81 ¹ خدایی رِه کی اَمی قوّته سرود شادی بخَأنید، یعقوبِ خدا رِه خوشحالی مرَه فریاد بوکونید. ² سرودَ شروع بوکونید، دفَ بأورید، بربط و چنگ بزنید. ³ عیدِ روزانِ رِه شیپور بزنید، اولِ ماه و موقعی کی ماه کاملَ بِه. ⁴ چره کی اَ رسمی ایسه اسرائیلِ رِه، و حُکمی ایسه یعقوبِ خدا طرفِ جَه. ⁵ اَ عیدَ وختی اسرائیلِ مردمَ فَأدَه کی مصرِ جَه بیرون شوئون دوبود. بیگانه صدایی ایشتَأوم کی گویه: ⁶ سنگینِ بارَه شیمی دوشِ جَه اوسَأدم و شیمی دسَأنَ سبد بوردَأنِ جَه آزادَه کودم. ⁷ وختی گرفتاری میَأن ایسَه بی مرَه رو بأوردی، و من ترَه نجات بدَم، رعدِ میَأنِ جَه ترَه اجابت بوکودم، و «مِریبَه» چشمه یانِ ورجَه تی ایمانَ امتحان بوکودم. ⁸ ای می قؤمِ خاص، شمرَه هشدار دهم، ای اسرائیل کاش می گبأنَ گوش بوکونی. ⁹ خدایِ دیگری یَ پرستش نوکونید و خدایِ بیگانه جولو سُجده نوکونید. ¹⁰ من یَهوَه تی خدایم کی ترَه جی مصرِ سرزمین بیرون بأوردم، تی دهَنَ خوب بازَه کون و من اونَ جی برکت پورَه کونم ¹¹ ولی می قؤم می گبانَ نیشتَأوستد و بنی اسرائیل می جَه ایطاعت نوکودد. ¹² پس منم اوشَأنَ ترکَ کودم تا خوشَأنِ راهَ بوشود و مطابقِ خوشَأنِ میل زندگی بوکوند. ¹³ ای کاش می قؤم مرَه گوش بدَه بود و بنی اسرائیل می جَه ایطاعت بوکوده بِه. ¹⁴ اونموقع سریع اَشَأنِ دوشمنانَ شکست دَئِم و همۀ اوشَأنِ مخالفانَ مجازات کودم. ¹⁵ و اوشَأنی کی خداوندِه جَه نفرت دَأرد ترسِ اَمرَه اونَ تعظیم کودد و تا اَبد مجازات بوستد. ¹⁶ و شمرَه بهترین گندمِ مرَه خوراک دَئم و صخره عسلِ اَمرَه سِئرَه کودم.