83 ¹ خدایا، ساکت نِئس، ای خدا تو آرام و قرار نیگیر، ² چون تی دوشمنان شورش بوکودد و اوشَأنی کی تی جَه نفرت دَأرد، خوشَأنِ سرَ راستَ گیفتد و مغرور بوبُستد دَأرد. ³ مخفیانه بر ضّدِ تی قؤم نقشه کشد و اوشَأنی کی ترَه پناه اَوردِ رِه توطئه دیچیند. ⁴ اوشَأن گوید: بأئید اَشَأنَ هلاکَ کونیم تا دِ قؤمی نمَأنه و اسرائیلِ نام همیشه رِه محوَه بِه. ⁵ اوشَأن همه تَه همدست بوبُسته دَأرد و همدیگرِ اَمرَه عهد دوَستد و بر ضدِ تو توطئه بوکودد. ⁶ اشَأن، اَدومیان و اسماعیلیان و موآبیان و هاجریان و ⁷ جِبالِ مردم و عَمّون و عَمالیق و فلسطینیان و صورِ مردمد. ⁸ آشور هم اَشَأنِ اَمرَه متحد بوبُسته و جی عمونیان و موآبیان حمایت کونه و اوشَأنِ رِه بوبُسته دَأره دسِ قوّت. ⁹ اَشَأنِ اَمرَه هو کاری یَ بوکون کی مِدیانِ اَمرَه بوکودی، هو بلایی کی رودخانۀ قیشونِ ورجَه سیسِرا و یابینِ سر بأوردی اَشَأنِ سرم بأور. ¹⁰ چوطو اوشَأنَ «عِین دورِ» جَه هلاکَ کودی و اوشَأنِ جنازه یان اَقدر زمینِ رو بمَأنست تا خاک بوبُست. ¹¹ اوشَأنِ پیله کسانِ آخرعاقبتَ عُرب و ذِئِب مَأنستَأن چَأکون و اوشَأنِ فرمانده یانَ «زِبَح» و «صَلمونَّع» مَأنستَأن هلاکَ کون. ¹² اَشأن هون کسانی بود کی گوفتد: بأئید خدا سرزمینانَ بیگیریم تا اَمی شین بیبه. ¹³ خدایا، اَشَأنَ غبارِ مَأنستَأن پراکندَه کون و کلوشِ مَأنستَأن فَأدن بادِ دس. ¹⁴ چوطو آتش جنگلَ سوزَأنه و کوه هانَ شعله ور کونه، ¹⁵ اَشَأنَ تی غضبِ توندِ بادِ اَمرَه دورَ کون و خودتِ طوفانِ اَمرَه اَشَأنَ آشفتَه کون. ¹⁶ ای خداوند، چنان اَشَأنَ ذلیل و شرمنده بوکون تا تی نامَ التماس بوکوند. ¹⁷ بدَه همیشه رِه رسوا و پریشان بوبود و خواری و ذلتِ مرَه هلاکَ بود. ¹⁸ و بفهمد تو کی تی نام یَهوَه یه، تنها حاکم، و همۀ زمینِ رو مُتعالی.