8 ¹ Colhua coca mamma nennactewasemmalhca nengellelto nac nempasmecja Cristo Jesus, ² ncanec apmopuana ¹ nac Apualhoc jengelpaqnencasecja acmowana ² maniamolhma cacpota njan nengetsepma, jengellaianco njan nelliennactema aniem'o m'a Cristo Jesús. ³ Jenganemacja nac Moises mmajai'a lhta niecje jengelluonquesec tep, ma lhtoca ncomowanac ma'a aniem'o ennenco'o mangenmopuanca'a angelleliejecjojo ncanec ma lhta angellienna'ac cacpota njan mongeliamolhma. Ca nqueniemai'ac Engiapom Neten engiapacsec apquetca aptemesquesecjo enenlhet apanque, aptemenwai'o njan meiennactema m'a cacpota engietsepoc jengelliaqmoiecja ennenco'o, niecje aptemonwai'a enenlhet apanque, meiennactema njan, ncacjoc coca ntewascanquec maniamolhma nac. ⁴ Jengellaianco lhta njan nenmopuanca'a cacpota angelieplauquesec acpeiwomo nquec actemacja aclheianma jenganemacja, colhua coca enwanca'ac ncanec mmasquec jengenmanca m'a aliasponcomacja nac engellualho'oc, colhua coca jengenmama m'a Apualhoc. ⁵ Coca apquellelto nac anmaicama aliasponcomacja apquelualho'oc, wanlha mota atlheianma apualho'oc ellanancoc caselha ncolatsecama, coca apquellelto nac apquenmaicama njan Apualhoc, wanlha mota atlheianma apualho'oc ellanancoc apqueltemacja la ellanancoc ma'a. ⁶ Apquellelto nac apquellanecamoc caselha ncollatsecama, nnec aquiacmoncasacjo apqueletsepma, coca apquellelto la apquellanecamoc caselha acleclemelha nac apualhoc Espiritu, nnec aquiacmoncasacjo aliennactema apnengio'oc cacpota njan metca altaicama apualho'oc. ^{7 8} Apquellelto nac apquelieplauquescama aliasponcomacja nac apualho'oc, coca apqueluesai'a apquellammelhma Engiapom Neten, manconmac'ac na elleliejecjoc ma'a, mancollapuanca'ac najan, manconmac'ac na elleccasama apualhoc Engiapom Neten. ⁹ Coca apcacjanco la apualho'oc Espiritu apancoc Engiapom Neten, ntasec elieplauquesec ma'a. Coca metco la apualho'oc Espiritu apancoc Engiapom Neten, coca jawe Jesucristo apquenemolhema m'a. ¹⁰ Apno la Cristo apualho'oc quetlhengcap, nietnec na apualho'oc alhnancoc, nieplawawec na nema altemesquescama apquelpeiwomo, coca apqueliocja nac malha aletsepma aniem'o maniamolhma. ¹¹ Apno la apualho'oc quetlhencap Espiritu apancoc Engiapom Neten apto lhta njan aptemescasecja apjalhnancoc Cristo Jesús, ellancoc jata m'a alhnancoc apqueliocja aniem'o m'a Espiritu apancoc Engiapom Neten apno apualho'oc quetlhencap, coca apqueliocja nac acmowana ncomasquenwomoc. ^{12 13} Mangelleliejecjec anquec jata aliasponcomacja nac engellualho'oc ncanec awanquec jangaqjec ma'a, coca neluatesanco la nellanecamoc caselha ncollatsecama aniem'o njan jengelpasmoma Apualhoc, angelloca ta ncotnenwaianlha nnelha. ¹⁴ Aplhamacjo apquellelto la apquenmaicama Engiapom Neten Apualhoc, coca apqueluesai'a Engiapom Neten apquetcac ma'a. ¹⁵ Metlhewancoc quetlhencap apualhoc anmajai'a nac ncoltemesquesec malha esclavos, ca njan altemesquescama nac apquellai'a mocjom, apquetlhewanquec coca Apualhoc apqueltemesquescama Engiapom Neten apquetcac, colhua coca apuanca'ac eltetescacjac Engiapom Neten, apuanca'ac na elpaqmetquesec nalhepe' apquelpaqmeiasma ellanjojo', etnancoc ellana': —Ta— ^{16 17} Ca Engiapom Neten Apualhoc anac apaqmetquesanquec engellualho'oc engancawe, jawe ngiapac anquec ennenco'o nac nengellelto Engiapom Neten apquetcac, angetlhewancoc jata lhemec Cristo aptemacja lhta apenescamo apaioma Engiapom Neten. Nengellelto la angetlhewancoc jata altacmanma m'a, nnawec na Cristo m'a elhcac jata, ncaimelhquec coca secjec angenmancoc tacja acuo'o la aquientalhnema nac ma'a, aptemo lhta njan Cristo.

