¹ Bota, jobe himidin la Yerusalem, midin Betfage dum Betania, do helpo Zaitun, Yesus pasul I murid halu, ² monto in fu behi, "Bola desa ta do min momlo, bota minsun bot ji baine min bot keledai kagul nuha ta kafuli ta dum mat bobai loha po de. Dok keledai ji be muti. ³ Mengbemat mtun awa, 'Popanta min belai na ?', minfu, 'At Mam farlu keledai ji heu fudo inagim hoi lane.'" ⁴ Monto hipo, tihi pot keledai wai takafuli do mabata, da do hoi haulit, ta do ma, monto hilai. ⁵ Mat hafilan ta hi sol doji hi tun hi, "Panta minhamol ta hagara minlai keledai ina ?" ⁶ Hi fu sata Yesus in fu behi, monto ti mat hi fandun mata hi po hi po. ⁷ Monto Hi hut keledai ji be Yesus, hi lai hi juba dodo keledai ji, monto Yesus mtul do pe jei. ⁸ Monto, mat kawas hi pehi juba doma, monto naha hi te hai kan nan ta hitin po dan. ⁹ Mat kawas ta hi to dota tahi tumi hifu, "Hosana ! Barkat mat tai bot ba At Mam Imsyan. ¹⁰ Karajaan Daud tabotne ibarakat, ponta aijie atjai kai ! Hosana, donu tahalok !" ¹¹ Monto Yesus isun la Yerusalem ti ibola Bait Allah. Ti ineng pon foi tadonau buli, ibola Betania du murid jamalu ponta mnomlau heu. YESUS I KUTUK POHON ARA ¹² Bota bemana ta hi po hala Betania, Yesus inamsil. ¹³ Ti ineng pohon ara diha tainipa po maulit, ibo be ineng dang te ponaha ta ibot potate. Bota i bot pohon ara ji, ibot ponaha po woti pahi ponta bukun ara mjes po. ¹⁴ Monto Yesus in fu be pohon ara ji, "Mat naha ha au pohi cana delti lau." Monto i murid Hi ngo. YESUS I BOLA BAIT ALLAH ¹⁵ Bota, hi pot Yerusalem. Ti Yesus i sun la Bait Allah ti tinduk bemat ta hi hop pon do Bait Alla. I falu i meja ta hi pasek pip dodo dumti mat ta hi hop hatiu hi tarapese hi, ¹⁶ Ti idam bemat nut pon tagel na Bait Allah ca. ¹⁷ Monto, Yesus i pangajat hi ti in fu, "Minnu ta Ak deli ne mat infu 'Be deu hambayang be mat kawas'poi ? Woti, pota min behoi bejai mat tauwi hi ni." ¹⁸ Imam-imam kepala, dumti Ahli Taurat hinggo i ti hi sung ma behi puni. Ponta hidat ti ponta mat kawas hi didin i pengajaran. ¹⁹ Bota mkan ji do matip, Yesus ti i murid-murid hi po hala kota ji. ²⁰ Bota, kaseu cu tahi tagel, hi heng pohon ara tamsa hagara bota ikawa po. ²¹ Petrus i lobot hoi mo infu be Yesus, "Rabi, Meng ko ! Pohon ara ta Au kutuk ne msa heu !" ²² Ti, Yesus infu behi, "Do kalit iman po Allah. ²³ Akafu aita mtolon be awa, mat faloti de ta infu be hel ne, 'Tadokdo ti hambel la lou la ca lomul,' monto i hawatat po, wotita mdel ponta infu ne na jai, monto ponji ta bei. ²⁴ Kafu be mina, ponta min hambayang, timin fagau, parca ti do namin mepen, monto pon ji na pe be mina. ²⁵ Monto be min sol be min hambayang, be fu min kabun min lomhi be mat ma ampuni, be Au Mam tai do surga tu no i na ampun au sal hi. ²⁶ Befu min ma ampun tei, min Mam ta i do surga tu no i na ampun min po." YEHUDI HI KAWUT INTUN DEL KAWASA YESUS ²⁷ Monto, hi pot hoi la Yerusalem. Bai nunta Yesus i bola Bait Allah, imam-imam kepala, ahli-ahli Taurat, dumti tua-tua Yahudi hi pot si Yi. ²⁸ Ti hi fu beyi, "Ba kawasa panta Au famol pon foi ne na. Te ye manta ibe kawasa be Au hamol na ?" ²⁹ Yesus infu be hi, "Aka tun msus aha po mina. Min jawab Aka, fudo Aka fu mina tafudo pon hi ne Aka fu ba kawasa pana. ³⁰ Pon ne fudo baptisan Yohanes ne po surga tepo po mancu ? Jawab Aka !" ³¹ Hi tun naha late, "Befu at jawab, 'Ta po surga,' Ti infu late, 'Po panta min parca teina ?' ³² Wotita, be tafu jawab, 'Ta po mancu ?'" Aye pemimpin hidat mat kawas ponta hi bemtup parca tafudo Yohanes jie nabi nu hado. ³³ Monto, hi jawab Yesus, "Amne nupo." Tita Yesus infu behi, "Belai ye Aka, Ak tuno kafu be min po ta fudo ka paki kawasa panta famol ba ponhi ne.