¹ Yenu weno, anwe vangagho, lirenu mukeme mukonda ya maghudito oghoana kuyo kukwenu. ² Ungagho wenu waghora, vidwata vyenu vya likana kuva mpuku. ³ Gorodo yenu na siliveli yenu yina kara na nkarawe, nkarawe nayo ngayitapa udjoni kukwenu. Yayo ngayi lyapo murutu ghenu yira momu wa wa vekanga mundiro. Anwe kwaku pongayikira limona lya kughuhura wa udjuni. ⁴ Monenu mfuto yavarughani mumafuva ghenu oyo mwahoreka kuna kumulilira. Nkugho yavaruwani mumafuva ghenu yina katika mumatwi gha Hompa wa mbunga dava kavita . ⁵ Anwe kwa tunga muruviya rwapa ntunda ya livhu na kuparuka nawa. Mbyo mwarera dimutjima denu ditaterere liyuvha olyo ngamufa. ⁶ Anwe kwa pangura mbyo mwa dipagha va hungami. Ano ghuye kapi adimuvyuka. ⁷ Karenu na lididimiko, vaghunyande, dogoro nkoko ngaka yera Hompa. Kengenu va ndimi omo vatateranga muyangu wa uwa vantani ghuye kwa Karunga na lididimiko dogoro nga wane mvhura ya kuhova nayi ya kuhulilira. ⁸ Nanwe nka, karenu na lididimiko. Kwatenu dimutjima mukonda ashi shirugho sha Karunga pepi shina kara. ⁹ Vaghunyande mwa shakupa maghundjoni naghumwenu, manashi ngava kamupangura. Kenga, mupanguli ogho ana yimano palivero. ¹⁰ Vaghunyande ghupenu shihonena dha ruhepo na lididimiko lyava porofete ovo kava ghambanga mulidina lya Hompa. ¹¹ Monenu, vakudidimika vana lirago. Mwa yuvha lididimiko lya Joba, ntani mwa yiva virughana vya Hompa, ghuye muna mbili na mufe nkenda. ¹² Vaghunyande, shashinenepo ntjoshino, na kuvhurashi mughane, muliwiru ndipo palivhu na kehe ghuno mughano. Nane, kughamba tupu ''Nhii'' ntjene ashi mo ntani ''Hawe'' ntjene ashi kapishimo ngamu kapire kukara mumpanguro. ¹³ Nangeshi ghumwe mumwenu ana kara muruhepo? Ghuye akanderere, Ano ogho ana karo na ruhafo? Ghuye ayimbe ntjumo da kupanda. ¹⁴ Ntjene ghumwe mukatji kenu kuna kuvera? Kuyita vakurona va mbunga Kriste vaya mukanderere. Vavo vamuwaveke na maghadi mulidina lya Hompa. ¹⁵ Ndapero ya lipuro ku verura muntu wa kuvera, Hompa avhure kumuverura. Ntjene atura ndjo, Karunga kudi mughupirapo. ¹⁶ Tongonona ndjo doye kwa ghumwe na ghu nyoye ntani mukukanderera ghumwe na ghunyendi mposhi muwane liveruko. Ndapero ya vantu vava hungami ya kara na nkondo unene ntani shimpe kuna kurughana. ¹⁷ Eliya kwa kalire muntu wa kufana yira atwe. Ghuye kwa rapelire unene ashi mvhura kapishi ngayiroke, ushili mvhura kapi ya rokire ure wa mwaka ntantu na makwedi hambo ghumwe. ¹⁸ Makura Eliya ayaraperere nka shimpe waro. Makura liwiru alitapa mvhura , livhu litape muyangu wa ndya. ¹⁹ Vaghunyande, ntjene umwe mukatji kenu atunde ku ushili, umwe wa mukatji kenu ayende aka muvyute, ²⁰ ogho muntu ayive ashi kehe uno waku ghupa mundjoni mundjira ya lipuko monyo wendi ana popere ku mfa ntani kufikilira ndjo da dingi unene.