¹ Sau wakatu gafa gayi da kunu ngumuri yahudaucin, lakwtu mi aci ju wǝnduwa gayi da ci masana, se akshi da pi da a lawan gǝri. ² Go tasina se ndan di ci ba ci fǝra vǝgi i kǝma gǝri. ³ Yeso da jayi nda zigi be ki kunu dumaya na perrrissaucin, "Dlam gara blan bi ndan ngaci nǝn gafa ngumuri, ko o,o?" ⁴ Amman da dlamnakshi shiru. Se Yeso da jǝba ci ndangaci na aci, da jimbilina aci. ⁵ Aci da ramikshi ma, "Nǝn tawank da kuna kun na wǝn gǝri ko tlagǝri wara vogu i kunu duwa gafa ngumuri da ramma aci aɗewu bai?" ⁶ Akshi dima kalaktǝci na rama bai i dak bi tuku. ⁷ Lakwtu Yeso ike ndawa mi nda daurau mbasu nakshi iɗa kwajerarin martapa, aci nda rama ma gagǝnawa da ramiukshi ma, ⁸ "In ɗagai make kun iri ngumuri zǝba nin, kwam mbasa iri mi na martapa bai, gaɗa na nǝn ɗagai mi wara nda dauraci na martapa ɗika kun. ⁹ Lakwtu mi ba ci daurayakun gu zadǝn nin, arame kun ma, "A barina ri mbasakun i nǝnangu" se i kunu zhǝrau kwa tlayi i ri mbasu mi ngambutak. ¹⁰ Amman lakwtu nda maka kun nin, am mbasina i ri ngambutak gaɗa lakwtu ba ci daura kun dǝnin, aci arame ci ma, 'Manga a tlu i dǝsku tiu.' Da sǝnu nda bar di ci martapa i kǝma ndawa mak wara ndan mbasu aɗa taburgu. ¹¹ Gaɗa dik nǝn wara tsuktu aɗagǝri nin nda kalaktaina aci da kau kuru duk nǝn mi tsinuna aɗagǝri nda tsuktana aci. ¹² Zam Yeso da rami i nǝn wara daura aci ma, "Lakwtu a kamayi ndawa i ta masana aduwau ko i ngumuri, ka makina, mangaucin ci bai ko yaganaucin ci ko nda kun ko makabaucin ci ndak lǝman, ka ki mi akshi ke aye maka ci da kau, gaɗa ndan gumici tsǝrimgu. ¹³ Amman lakwtu kaye ngumuri nin a ɗauren ndak tliwa, ndak rida ɗokdaucin na dliguyaucin, ¹⁴ ka ye bi na barka, gaɗa akshi a ɗimu ngumu gu bai. Gaɗa da ye ngume ci gafa tlatli ndak adalta." ¹⁵ Lakwtu mi nǝn gayi wara dam mbasu na Yeso iɗa gayi kǝma jandau tunu da rami ci ma, "Barka i nǝn mi wara a ye ta borodi i kunu garava Sǝku!" ¹⁶ Amman Yeso da rami ci ma, Nǝn ɗagai saperatu masanak adauwau se da makai ndawa gawa. ¹⁷ Lakwtu nda saperatu masanau tunu, aci da wa'yni guzabcin gǝri ma da rami, 'ndau ma "ɗanai," gaɗa betawanke dlamingara.' ¹⁸ Ndau mak da jib bari kajikakshi, nǝn ki Sukur da ramma, 'Na masa patata, nan ciku nai nakai. A dlama ni kanadi.' ¹⁹ Nǝn gayi wam da ram ma, na maseci kwamin vaɗ, nan cu kuɗatakshi a dlam kǝmar. ²⁰ Zam nǝn gayi wam da ram ma, na zǝba na aama, gaɗa kasau na be nya bai. ²¹ Se guzabgu da nai da ramma jandau i ba ci wǝunduwa gǝri. Se baci wǝnduwaugǝri da bi na dlimiɗ gǝshi da rami i guzab gǝru ma, Aji vǝda iɗak tǝrbo kaɗe-kaɗe kanda nai iri tuku ndak tliwa na ndak rida, na tliguyaucin na ɗokdaucin.' ²² Guzuɓ gu daram ma, baci wǝnduwa be karamgu nda dlamdu, gusku ya ye na ri wam.' ²³ Se ba ci wǝnduwau darami guzub gu ma, A ji wam i vǝda iɗak tarbo na kororo a ɗawenakshi gaɗa wǝnduwa ga da dlapi ganiyak. ²⁴ Na rame ci, gǝtak da kunu nda tunu wara nda ji makaugu a be da linci masana ga bai. ²⁵ Se su algi gawa a tǝka rakan na aci, se aci da vutai da ramikshi ma, ²⁶ "In har nǝn da ri ga amman kur afǝk gǝri bai na mai gǝri, na kutli gǝri, gamsak na gamaɗ har aci na aro gǝri ben adǝmu dlama pakura ga bai. ²⁷ Duk nǝn tawanke dima ma dimtliga gǝri da dǝgai Iyu ben aɗimu dlama pakura ga bai. ²⁸ Tai da kuna kun, wara ntutu dlama lǝma tsusu dǝsku, mbasu da i kasapci be aci a tǝku iɗa wanau bai da zigi ko aci a dimuna damau? ²⁹ In ka sǝn bin, lakwtu aci ɓandu impikshi lǝmau nin ba damau bin ndawa i kan a jǝba ngarin tagǝri? ³⁰ A ramau ma, 'Nǝnnagu impa shi lǝma amman dima damau bai,' ³¹ Ko dǝgǝm tawan aye zha na dǝgǝm ɗagai, aye mbasu na askarabaucin gǝri dubu guma da maki shawar da ri ndak shawar gǝri bai in ba ci tlirigiri na askarabucin dubu gumu shirin? ³² In kasǝn bin lakwtu mi askarabaucin ba ci zha gǝri pedim nin a wayin ndawa bai gaɗa da maki dǝvo selpu. ³³ To gaɗa kasǝn duk nǝn bari be ni aci ba atu mak bin a dimu dlama pakuruga bai. ³⁴ Bǝza bǝlan, amman in bǝzau bukuna ɗininim nin garan, a dlamana na da bari chap-chap gara wam? ³⁵ A dlama go paida ko i gagai ko i rugzhe nda wayadu. Duk nǝn mi na aguɗ kǝrimta da kǝrimta."