¹ Ana me ringizi shi ihenu, azezsere atize ti gino sa in boo shin, tige sa ya kaba shi be yakuri ya hibina atini. ² Atige tize abura shi, inki ya inta tize ta sere in nikara, idi cukuno ya hem tini anyimo u shalala. ³ Barki ma nya shi kadure ka meme ni kasi ku tuba sa mā kabi uguna ugumo-Asere ma wee barki madini maru, barki kadure. ⁴ Uguna avati me, ma kuri mahiri anyimo atiye ti taru. Usuro atize ti kadure. ⁵ Unu guna ma bezi nice ni meme ahira akefas, anini me makuri māka bezi nice ahira anu kirau in na ware. ⁶ Daka abinime māka beze nice in meme ahira anu uhenu anu ukirau ahana kani akure u aibi uganiya u inde, ande sa maroo me wadan ini vai u ye kani abanname aye wa tuba u gbisso. ⁷ Abini me ma bezi nice ni meme ahira a yakubu, nan ahana katuma vat. ⁸ U maska madusa masurum amasaa, gusi vana utipeu tina sunare. ⁹ In mani unu cangilin anyimo anu akadure kasere daki mā bari atitum una katuma kasere, barki sa ma nya ana tize ta sere uzito. ¹⁰ Barki iruba ishew i ugomo Asere ine ini ya wuna in raā a hira me sa in raa ni zin kani me, iruba ishew sa in zin daki ya i shalala inda wuza katuma kage sa kada teki kawome. Vat anime azo in mani in nice num inzi in nihoo nam nu ugomo Asere. ¹¹ Barki anime ta bezi tize me, animani ta nya kadure. ¹² Inki a wuza ugita uguna Yeso mā hiri icau aneni aye a shi me ula gusa ahira u mu cau urani ba? ¹³ Inki u hira umu cau uzoni ugomo Asere me daki mā hiri ini no me? ¹⁴ Inki daki ahirza ugomo Asere ba, tize ti Asere ta cukuno imum ishalala ini, animani kadure kashi me ka cukuno shalala. ¹⁵ A kuri, a kem duru ta cukuno anu impo amaru Asere a macico, barki ti boo abanga aburi a nice ni Asere, inu gusa maa hirza kiristi a daki maa hirza ba. ¹⁶ Barki inki uhirsa a mucau u zoni, abanna me kiristi cangi daki ahirza me ba. ¹⁷ Inki daki ahirza kiristi ba, asenke u hem ire imum ini ba i daza anyimo madini mashi me. ¹⁸ Abanna me ande sa wa anyimo anyimo kiristi we cangi a cukuno wa corno me. ¹⁹ Inki anyimo uvengize tizin nikara ni riba uhana aje anyimo kiristi, vatt uru anu ya cukuno gbas a kunna ugogoni uru. ²⁰ Abanna me, ahirza kiristi icau, me Mani bisana bi utuba bi ande sa wa wijo. ²¹ Barki iwono ya ribe unee ahira unu inde, anime ani u hira amucau. ²² Barki usuro Adamu ani a zinu wijo, anime ani usuro u kiristi a kem ivai. ²³ Abanna me konde nyani a ini rep: Kiristi mani bisana bi tuba, a tarsi in ande sa we a kiristi wani adi nya ivai uganiya uye ume me. ²⁴ Idi cukuno ibinani, uganiya sa kiristi ma di witi tigomo atari ti Asere acoo, abine ani madi kari vat tigomo, ugongong nan vatt nikara. ²⁵ Barki madi wuzi tigomo senke ma wunna vatt aroni ishina ime me a dizi a tibuna tume me. ²⁶ Uroni u shina adumo sa adi hu me mani iwono. ²⁷ Barki, "ma wuna vat imum ickuno aizi a tubuna time me." inki a guna, "ma wuna konde nyani, izi kanang ada passa me nan desa ma zaukw we ba. ²⁸ Inki vat timumum ti raa anyimo atigomo time me, vana me cangi ma di cukuno anyimo ade sa ma nya me vatt timumum. Imum ige me idi kem bati Asere acoo ma cukuno imum vat anyimo imum. ²⁹ Nani nyani idi zi ahira ande sa a wuza we u batisima barki anu wiijo? Inki u hirsa uzoni ahira ande sa wa wiijo vat, nyanini ya wuna a wuza ayeu batisima me Barki we? ³⁰ Nyanini ya wuna ti ra