¹ Aname abanga imum u orso imum ubenki anu tarsa Asere, gusi imum be sa ma wuna shi ana tidenge ti Asere ti u Galan tiya, ane ani idi wuzi. ² Roni utuba utiye sunare, koya unu ma inki ire imum mazi nu orso asesere urosa u shi wuzani anime inki ma aye ine ini adi orso. ³ Inki ma aye, indi tumi vat ande sa ma hem in we in kadure kunyetike wa haan in kadure me urushalima. ⁴ Abine ani inki ya wuna urii mi ma indusa, wadi dusa nan mi. ⁵ Indi e ahira asime uganiya be sa ma wata u maki do niya, barki indi wata u maki do niya. ⁶ Inki idi wu in hira indi dendokino ahira ashime, in hira indi biki nikuzi nan shi, barki i benki ni mi atanu tume, vat ahira me sa in haza. ⁷ Ane ani inda nyaram uguna in iri shi uganiya ucigililin. Barki in nyara in zaki uganiya nigoo nan shi,inki ugomo Asere ma hem. ⁸ Abanna me indi tonno u afsus u hana batuu ahira anu kirau ina anu ware (pentakus). ⁹ Abanna me aronii ishine wa raa ni gbardang. ¹⁰ Uganiya sa timoti mā aye irosi mkuno sas anyimo a shi, sa ya cukuno katuma ku gomo Asere kani mazini gusi mime inzini. ¹¹ Kati icukuno koda vi ma izii me, ca icukuno shi ya tibin me uhuu ma, barki mā kuro ahira am, barki in zinu ubẹ utina timeme nigoo nan nihenu. ¹² Abanna me tize tuhe nu aru afollos mā nya me kadure ma kem shi woni henu. Barki ani mada nyara u aye ba. Inki uganiya wa aye madi ē. ¹³ Cukuno ni unu urosa, tonno nii anyimo a kadure. ¹⁴ I bezi iriba ya hana aruma, wuna ni ruba i huū ceki vat imum ni be sa idi wuzi i wuzi anyimo anyara ace. ¹⁵ Shi rusa anu akura a Istifanus, we wani waa tubi wa kabi tize ti Asere u Akaya, wa kuri wa witit ace awe me u wuza anu tarsa Asere katuma, aname in zin nu tira ushi tari ¹⁶ tarsan usasana anu agino me nan de vat sa ma bengizi shi katuma, ma kuri ma zi inu uzito nigo nan haru. ¹⁷ Ma wuza iruba irum inu aye u istifanus, Fartunatas, Akaikas, wa benkum inu zome ushi me. ¹⁸ Barki wa human bibe nan bishi, barki anime, wuzan tarsa ni usanda anu agino me. ¹⁹ Anu tarsa Asere u Asiya wa iso shi, Akila nan Bilkisu, anyimo Ugomo Asere, nan unu tarsa Asere sa wamrani a tikura tuwe me. aweme. ²⁰ Vat nihenu anu tarsa Asere wa iso shi. Iso ni acece wan ugbindirko a lau. ²¹ Mi Bulus, inzin unyetike ige me in tari tum. ²² Vat de besa daki ma hem inu Agomo Asere ceki ma cukuno unu uburi, Ugomo Asere, aye! ²³ Urunta Ugomo Asere u cukuno nan shi. ²⁴ Ceki uhem um u cukuno nan shi vat anyimo a niza ni Ugomo Asere. (icukuno anime).