¹ Mbunga yaIsraeli ayiruwana ovyo vyakaliro vyavidona mushikenga mantjo gha Karunga, ano nko kuvatapa mumaghoko ghavaMidiyani mumwaka ntambiri. ² Munkondo da vaMidiyani avahepeke vaIsraeli. Mukonda yavaMidiyani, mbunga yavaIsraeli avakarughana tundjugho twavavene kumakwina gha mumandundu, mumawe, nakumavango gha nkondo. ³ Vino kavishorokanga ngoweyo kehe ghano maruvede kavakunanga vaIsraeli mbuto yavo, vaMidiyani na vaAmaleki na vantu vakutunda kughupumeyuva kavayanga nakuyahomona vaIsraeli. ⁴ Vavo kuya navakavita vavo kuyavatura mumafuva nakuyadjonaura mbuto, ndjira nayintje yakuyenga kuGaza. Nakuvashuva vaIsraeli vahana ndya, nampiri ndjwi vahana ngombe vahana vidongi. ⁵ Ntjene tupu vavo navimuna vyavo na tende avaya po, kuya yira shimbonde, ano nakuvhurashi kuvara vikareshi vantu ndipo ngamero davo. Vavo kuyabombera shirongo mukushihanaura. ⁶ VaMidiyani avapilita nkondo vaIsraeli makura mbunga yimwe yavaIsraeli ayiyapo mukutakumina kwaKarunga. ⁷ Mbunga yavaIsraeli opo yatakuminine kwaKarunga mukonda yavaMidiyani, ⁸ Karunga nko kutuma mupumbi kumbunga yaIsraeli. Mupumbi avatantere, ''Ovino mbyo anaghamba Hompa, Karunga wavaIsraeli, vina kughambo: 'Namughupa kutundilira muEgipute, namughupa mundjugho yaupika. ⁹ Ame kwamuyoghora mumaghoko ghavaEgipute na mumaghoko ghanavantje ovo vamuhepekango. Ame navatjidamo kumeho yenu, nakumupa shirongo shavo. ¹⁰ Animutantere, ''Ame Hompa Karunga wenu, namuraghulire mukudira kutongamena vaKarunga vavaAmori, vamushirongo osho munatungu.'' Ngoli nwe kapi mwalimburukwa kuliywi lyande.''' ¹¹ Makura muEngeli waKarunga aya nakuyashungira munda yaUnyandi muOfura, wakaliro wa Jowashi (muAbiyezi), ghuye Gidiyoni, mona-rume wa Jowashi kuna kushwaya rukokotwa parupare, mushikameno vinyu - mukuruhoreka kuvaMidiyani. ¹² MuEngeli waKarunga amumonekere nakumutantera, ''Karunga papoye anakara, ove lipenda lyankondo!'' ¹³ Gidiyoni amutantere, ''Ani, muhona wande, ntjeneshi Karunga natwe anakara, morwa nke ngoli vinakutushorokera navintjeya vino? kuninko vitetu navintje ovyo aruwanine kuvashetu ovyo vatutantera, ntjene avaghamba, 'Nani kapi Karunga atughupiro muEgipute?' Ngoli pano Karunga antushuviliri nakututapa mumaghoko ghavaMidiyani.'' ¹⁴ Hompa amukenge na kughamba kukwendi, ''Yenda munkondo odo una kara nado kare. Kayoghore vaIsraeli mumaghoko gha vaMidiyani. Nani kapi nakutumu?'' ¹⁵ Gidiyoni aghamba kukwendi, ''Nakanderere, Karunga, weni mo nikayoghora Israeli? Mona, lira lyande ndyo lyadiro nkondo muManase, ntani nka me ne ame napiro mulyo mulipata lya vavava.'' ¹⁶ Hompa aghamba, ''Ame nganikara nove, ano ove ngaghufunda vakavita navantje vaMidiyani yira mukufumu umwe.'' ¹⁷ Gidiyoni amutantere, ''Ntjeneshi unamfere nkenda, ano mpeko shineghedo shimwe ashi ove ogho naghamba naye. ¹⁸ Nakanderere washatundapo pa, dogoro nikaye koye nakukayita vitapa vyande mukuyavitura kumeho yoye.'' Hompa aghamba, ''Kunikutaterera nange ghukavyuke.'' ¹⁹ Gidiyoni ayendi nakukawapayika shimpendje shashanuke naghutura wakuncenta wamushimetito ghutura aruwana mboroto yakupira mushashu. Atura nyama mushipaghu-paghu, ano ano muhoka aghutura mukacana nakuvimuyitira munda yashitondo shaUnyandi, nakuvimutulira. ²⁰ MuEngeli waKarunga amutantere, ''Ghupa nyama namboroto yakudira mushashu ghuviture paliwe lino, ano ghuteterepo muhoka.'' Ovyo mbyo arughanine Gidiyoni. ²¹ Makura muengeli waHompa ahonyonona lighoko lyendi omo yakalire mpango nandungu yako. Mukuguma nyama na mboroto yakudira