¹ Mosesa na vakurona avarawiri vantu na kughamba ashi, ''Tikitemuno dimuragho odo nimurawira namuntji. ² Muliyuva olyo ngamukavindakana Jorodani muyende mushirongo osho Hompa Karunga wenu ana kumupa, muna hepa kuturapo mawe gha manene na kughatura samente ya yikukutu kumwe na kughapeyinda. ³ Papo ngamutjangepo veta nadintje opo ngamukapitapo, mposhi ngamukayende mulivango olyo Hompa Karunga wenu ana kumupa, livango oko ana kupupa mashini na ushi, momo Hompa, Karunga wa vadimu venu amutwenyidira. ⁴ Kumeho ngamukarundakane mukuro wa Jorodani, ngamukaghuture po mawe ogho nakumurawira namuntji, pandundu ya Ebali, na kughatura samente ya yikukutu na kughapeyinda. ⁵ Okunya ngamukadike shidjambero kwa Hompa Karunga wenu, shidjambero sha mawe, ene ngoli kapishi ngamukaruwanite viruwanita vya shikugho mukudika liwe linya. ⁶ Muna hepa kudika shidjambero sha Hompa Karunga wenu na mawe gha kudira kuteta, muna hepa kudjamba ndjambo da kushora pa ndjambo kwa Hompa Karunga wenu, ⁷ ngamutapa ndjambo da ukwagho ntani ngamukalya mpopo, ngamuhafa kumeho ya Hompa Karunga. ⁸ Anwe ngamukatjanga pamawe gha nkango nadintje da dimuragho dino nawa nawa.'' ⁹ Mosesa na vapilisteli, vaLeviti, vaghambire na Israeli na kughamba, ''Mwenenu na kutegherere, vaIsraeli: namuntji anwe muna kara na nkondo da Hompa Karunga wenu. ¹⁰ Mposhi muna hepa kutikitamo liywi lya Hompa Karunga wenu ntani tikitenumo dimuragho dendi na marongo nakumupa namuntji.'' ¹¹ Mosesa arawiri vantu muliyuva ndyolinya na kughamba ashi, ¹² ''Ogho marudi ana hepa kuyimana pa ndundu ya Gerizimu vatungike vantu pakumana kuvindakana Jorodani: Simeyoni, Levi, Josefu, na Benyameni. ¹³ Vano vamrudi ghano vavo vayimane pa ndundu ya Ebali vafinge: Reubeni, Gadi, Asheri, Zebuluni, Dani, ntani Nafutali. ¹⁴ VaLeviti ngavalimburura na kughamba ku vantu vaIsraeli navantje mumaywi gha kudameka: ¹⁵ Ghapwe kufinga wakuruwana navintje ndipo kuraperera vintjwantjwa, lishwaghu kwa Hompa, viruwana vya mumaghoko gha vakakushonga vintjwantjwa ntani vakuvitura mughumbembe.' Makura vantu navantje ngavalimburure na kughamba ashi, 'Amen.' ¹⁶ Ghapwe kufinga wakupira kufumadeka vashe ndi vawina. Makura vantu navantje vana hepa kughamba, 'Amen.' ¹⁷ Ghapwe kufinga wakutura murudi na maparambo ghendi. Makura vantu navantje vana hepa kughamba, 'Amen.' ¹⁸ 'Ghapwe kufinga ogho aneghedango vitwiku viyende mundjira da mapuko.'makura vantu vana hepa kughamba, 'Amen.' ¹⁹ 'Ghapwe kufinga ogho apirango kutapa mpora mughuhunga ku vantundwa virongo mukondashi vavo vantudwa virongo, vapira vasha ndipo vafita vavya.' Makura vantu navantje vana hepa kughamba, 'Amen.' ²⁰ 'Ghapwe kufinga wa kurara na vawina, mukondashi ghuye ana ghupu mpangera da vashe.' Makura vantu navantje vana hepa kughamba, 'Amen.' ²¹ 'Ghapwe kufinga muntu wa kukara panyama na likashama.' Makura vantu navantje vana hepa kughamba, ''Amen. ²² 'Ghapwe kufinga wa kurara kumwe na mughunyendi wa mukamali, mona kadona wa vashe, ndipo mona kadona wa vawina.' Makura vantu navantje vana hepa kughamba, 'Amen.' ²³ 'Ghapwe kufinga wakukara panyama kumwe na ngumweyi yendi.' Makura vantu navantje vana hepa kughamba, 'Ameni.' ²⁴ 'Ghapwe kufinga wa kudipagha mukamaparambo wendi mughumbembe.' Makura vantu navantje vana hepa kughamba, 'Amen.' ²⁵ 'Ghapwe kufinga wa kutambura mfuto akadipaghe muntu wa kupira undjoni.' Makura vantu navantje vana hepa kughamba, 'Amen.' ²⁶ 'Ghapwe kufinga ogho ashweno kutikitamo veta dino.' Makura vantu navantje vana hepa kughamba, 'Amen.'