anyimo ijasi konde uye uganiya? ³¹ Konde uya uwui iwono i tarsam! ine ini ya wuna in tira bigiri in shi, sa in zini anyimo Yeso kiristi unu bura uru. ³² Nyanini indi ma kem, ahira u basa unubu, inki maa wuzi morso nan inama I nija u Afisa, inki daki u hirsa anu wijo u rani ba? Ca ti ri ti kuri ti si, barki nisizo ti sa wi." ³³ Kati arangi shi ba: "Tanu nan anu aburi ti cara ti cukum tiriri ni." ³⁴ Hira tonno ni! Kati i ri aje in madini, barki aye ashi me wa ta me Asere, in zin intize ti ge me bati I kunna mu'i. ³⁵ Abanna me uye madi gu, "Adi wuzi aneni ahira amucau, in usanda niya nipum nini wa di suri ni?" ³⁶ Shi anu u tame wani! Imum be sa ya bira senke ya wono. ³⁷ Imumbe sa wa bira izo idi dii uzina uni sa a bira ini ba, idi cukuno biho isana ani cas. Bi dake bicukuno bi alkama nani ire imum sas. Abanna me Asere adi ini nipum nige sa ma zauka, konde biya bi sana in nume nipum. ³⁹ Azo vat apum azi a inde me ba, apu anabu a rani, are inama,nani are inyi are icere. ⁴⁰ Apum asesere arani, apum unee arani. ugongong apum asesere ire imum ini sas nan ugongong apum unee ire imum ini sas. ⁴¹ Ugongong uwui u rani, nan ure ugongong upeu, wan ure ugongong iwirang ya zezsere. Barki bire biwirang biteki bire in ugongong. ⁴² Ani mani izi uhira a amu cau imum be sa abira i corno me ini, ige be sa ahirza izo me i corno me ini. ⁴³ Abira ini anyimo uzatu gongo, ahirza me anyimo ani nonzo. Abiri ini anyimo uguni, ahirza me anyimo ubari. ⁴⁴ Abiri me ani nipum ni kadure, ahirza me ani nipum ni bibe bi rere. Inki nipum ni kadure, nipum ni kadure me nirani. ⁴⁵ Animani a nyenttike, "Adamu unu tuba maa cukuno unubu ini vai" Adamu wa dumo ma cukuno unu bibe bi nyinza i vai. ⁴⁶ Abanna azo bibe bini ba tubi u aye ba u barka Asere uni, imum bibe i tarsi. ⁴⁷ Unu utuba ma suri a manyanga, a barka me inu susur. Unu ukure ma suri asesere ani. ⁴⁸ Gusi unu ge be sa abarka in ususur, kasi unu asesere sa mazi, ane ani ande sa wa zi wa asesere. ⁴⁹ Gusi ana me sa yozo duru inu zina unubu sa bari me in ususur, ti di kuri ti ziki uzina unu asesere. ⁵⁰ Ana me ma guna, nihenu, nipum nan maye ni da ribe me anyimo a tigomo ti Asere ba. Nani imum be sa i wicizo i ribe a tigomo ti Asere ba, ane ani ⁵¹ Ira in boo shi ni hunzi ni kadure; Azo vat uru wani tidi wi ba, abanna azo vat uru uni adi gamirka duru ba. ⁵² Adi gamirkan duru a, ana me, anyimo ukpeshke aje, ani hure nu masirka. Barki adi hure nihure, adi hirza ande sa wa wijo, anu uzatu corno me, adi kuri a gamirkan duru. ⁵³ Barki nipum nige me ni corno me gbas ini ni cukuno nipum ni uzatu u corno me, nipum nige me ni wono gbas ini nisoki nipum ni udira iwono. ⁵⁴ Inki nipum nigeme ni corno me ingi na soki nu dari u corno me, nipum nigeme ni iwono nassoki ni uzatu iwono, imumbe sa ānyentike ya gminca atuna iwono anyimo ucukuno ubigoro. ⁵⁵ Iwono, ucukuno ubigoro uwe me uraba? Iwono, tikono ti weme tira ba? ⁵⁶ Abanna me tikono ti iwono madini mani, nikara madini uweki utize uni. ⁵⁷ Abanna me urunta uni ahira ugomo Asere unu ge be sa ma nyan u cukuno u bigoro ahira ugomo Asere. Yeso ugomo-Asere. ⁵⁸ Barki anime, shi anuhenu um ande sa ma hem, tonno ni kati ikunna biyau. Kodi umaya i yata in katuma ka Asere, bzrki irusa katuma ka shi me anyimo ugomo-Asere azo kani kazi ba.