¹ Yetu ava tushangumuka lalo ku lishala? Kotua yonguele mikanda ya vukaleho kuli yeni ndi ya kutunda kuli yeni, ngecimua vantu vamo, tuna vifuila? ² Eni vavenia yeni mikanda yetu ya vukaleho, vathonene ha zhimbunga zhetu, vivezhiva nakutanda ku vantu voshe. ³ Mua leketha ngueni eni mikanda ya kutunda kuli Kilistu, viuanamo viamu vipanga vietu. Kova vithonene na ndombue vunoni na Sipilitu ya Kalunga ua muono. Kova vithonene hamavue, vunoni muzhimbunge zha vantu. ⁴ Olu lukelo luthselelo tuakala nalo muli Kalunga kuhitila muli Kilistu. ⁵ Etu kotua puithilemo muli yetu vavenia ndi tu thinganieke vimo via kutunda kuli yetu. Te nga, kupuithamo kuetu kutunda kuli Kalunga. ⁶ Kalunga yakeye ua tu panga a tuathiuithe tukale vaka kukuata muchiuano cha chiha. Chiuano echi keti cha ku mukanda vunoni cha Sipilitu. Mukanda kuthsiha, vunoni Sipilitu yihana muono. ⁷ Vaka vipanga via kuthsa-via kuchokola ha mavue-viezhile muvumpahu nguavo vana va Isaleli kutala kuvuahelela kuahi muluholo lua Mosesa. Omo lia vumpahu muluholo luendi, vumpahu vuayile na kuhua. ⁸ Vuakupua kuiko vumpahu vukuavo vua Vipanga vio yikapanga Sipilitu. ⁹ Ambe nguavo vipanga via ku payetha viakele na vumpahu, vika vikuavo vipanga via kushungama vikatha kulikuata mu vumpahu. ¹⁰ Chili, choshe chova hanene vumpahu kochethi lalo na vumpahu mucifua eci, omo lia vumpahu vua tuvakanene muakama. ¹¹ Ambe vije viahitile laja viakele na vumpahu, keho vumpahu vuakupua kuiko vukala kuli yeyi via kukalelelaho. ¹² Nthsimbu kanda tuli na kutatelela, tuna thimpi. ¹³ Kotua kele ngechi mua Mosesa, endi uafuikile luholo luendi kulinga vana vaIsaleli va jeneke kutala kushungama kulengetha cha vumpahu vua kuhuaho. ¹⁴ Vunoni vithinganieka viavo via lemene. Ha matangua ano, ambe vatanda chiuano cha laja. Chifuiko chakele ngachije vene. Kova chitundithile ko, mukonda muli Kilistu lika vaka litunditha. ¹⁵ Vuno nambe lelo, nkalaha hathsa Mosesa, chifuiko chikafuiki zhimbunge zhavo. ¹⁶ Vuno nga muntu a tengulukila kuli Muene, chifuiko vana chi tundithaho. ¹⁷ Ngechi Muene yakeye Sipilitu. Kuje kuyili Sipilitu ya Muene, kuakala kuvutuka. ¹⁸ Ngeci tuvavoshe, namaluholo a ku fukula, tumona vumpahu vua Muene. Etu vatuhimpula mu vumpahu vua kulifua kutunda mu vumpahu vumo tuye muvumpahu vukuavo, ngeci movua tunda kuli Muene, uje vene yakeye Sipilitu