1 ¹ از کلیسا شیخ، به اون بانویی کی خدا انتخاب بوُسته یه و به اونِ زأکأن، کی اوشَأنَ حقیقتِ میَأن دوس دَأرم، نه فقط من، بلکی همۀ کسایی کی حقیقتَ شنَأسد اوشَأنَ دوس دَأرد. ² اَ دوس داشتن اونْ حقیقتی وَسیه کی اَمی وجودِ دورون قرار دَأره و تا اَبد هم ³ مَأنه. خدایِ پئر، و اونِ پسرْ خداوندْ عیسی مسیح، اَمرَه فیض و رَحمت و سلامتی عَطا بوکونه، تا همیشه حقیقت و محبتِ میَأن اَمی اَمرَه بیبه. ⁴ خیلی خوشحالَ بوستم وختی بیشتَأوستم کی بعضی از تی زأکأنْ هوطویی کی اَمی پئر حُکم بوکوده دَأره، مُطابقِ حقیقت رفتار کوند و اونِ اَحکامَ دَأرد. ⁵ ای بانو، هَسَه تی جَه خواهشی دَأرم، و اون اَنه کی همدیگرَ محبت بوکونیم، من تازه حکمی تِرِه نینیویسم، بلکی هون حُکمی ایسه کی از اول بیشتَأوستید. ⁶ و محبتم اَنه کی مُطابقِ خدا اَحکام زندگی بوکونیم، بله، حُکمْ هونی ایسه کی از اول بیشتَأوستیدْ یعنی محبتِ میَأن زندگی بوکونیم. ⁷ چون فریبکارایِ زیادی دونیا دورون پخشَ بوسته دَأرد، یعنی هون کسانی کی قبول نوکوند عیسی مسیحْ جسمِ دورون ظاهرَ بوسته، اَشَأنْ ضدِ مسیحد و شمرَه گومراهَ کوند. ⁸ پس مواظب بیبید و اوشَأنِ جَه دوری بوکونید تا اوشَأنِ مَأنستَأن نیبید، نوکونه همۀ کارایی کی شیمی وَسی بوکودیمَ بر باد بدید، برعکس، اَمَأنْ خَأئیم کی شومَأن پاداشِ کامل فأگیرید. ⁹ هر کسی کی تعلیم دِهه و اونِ تعالیم مُطابقِ مسیحِ تعالیم نییه، خدایَ نَئره، ولی اونی کی تعالیمِ میَأن ثابت بِئسه، هم پئرَ دَأره و هم پسرَه. ¹⁰ اگر کسی بأیه شیمی ورجَه و تعلیمِ دوروستَ نأوره اونَ شیمی خانه دورون راه ندید، اصلاً اونَ خوش آمدم نوگوئید. ¹¹ چون هر کس اونَ خوش آمد بوگویه ، اونِ اعمالِ بدِ میَأن شریک بِهه. ¹² خیلی چیزان دَأرم کی شمرِه بوگویم، ولی نخَأستِم کاغذِ رو بینیویسم، اُمیدوارم زودتر بأیم شیمی ورجَه و حضوری گب بزنیم تا اَمی خوشی کامل بیبه. ¹³ تی انتخاب بوبُسته خأخورِ زأکأنْ، تِرِه سلام رسَأند.