Actacmelo caselha ncowac jata

¹⁸ Niecje nellengaianco quetsec aquientalhnema colhuawe nac, mancolhnoc awanjec jatoca m'a actacmanma angelloca m'a. ¹⁹ Awanjec alleleljalhanma caselha apquelentepquescama lhnac na nec, Engiapom Neten eltemescasecjac ma'a alientalhnemo apquellelo apquetcac. ²⁰ Ca nema nac aliennaiancojo nconactewasalhca lhamacjo caselha nema alentepquescama, jawe aniem'o anco'oc ancawec, coca aniem'o m'a Engiapom Neten. Coca nietnenque mota njan aleljalhanma m'a ²¹ ncolhec jata aluoncaso tep necsa anmaicama acnactewascama, allacjaicama au'alho'oc najan, ca actemo nac ma'a Engiapom Neten apquetcac nemo nac alpaqnencasecjo anmama maniamolhma. ²² Ampai'o lhnac tep nac nanec allengaianco caselha nema alentepquescama nac, acuacmo nenwanlha nac allengaianco, allapenteicamoc malha nqueluana acmajai'a nac ncotenquesec atca'. ²³ Nellapentenquec na ennenco'o, niecje aquietnema Espiritu apquelientemonquescamo lhta amanie' jengellaicamoc, ncacjoc coca awanjec nellengaianco nengelleljalhanma ncolhec jata jengeltemesquesacjo Engiapom Neten apquetcac aquiocjo ncoie', ncolhec jata njan jengelluoncaso tep enjapetec anac acmaicama nac maniamolhma. ²⁴ Nengelluoncasemmalhquec tep necsa jengenmaicama nengetsepma ncanec nengellelejalhanme lhta m'a, colhua mancaimommalhcac mocjom angelleljalhnama nwaia'ac ma'a. ²⁵ Coca ncaimommalhcac ma'a angelleljalhnama ncolhec jengelpaqnenquescasacjo enjapetec anac acmaicama maniamolhma, ncanec mancowac mocjom ma'a, ntasec angellailhec nelluascapma m'a. ²⁶ Mongelliennactema ennenco'o, mangeliojoc na actemacja acpeiwomo nengenmalhnoncoma Engiapom Neten, coca Apualhoc jengelpasmac ma'a, apquelmalhnema apmalengioicama Engiapom Neten cacpota jengeltacmelquese mota m'a, mangeliojoc ennenco'o aptacja mota. ²⁷ Apiawec coca Engiapom Neten alquetansema engellualho'oc, apiawec na apto apquenmalhnecama Espiritu Santo ncanec apquenmalhnema mota apmajai'acja la etnec Engiapom Neten apquellelto la Engiapom Neten apquennemolhema. ²⁸ Nelliawec ennenco'o Engiapom Neten apquelpenescasawec lhamacjo caselha cacpota ncoltacmelquesec apquellaniemjaicama apquellelto nac apquellamelaicamaja, Engiapom Neten apquellawecama njan cacpota elieplauquesec na apquellanemacja la etnancoc ma'a. ²⁹ Lhennenga coca apiamo Engiapom Neten apto ta apcawecama, apqueliequiescama njan cacpota ncowomoc jata malha aptema m'a apquetca apanque, coca apquetca apanque nac ma'a apto metno pquetcoc apiesecsec apentalhnacja apquelialheng'a. ³⁰ Jai', lhennenga apqueliequiescama Engiapom Neten ma'a, netamen apquellaweianca njan, apqueltemesquescamo njan apquelpeiwomo, apqueltemesqueso njan neten apancawec apqueliaspommap ma'a. ³¹ ¡Ntasec anquec actemacja caselha nac ma'a! Apno la nengeqja Engiapom Neten, mamma njan enenlhet apmopuana la jengellammelhec. ³² Apqueltawe lhta Engiapom Neten engiancoc apquetca cacpota engietsepoc jengelliaqmoiecja ennenco'o, jawe ngiapac anque jengellancoc jata njan alaimommalhquelha la caselha ennenco'o. ³³ Mamma apquetlhenammap la apquellelto nac Engiapom Neten apqueliequiescama, ncanec Engiapom Neten apto apqueltemesquescama apquelpeiwomo m'a, ³⁴ mamma njan apnaqtewasemmap la m'a, ncanec apquetsepme Cristo Jesus apqueliaqmecja m'a, netamen aptaiecjo lhta njan mocjom apjalhnancoc, colhua coca apnec ma'a napocja aquiennacja Engiapom Neten, apqueltennasque mota apqueltemo elpasmoc ma'a. ³⁵ Mamma caselha acmowana jengiengiauquesec nengasecjai'o Cristo, niecje nellengaianco aquientalhnema, niecje acmasca, nema jenmenlhenaicama, mec, metca netsecama, caselha nengai'o, nelletsepma nenmatnamojo, mamma caselha nac m'a acmowana jengiengieuquesec nengasecjai'o Cristo. ³⁶ Ca ntac waccajac actalhesammalhca Engiapom Neten apaioma: «Aniem'o lheiap nelieplecama, nentequieuque mota, jengeltemescasquec malha nepquesec nema aquiantemecja ta aptequiomacja» ³⁷ Coca nengelliepjonwacmec ma'a aniem'o jengelpasmoma Engiapom Neten apto njan jengamelaiam, ³⁸ nengelliawec na ennenco'o acto jawe ngiapac anquec mamma caselha acmowana jengelliengiauquesec jengamelaiam Engiapom Neten, niecje nengetsepma, nengelliennactema, enenlhet neten, casecapo au'alho'oc, actacja nenwetai'a colhuawe nac, actacja ta emmanie nac, ³⁹ mamma acmowana aniem'o neten anac cacpota njan conne anquec nalhepop anac, mamma caselha apquelentepquescama lhta Engiapom Neten, mancollawanquec na jengelliengieuquesec jengamelaiam Engiapom Neten aniem'o apuesque engancoc Cristo Jesus.