¹ In nyara i rusi, nihenu, a kacoo uru wa ra anadizi a niwiri wa kuri wa tarsa anyimo uraba udandang. ² Vat uwe azorso we anyimo a tiwiri nan uraba udang. ³ Vat uwe wa ri imum yare ibibe biriri usandu inde. ⁴ Vat uwe wa si imum usa ibibe biriri usandu inde. Barki sa wa si ahira anipo ni bibe biriri sa na tarsi we, nipo me nine nini vana Asere. ⁵ Daki Ugomo Asere maa kunna urunta u maroo mawe ba, mukizi muwe me mu samirka anija. ⁶ Ana me timum tige me imum ubatta ini ahira aru, kati ti inki timum tibur a muriba kasi we me ba. ⁷ Kati i cukuno anu tarsa umakiri, kasi aye sa waa wuzi. Kasi unyettike sa a wuzi, "Anu waka cukuno wa ri wa si wa kuri wa hiri wa wuzi biranza. " ⁸ Kati ti musi wan aneh ba, kasi maroo ma we me wa wuzi. roni u inde anu a ino ukira kana kuru are in kani kataru (23,000) wa wi barki ini. ⁹ Kati ti mansa vana Asere kasi sa maroo mawe wa wuzi, iwa ya huzi we. ¹⁰ Kati ticukuno anu humoro ba kasi maroo ma we me wa wuzi, wa wiji atari ti bibe bi kadura ka Asere biwono. ¹¹ Timum tige me ta kem we bati i cunon duru imum i ubatta. A nyettike i cukuno imum i kubum, haru ande sa umara unee wa aye ace aru. ¹² Barki anime, ca konde avi ma gamari memmerum, ma wuzi merum kati ma rizi. ¹³ Umansa u zo ni sa wa aka wa de sa a mansa. Ani me, Asere ahuma ani. Ma da ceki me amansa shi unu mansa sa udi aki nikara nishi ba. Ma di nya shi una ura anyimo ubata me sa adi wuzi shi. ¹⁴ Barki anime, shi ande sa ma hem in shi cekini utarsa umakiri. ¹⁵ Inzi tize nan shi kasi anu basa ukang, bati I bati imum sa in boo shi. ¹⁶ Kusso kuringirka kuge sa tizin unu tingirka me, inzo nigo me nine anyimo a maye ma vana Asere? Ubiredi me sa tizin upozo me, inzo nigome nini anyimo vana Asere? ¹⁷ Barki ubiredi u'inde uni, haru gbardang a nipum ni'inde. Vat uru ti di ri ubiredi u'inde nigo me. ¹⁸ Irani anu Isaraila; da we wani sa waa ri imum i wito udenge Asere? ¹⁹ Nyanini in gusan shi ani me? Makiri imum ini? Nani imum yare sa anyinza makiri, ire imum ini? ²⁰ Mi inzin tize a timum sa anu zati utarsa Asere wa nyinza, wa nyinza agberge wani inzo Asere ba. Inda nyaram i wuzi tanu nan agbergene ba. ²¹ Ida sa shi a kuso ku Ugomo Asere i kuri i si akuso ka gbergene ba, ida re shi imum yare Ugomo Asere i kuri i ri ya gbergene ba. ²² Nani tinyara ti wu Ugomo Asere ni'eru? Titeki me nikara? ²³ "Konde nyani izi rep," Inzo konde nyani izin katuma ba, "Konde nyani izi rep" inzo konde nyanini i ehze inu re aje anu ba. ²⁴ Kati uye ma nyari ubura unice nume ba, anime ma nyari u ri uroni utura ume. ²⁵ Udake u ri vat imum me sa azin unu ziza me ukasuwa, sarki ubasa u tize. ²⁶ Barki " unee nan vat timum me sa tira anyimo me i Ugomo Asere ini." ²⁷ Ingi unu zati uhem in Asere ma tita we agi iri imum yare, ahu in iriba yare me u ri vat imum me sa anya we sarki uhara iruba. ²⁸ Ingi uye ma gunan hu, "Imum yare i makiri ini" kati u ri ba. Udi wu anime barki de sa ma buka we, nan bassa. ²⁹ In boo Ubassa ude sa mabuka we inzo ubassa uwe ba. Barki nyanini adi ziki ucara uye acani mi? ³⁰ Ingi ma guna ankoi barki imum yarce sa maree nyanini idi wu azogun barki sa maguna ankoi? ³¹ Barki anime, ingi uzin naree nan usaa, wuza vat barki unonzo asere. ³² Kati ucukuno unaa upilko, wa yanhudawa, nan Aheliniyawa nan anuu Asere ba. ³³ Ma wuza morso bati in rumi vati anuu muruba vat atimun. Inzo barki nicee num ba, barki konderi: Ma wuza anime bati wa kem ubara.