2 ⁸ ولی کسانی یَ کی خدا وجودِ حقیقتَ قبول نَئرِد و ناراستی دونبال شودَه، خو خشم و غضبَ فوکونه. ⁹ هر کسی کی بخَأیه بدیَ بجا بَأوره، مصیبت و عذابَ دوچارَ بِه، جی یهودی بیگیفته تا غیرِ یهودی. ¹⁰ و هر کسی کی بخَأیه خوبیَ بجا بَأوره، سربلندی و آرامشِ الهی اونِ نصیب بِه، جی یهودی بیگیفته تا غیرِ یهودی. ¹¹ چره کی خدا رِه اَیتَه اویتَه فرقی نَئرِه و خدا تبعیض قائل نیبِه. ¹² همۀ کسانی کی شریعت نَئرِد و گوناه کوند، بی شریعت هم میرِد، و همۀ کسانی کی شریعت دَأرد و گوناه کوند، شریعتِ احکامِ مرَه محکوم بود. ¹³ چون خدا ورجَه کسانی کی شریعتَه بیشتَأوسته دَأرد عادل نیئِد، بلکی کسانی کی شریعتِ احکامَ عمل کوند عادل به حیساب اَیِد. ¹⁴ وختی غیرِ یهودیان کی موسی شریعتَ نَئرِد، شریعتِ احکامَ بر اساسِ طبیعت و خوشَأنِ وجدان انجام دِهِد، با اَنکی بینیویشته بوبُسته شریعت نَئرِد، ولی اوشَأنِ شریعت، خودشأند. ¹⁵ اوشَأنِ رفتار نیشان دِهِه کی شریعتِ احکام، اوشَأنِ دیلِ دورون بینیویشته بوبُستِه و اوشَأنِ وجدان اَ گوفته راستی یَ تأئید کونه. چون اوشَأنِ وجدان کاری وَسی کی بوکوده دَأرد یا اوشَأنَ مذمت کونه یا اوشَأنِ جَه دفاع کونه. ¹⁶ اَ کار بر طبقِ انجیلی کی من بشارت دِهِم روزی دورون ایتفاق دِکِفه کی عیسی مسیح، طبقِ خدا حُکم همۀ آدمیانِ جیگا بدَه بوبُسته دیلِ فکرَأنَ، داوری کونه. ¹⁷ ای یهودی، خیال کونی چون خدا خو احکام و شریعتَ شومرَه فَأده دَأره، شیمی جَه راضیِه؟ اِفتخار کونی کی خدایَ شِنَأسی ¹⁸ و اونِ ایراده یَ دَأنی، و چون جی کوچیکی شریعتِ دورون تربیت بوبُسته دَأری همیشه خُرمه چی دونبال ایسَأیی ¹⁹ و خاطر جمعی کی کورانِ راهنمایی، و کسایی کی تاریکی میَأن نیشتِد رِه نوری، ²⁰ و نادانانِ اُستادی و کوچی زاکأنِ معلم، و خدا شریعتَ کی پور جی معرفت و حقیقته یَ دَأنی. ²¹ تو کی دیگرانَ تعلیم دیهی، چره خودتَ یاد نِدی؟ تو کی موعظه کونی نوَأستی دوزدی کودَأن، آیا خودت دوزدی نوکونی؟ ²² تو کی گویی نوَأستی زِنا کودَأن، خودت زِنا نوکونی؟ تو کی گویی نوَأستی بُت پرستی کودَأن، آیا مالِ دونیایَ بُتِ مَأنستَأن پرستش نوکونی؟ ²³ تو کی افتخار کونی شریعت دَأرم، آیا وختی شریعتَ پامالَ کونی، خدایَ بیحُرمتی نوکونی؟ ²⁴ هوطویی کی اِشعیایِ نبی کیتابِ دورون بینیویشته بوبُسته: «غیرِ یهودیان، شومَأن یهودیانِ وَسی، خدا نامَ بی احترامی کوند.» ²⁵ ختنه بوستَأن، موقعی ارزش دَأره کی شریعتِ احکامَ بجا بَأورید، ولی اگر شریعتَ پامالَ کونید، اَنَ مَأنِه کی اِنگار ختنه نوبُسته دَأرید. ²⁶ و اگر کسی کی یهودی نیبِه و ختنه نوبُسته بِه، شریعتِ احکامَ بجا بَأوره، آیا خدا اونَ ختنه بوسته و یهودی به حیساب نَأوره؟ ²⁷ کسی کی جسمِ دورون ختنه نوبُسته دَأره ولی شریعتِ احکامَ دَأره و اونَ بجا اَوره، ترَه محکوم کونه، چون با اَنکی کیتاب آسمانی دَأری و ختنه نشانه هم دَأری، بازم شریعتِ احکامَ پامالَ کونی. ²⁸ چون یهودی واقعی کسی نییِه کی به ظاهر یهودی بیبِه و ختنه واقعی هم فقط ایتَه عملِ جسمی و ظاهری نییِه. ²⁹ بلکی یهودی واقعی اونِیه کی خو باطنِ جَه یهودی بیبِه و اونِ دیل و فکر ختنه بوبُسته بِه، کی اَ ختنه، روح القدسِ دسِ اَمرَه انجام گیره نه بواسطۀ اونچی کی نیویشته ای ویشتر نییِه. اگرم اِنسان اَجور کسَ ستایش نوکونه، خدا ستایش کونه.