mushashu, mundiro aghutundu muliwe nakurungwedeka nyama na mboroto. Makura muengeli wa Hompa atundupo ano Gidiyoni kapi amukengire nka kutunda po. ²² Gidiyoni aviyivire ashi oghuno muengeli wa Karunga. Gidiyoni aghamba, ''Aha, Hompa Karunga! Ame nakenge muengeli waKarunga Shipara nashipara!'' ²³ Karunga amutantere, ''Mpora yikare poye! Washatjira, kapi ufa.'' ²⁴ Makura Gidiyoni adiki shidjambero mpopo shaKarunga. Ashiruku, ''Karunga ndje mpora.'' Nelino liyuva shimpe nda shakarera paOfura mulira lya vaAbiyezere. ²⁵ Ngurova oyo Karunga amutantere, ''Ghupa ntwedu yavasho na ntwedu yauviri oyo yinakaro namwaka ntambiri, ano ghubamaure shidjambero sha Bala osho shahameno kuvasho, kumwe nakutavaghura Ashera oyo yakaro pepi. ²⁶ Dika shidjambero kwaHompa Karunga ghoye pandungu yandundu, nakushidika nawa. Djamba ntwedu yauviri mundjambo momo vyashwa kundjambo yakushwakerera, makuruwanita vikuni vyalifano lya Ashera oyo una tavaura.'' ²⁷ Makura Gidiyoni aghupu vakareli vendi murongo nakuruwana ovyo amutantilire Karunga. Ngoli mukonda atjilire unene lipata lyavashe na vantu ovo vakaliromo muduropa mukuviruwana mwi, aviruwana matiku. ²⁸ Ngurangura opo varambaukire vantu vamudoropa, shidjambero sha Bala vanashiyungurura, nalifano lya Ashera olyo lyakaliro pepi nasho vanashitavaghura, ano ntwedu yauviri vanayidjamba pashidjambero osho vanaruwana. ²⁹ Vantu vamushitata avakutantere tantere, ''Are anaviruwano vino?'' Opo vaghambawire navaunyavo nakushana lilimbururo, avaghamba, ''Gidiyoni mona-rume wa Jowashi ndje anaviruwano vino vininke.'' ³⁰ Makura vantu vamudoropa avatantere Jowashi, ''Yita monoye wamukafumu makura tuyamudipaghe, mukondashi anayungurura shidjambero sha Bala, na nakutaura lifano lya Ashera lya pepi nasho.'' ³¹ Jowashi atantere navantje ovo vakaliro pendi, ''Kuvhura murwerepo Bala? Kuvhura mumupopere? Kehe uno anakumurwero, vamudipaghe oku shimpe ngurangura. Ntjeneshi Bala ndje Karunga, mushuvenu akupopere mwene morwa muntu ogho anayungururo shidjambero shendi.'' ³² Makura kutunda liyuva olyo Gidiyoni avamuruku ''Jeruba-bala'' mukonda kwaghambire , ''Shuvenu Bala akuvatere mwene kwamuntu ogho,'' mukondashi Gidiyoni kwayungulire shidjambero sha Bala. ³³ Makura vaMidiyani navantje, vaAmaleki, na vantu vakuupumeyuva avapongo pamwe. Avarutu Jorodani nakuyatomeka tende mumuramba wa Jezereli. ³⁴ Ngoli mpepo yaKarunga ayiya paGidiyoni. Gidiyoni afudu rumbendo, mukuyiyira valira lya Abiyezera, makura makura avamukwama nankondo. ³⁵ Atumu vanambudi kuvaManase navantje, navo nka, avayiyiri mukumukwama. Atumu munambudi kuvaAshera, vaZebuluni, naNafutali, nakuyenda vakakugwanekere. ³⁶ Gidiyoni atantere Karunga, ''Ntjeneshi ame unakuruwanita mukuyoghora Israeli, yira momo unatanta - ³⁷ Kenga, ame kuna kutura huki dandjwi parupare. Ntjene likare lime pahuki pentjapo, ano ngoli palivhu pakukute, ntani niyiva ashi ame unakuruwanita mukuyoghora vaIsraeli, yira momo unavighamba.'' ³⁸ Ovino mo vyashorokire - Gidiyoni arumbuka ngurangura yayinene yakukwamako, akama huki nadintje, nakukama lime kuhuki, mema mangi agha yuda shisha shakudama. ³⁹ Makura Gidiyoni atantere Karunga, ''Washa ngarapera, nashana kughamba rumwe nka. Nakanderere mpulitire nka mushisheteko shimwe nka mukuruwanita huki da ndjwi. Oruno ruvede renka huki dikukute, ano renka likareko lime palivhu nalintje olyo shinaka.'' ⁴⁰ Karunga aruwana ovyo amupulire mumatiku ogho. Huki kwakalire dina kukuta, ano livhu nalintje lime kwakalirepo opo.