzuzo utize mani madi kabi ukalu ume, desa ma hem in unu ulau ma di kabi ukalu ume. ⁴² Vat desa ma nya unu inde anyimo ahana acing age me, ukop umyei ma cancang ma si, barki me unu tarsa um mani, kadundure ma buka shi, ma di da dira me ukalu ume ba.''