23 ¹ خداوند می شبانه، هیچ چیزَه مُحتاج نوبوم. ² علفزارایِ سرسبزِ میَأن مرَه خوسَأنه. مرَه آرام آبانِ طرف هدایت کونه. ³ مرَه تازه جانی بخشِه و خو نامِ وَسی مرَه راهِ راستَ هدایت کونه. ⁴ حتی وختی مرگه تاریکه درِّه جَه دوَأرَستَأن دَأرم بدی جَه نترسم، چره کی تو می اَمرَه ایی، تی عَصا و تی چوبدستی می دیلِ قوّته. ⁵ می دوشمنانِ چومِ جولو مرِه سفره ای وَأشَأنی، می سرَ روغن وَأسینی و می جامَ پورَه کونی. ⁶ ای خداوند اطمینان دَأرم کی همۀ می عُمر تی لُطف و مُحبت می اَمرَه یه، و تی خانه میَأن ساکن بؤم، تا اَبدالآباد.