¹ Weno Josefu anaya dimburura ashi nani ndya mo muEgipute. A ghamba kuvana vendi vavakafumu ashi, ''Vinke muna kuku kenga kenga?'' ² A ghamba ashi, ''Kengenu kuno, ame nayuvu ashi ndya mo muEgipute. Yendenu mughurumuke kunya mukatughilireko ndya kunya mposhi tuya pare ano kapishi tu fe.'' ³ Vakuru vaJosefa murongo ava yendi vaurumuke vakaghure ndya muEgipute. ⁴ Ano ngoli Jakopo kapia tumine Benjameni, muunya Josefa, na vakuru vendi, a ghamba ashi, ''Natjira shiponga kuvura shiye kwendi.'' ⁵ Vana vaIsraeli ava yendi vakaghure novo vayendiroko, mukondashi rukukutu rwakaliro mo mu Kanana. ⁶ Ghuye Josefa mupangeli washirongo. Ghuye ndje wakughulita kuvantu nantje vamushirongo. Vakuru vaJosefa avaya vaya kukwambere kukwendi nakunyongeka vipara vyavo mulivhu. ⁷ Josefa a mono vakuru vendi nakuvadimburura, makura ghuye a kughupuko kukwavo nakughamba nkango dadidona navo. A ghamba kukwavo, ''Kuni muna kutundilira?'' ava limburura ashi, ''Kushirongo shaKanana tuya ure ndya.'' ⁸ Josefa a dimbulire vakuru vendi, mara vavo kapi vamudimbulire ghuye. ⁹ Makura Josefa a vuruka ndjodi dendi odo karotire da kuhamena kukwavo, anwe vandadi! Kunaya muya kenge kuruha rwa shirongo oko kwa diro mpangera yashirongo.'' ¹⁰ Ava mulimburura, ''Hawe, Hompa wetu. Vantu voye kuna ya vaya ghure ndya. ¹¹ Atwe natuvantje vana vamukafumu umwe. Atwe vakafumu vaushiri. Vantu voye twe kapishi vandadi.'' ¹² A ghamba kukwavo, ''Hawe, kunaya muya kenge ruha vyashirongo oko kwadirango mpangera yashirongo.'' ¹³ Ava mulimburura, ''Atwe vapika voye tuva murongo navaviri twakaro vana vamukafumu umwe mushirongo shaKanana. Kenga, wamwanuke ana kara na vavava namutji ntani muunyetu umwe a dohoroka.'' ¹⁴ Josefa a ghamba kukwavo, ''Ameshi mbyo namutantere, muvandadi nwe.'' ¹⁵ Apa ngoli mpo vamu kona konanera. Muliparu lyaPharao, kapi ngamu tunda mo muno, nkwandi muunyenu wamwanuke ngaye kuno. ¹⁶ Tumenuko unyenu umwe mukatji kenu ogho ayendo aka shimbe muunyenu. Kumungena mudorongo mposhi nkango denu vadi kona kone, ntjeneshi ushili mo mumwenu. vyashiri muliparu lya Pharao, vyashiri anwe vandadi.'' ¹⁷ Ava ngeneke navantje mudorongo mayuva matatu. ¹⁸ josefa a ghamba navo muliyuva lyautatu, ''Ruwanenu vino makura mupare, mukondashi me natjira Karunga. ¹⁹ Ntjeneshi muvakafumu vaushiri, renkenu mo umwe wenu akare mo mudorongo omo vana kumu kungira, anwe vakuhupako muyende, mutware ndya ndjara mumapata ghenu. ²⁰ Mukayite muunyenu wamwanuke kwande ntani ngatuya dikengurura denu ashi vyashiri ndi ntani ngamu dira kufa.''Navo mo vavirughanine ngoli. ²¹ Ava kutantere naumwavo ashi, ''Atwe vyaushiri tuna vipura kuna kutuhepeka mbyevi twarughanine muunyetu morwa twa monine opo akombanitire mwenyo wendi opo arombire livatero kukwetu atwe kapi twamuvatilire. Mbyo ngoli ghuna kuyera uno udito kukwetu natuvantje.'' ²² Reubeni mpo