¹ Josefa nko kurawira lirenga lyamumundi wendi, nakughamba ashi, ''Tura ndya muntjako davakafumu, kutwara momo muntjako vana shimbi, nakuturamo vimaliva vyakehe uno muntjako damuyashamena. ² Tura nkinda yande, nkinda yande yashi siliveri, muntjako yamu yashameno yaghunya wamwanukepo, navimaliva vyendi mumahangu ghendi.'' Lirenga nko kukavirughana yira moomu amu rawilire Josefa. ³ murughundja, ano vakafumu nko kuva tuma vayende, navo navidongi vyavo. ⁴ Tupu varupukire shitata mara kapishi ure unene, Josefa nko kutantera lirenga lyendi, ''Shapuka, uva kwame vakafumu vanya, ano opo ghukavawana, kaghambeshi, ''Nke muna pirwili uwa kuudona? ⁵ Oyo nani kapishi ndjo nkinda anwitanga Hompa, na nkinda a rughanitanga mukupumbwa?mu ruwana udona, kovino vininke muna ruwana.'' ⁶ Lirenga nko kuvaghupa nakughamba nkango dinya kukwavo. ⁷ Vavo nko kumutanterashi, ''Morwa nke Hompa ana kughambera nkango do? vyakukara weno vapika voye mbo vakuvura kuvirughana vino vininke. ⁸ Kenga, maliva twa wanine muntjako detu da muyashamena, twakaghavyutire ghatunde kushirongo shaKanana. Ndi siliveri nangorodo da Hompa ndo tuvaka ndi? ⁹ Kehe uno mupika ghoye uvi wanena, mudipaghe,ntani nka twe ngatukara vapika kwaHompa.'' ¹⁰ Lirenga nko kughamba, ''Weno vishoroke yira momo una vighamba. Kehe uno niwanena nkinda ngakara mupika wande, ano vaunyendi kapi viva kundama.'' ¹¹ Makura kehe mukafumu a kwangulita, nakudumpwita ntjako yendi palivhu, kehe mukafumu a shutura kuntjako yendi. ¹² Lirenga nko kutameka kukenga mumantjako. Kwatamekelire mwamukurona nakuya matira mwa mwanuke ano nkinda nko kuyayiwana mwaBenjamini. ¹³ Makura nko kutavaura vikoverero vyavo. Kehe mukafumu nko kurongera shidongi shendi vavyuke kunkurumbara. ¹⁴ Juda navaghuni vendi nko kuya kundjugho yaJosefa.Ghuye shimpe mpwali nkoko, ano nko kuya nyongamena mulivhu kumeho yendi. ¹⁵ Josefa nko kuvatanterashi, ''Vinke vino muna rughana? kapi mwaviyiva ashi mukafumu yira me kwato vyakumpuka ovyo vyahoramo?'' ¹⁶ Juda nko kughamba, ''Nke tughamba kwaHompa? ndi weni omo tuku popera naumwetu? Karunga ana wana undjoni muvapika voye. Kengenu, atwe vapika vaHompa, natuvantje nogho vana wanene nkinda mulighoko.'' ¹⁷ Josefa a ghamba ashi, ''Ghure name vyo nakuvirughanashi vyo me. Mukafumu ogho vana wanene nkinda mulighoko, ogho muntu ndje a karo mupika wande, ano ngoli anwe vakuhupako, yendenu mukanduke pampora kwashenu.'' ¹⁸ Makura Juda nko kuya pepi naye nakughamba ashi, ''Hompa wande, nakanderere pulidira mupika ghoye a ghambe nganko mulitwi lyaHompa, ano washa pulitira ugara ghutwe kwamupika waye, ove muntu wamuhunga yira Pharao. ¹⁹ Hompa wande apura vapika vendi ashi, ''Mwakara nashenu ndipo muunyenu wamukafumu?'' ²⁰ Atu mulimburura Hompa, ''Twakara nashetu, wakukurupa, ntani namuunyetu wamwanuke ogho vawana muukurupe wavo. Ano ngoli muunyendi adohoroka, ngoli pantjendi ana hupopo palira lya vawina, ano vashe vamuhora. ²¹ Makura a ghumba kuvapika voye ashi, ''Kamuyitenu kunu kwande niya mumone.'' ²² Kutunda opo, atu ghamba kwaHompa atwe, ''Mumati kapi aka pura kushuva vashe. Mukondashi nange ngashuva vashe, vashe ngava dohoroka.'' ²³ Makura a mughamba kuvapika venu ashi, ''Nkwandi muunyetu wamukafumu ngatu kaghurumuka, ngatudire kumona shipara shanu nka.'' ²⁴ Apa rwa tikiremo ruvede nka rwakukanduka kwamupika ghoye shetu, mpo twa kamutantilire nkango yakutunda kwaHompa. ²⁵ Shetu nko kughambashi, ''Yendenu muvyukireko, mukangulire ndya.'' ²⁶ Atwe nko kughamba, ''Kapi tuyenda tughurumuke. Ntjeneshi muunyetu wamukafumu una kara, ano ndi kutu yenda tughurumuke, atwe ndi kapi vikaturenkita tuka mone shipara shounya mukafumu. ²⁷ Mupika ghoye shutu atutantelire ashi, ''Mwayivashi mukamali wande kwandjitira vana vaviri tupu. ²⁸ Umwe atundako kwande ano ani aghamba, ''Vyaushiri andembauka muma ruha, nakumumo kapi namu mona nka.'' ²⁹ Weno ntjene mughupa nka noghuno kukwade, ano shiponga shimuwane, ngamu horeka me naukurupe wande wamvhii muruguvo rwaruhepo.'' ³⁰ Weno, mbyovyoshi, opo nikatika kwamupika ghoye shetu, ano kamati kamuwato pato petu, lyalyo liparu lya shetu kwahuguvalita muliparu lya mumati, ³¹ mukuvyuka ngoli, pakukakenga mumati kapi ana vyuka natwe, ngaka fa. Mupika ghoye ndi ngatukamuhoreka naukurupe wendi wahuki damvhii mupika ghoye shetu naruguvo rwa ruhepo. ³² Mupika ghoye ndje ana pingiromo mulivango lya shetu kuhamena mumati nakughamba ashi, ''Ntjeneshi kapi ngani kamuyita kukoye, ano ame ngani shimbe ndjo kuvavava dogoro naruntje,'' ³³ Ngoli pano, nakanderere pulidira mupika ghoye akare muku pinganena mwamumati mukukara mupika kwaHompa, ano mushuve mumati akanduke navakuru vendi. ³⁴ Weni mo nikanduka niyende kwavavava nangeshi mumati kapi ana kara name? nakutjira mukukakenga udona ogho ngaukayo pavavava.