ava limburulire ashi, ''Nani kapi navimutantilire nwe , 'Kapishi muture ndjo kogho mumati,' Anwe kapi mwayuvire? Weno kengenu ngoli honde yendi kuna kuyi tutondora natuvantje.'' ²³ Vavo kapi vaviyivire ashi Josefa kuna kuva yuva, mbyevi pakalire mutoroki pakatji kavo. ²⁴ A piruka atungwireko mughongo a lili. Makura ava pirukiri nka a ghamba navo. A ghupu Simeoni mukatji kavo makura amu mangere kumeho yavo. ²⁵ Makura Josefa a rawiri vashitata shendi vayude ntjako davakuru vendi ndya, nakuvyutira-vyutira mo maliva ghavo muntjako davo, nakuvapa nkuta da muruyendo. Mo vavi varughaninine. ²⁶ Vakuru vendi mpo varondikire ndya davo pa vidongi vyavo makura ava tundu palivango olyo vakayende. ²⁷ Ano ghumwe papavo amangununa muntjako yendi aghupu ndya ape shidongi shendi palivango lya kupwiyukira, amono maliva ghendi,. Muntjako yendi oyo a mangunine. ²⁸ A tantere vakuru vendi, ''Maliva ghande vana kagha vyuta. Kengenu, vyavyo ne vino muntjako yande.'' Makura dimutjima davo a didompo ava piruka vana guvu vakukenge kenge naumwavo, ava ghamba ashi, ''Vinke nani evi ana rughana Karunga kukwetu?'' ²⁹ Ava yendi kwaJakopo, shavo wa mushirongo shaKanana makura ava mutimwitira navintje ovyo vyakashorokiro. Ava ghamba, ³⁰ ''Mukafumu, Hompa washirongo a ghamba naugara kukwetu nakutughayarera ashi twe vandadi va mushirongo. ³¹ Atumutantere, 'Atwe vakafumu vaghushiri. Kapishi tuvandadi. ³² Tuvamurongo navaviri twakaro, vana vamukafumu ghumwe tupu. Ghuno umwe apirapo, ntani wamwanukepo tuna mushuvu navavava ana kara mushirongo shinya shaKanana.' ³³ Makura mukafumu, Hompa washirongo, atutantere ashi, ''Pavino mpo nganiviyivira ashi anwe vakafumu vaushiri. Shuvenupo umwe muukuru wenu a kare name, ghupenu ndya mutware kumapata ghenu ndjara, yendenu. ³⁴ Kayitenu muunyenu wamwanuke kwande. Nganiya yiveshi nwe kapishi vandadi, ntjene ashi nwe muvakafumu vaushili. Ntani nganiya mangurura ghunyenu kukwenu, ntani ngamuya rughana una ngeshefa mushirongo shino.'' ³⁵ Kwayire yira muntjako davo mwato vintu, nani kehe muno muntjako davo kwakaliremo maliva mwakehe uno. Opo vamonine navo nashavo maliva muntjako davo vyava yitilire utjirwe. ³⁶ Jakopo shavo mpo ngoli ava tantelire ashi, ''Muna shana nikombanite vana vande navantje. Josefa apirapo, Simeoni a yenda, makura muna horo nka mughupe Benjameni mutware. Navintje vino vininke kwande tupu vina tamba.'' ³⁷ Reubeni a tantere vashe, nakughamba ashi, ''Ngamudipaghe vano vana vande vaviri vava mati ntjeneshi kapi ngani kamuvyuta Benjameni kukwenu. Muturenu mumaghoko ghande, ngani kamuvyute kukwenu shimpe.'' ³⁸ Jakopo a ghamba ashi, ''Monande wamukafumu kapi nga yenda nanwe. Mbyevi mukurenu wamukafumu apirapo ntani pantjendi ana hupopo. Ntjene ngalimuyera lihudi mundjira omo ngamuyenda, makura ndi ngamundjitira mvhii naruguvo mulivango lino lyamundi.''