¹ Lakwtuu ɗagai, Yeso a magita i ri ɗagai, se gayi da kun pukurraucingəri da ramici ma, "Məgənyi, a gugzhi ja dlama magita , kakə mi Yahai gugzi pukurraucingəri." ² Yeso da ramikshi ma, "Sartu mi kwa magita nin, a ramina ma, 'Baaba, dləgunci bik saksakta. Garva ci danna. ³ A barija bik taa, kə gafa tawanke. ⁴ Atupti diija aipapinja, kak mi ja tuptau i nən tawanke mi dlamija bike. Kaiva ja ja vəgi kun jarrapta bai." ⁵ Se Yeso da dlamikshi ramatku, "Tai da kunakun na manga, se dayi rigəri i kun dəviɗ da ramici ma, 'Manga a baraa dəvga burrodi kwan, ⁶ gaɗa manga ganai deu gususku jaɓ da dəvu buwa, iyu kuwa na bee na bari ci da ci bai.' ⁷ Daa warrau ngumici da kun wənduwau ma, 'Ka ravəna iyu bai, na cimna miya mavgi ga sərram. So iyu na mamuga gwiɗ, ja vədunaja, na dəmu tlayi na barici bee bai nin wam.' ⁸ A kəmina, warrau a dəmu da kurna tlayi da barici burrodu koda aci mangari yaye, amman ko gaɗa mangagəru dlam zhiru jaya gəri aɗau-aɗau bitənu, aci a tlayi da barici burrodu warra aca marradu gawa. ⁹ "To, zam na ramekun, a jayina nda bardikun, amakina kwa bidu, a gwagdlina nda rǝptadikun mavgu. ¹⁰ Tike mi jayu nin a gǝndu, nǝn maku ke a bidu, nǝn maku tawanke mi gwagdlun nda rǝbtadici mavgu. ¹¹ Afək tawan i kuna kun, wǝngǝri jayici vǝnakau nin da barici mbəkɗa i sərrəm vənakaugu? ¹² Ko aci jayu agwai nin, da bari ci wurrji? ¹³ To kun nda gǝshi gabshu ngun,kwa dumuna bari bee bǝlan i mamukun, balle Afək kun kə dəsku warra a barna Nenwa Seku i ndawa warra jayaci nin!" ¹⁴ Sarrtu ɗagai Yeso a təka di gaɓshu zuwak warra dlam na nən ɗagai muka . Lakwtu Yeso da na zuwak gu tənu, se warrau da ɓanji rama. Algi ndawa i a riwu da dlam ajap! ¹⁵ Amman ndau jəgab a ramau ma, "Ai a di zuwakgu na kərrmai Ba'alzabuba, dəgəm gaɓshu zuwawin" ¹⁶ Ndau jəgap kaktli Yeso, akshi makaci da dlamikshi bik ajap da dəsku. ¹⁷ Amman Yeso zəga na bee mi a gəshakshi tənu, se da ramikshi ma, "Garva tawanke mi ɓəru na aɗagra na gaba nin, a rəbgangara." ¹⁸ Ləspərr na nda aɗagəri a tləri i gatukshi nin, garva gəri rri'yi nana? Kwa təka ramau ma na di zuwawin na Ba'alzabuba. ¹⁹ Ramau kun gu jirre nin, wate na kərmai gaye nda ɗəga kun a di zuwakgu? Gaɗa kasən, akshi a dlaɓa nakshi ndak dlame kun shariya. ²⁰ Amman na di zuwawin na kərrmai Səku nin, to garva Kakasəku zadengare rici. ²¹ Nən baci awayau, baci karre zha ɗəmiyu na wənduwagəri nin, karregəri a dlaɓa gacirəptak. ²² Amman nən dama warra ɗəkadi awayau, ta na awayugəri nin, nən mi ɗəkadi awayugu a gumba na karre ragaɗa warrau, da ngwi na ngwi na bee aci na atu mak. ²³ Nən mi a ɗagayi na iyu bi nin, a təka gaba na iyu, nən warra a cacpau i ɗagayi na iyu binin ke a təka wayau. ²⁴ Sartu mi gaɓshu zuwak vəru da aɗagənən nin, a jəba wudadarr i fanfariya pata, a makak ri di mafiya. aAmman ba binin, a ramau ma, 'Na kacinga i wənduwa ganai, ri warra na vəreu.' ²⁵ Kata nin, tasa wənduwau da kasa, tamke da ɗalmagara cikas nin, ²⁶ aye nya da ngwai gaɓshu zuwawin gatkasa, warra ɗəka na aci i kəmengarr wam, makshi na aci danai da mbashi nakshi i kun warrau. Ngənpu warrau kə gususku a ɗeki na kə waci i gaɓshu." ²⁷ Yeso a kun rama bayangu tənu, se ama ɗagai da sukci wuragara i dəsku kə tike i kun algu, da ramma, "Barka i mai mi 'yawuci na anyi warra ka sau." ²⁸ Amman Yeso da ramma, "Ndawa mi a kərrəmta təlam Kakasku, ke a wana na atu nin, rəmadi barrka." ²⁹ Algu a təka səkuna tənu, se Yeso da ɓanji ramau ma, "Zaman təku zaman ndak kəlaɗo. A maka lawan gənawa da tatki ma na deu da ri Kakasəku, ko da go-gənawa mi ndaye tatketu se zada kə Yunusa. ³⁰ Atərro, kakə mi Yunusa dlaɓu gənawa i ndak Nniniba, kasən ke Wəngənən aye dlaɓa gənawa i zaman təku. ³¹ Ama warra a garva Sheba i aɗau aye rri'yi da dlam sharriya na ndak zaman təku, ke da kambeci na akshi. Atuu rro deu da ri pəɗən, gaɗa kərrəmci aasəm Sulemanu. Aikina, so ɗagai mi ɗəka na Sulemanu a ritku. ³² Ndak Neneba aye rri'yi sharia na ndak zaman təku, da hagaci du, gaɗa ndak Nenebau kəma wazək Yunusa da dlam tubi, aikina, so ɗagai warra ɗəka na Yunusa a ritku. ³³ Go nən mi a ɓədla pətəle da cimdu na fəna, ko da mpudu i dəɗa daɓərr amman a mpidi dəsku baya gaɗa ndawa təfi susugu nin daiki ɓədla tlaparr. ³⁴ Daa kun a mbasu pətəle. Daa kun bəlan nən, təka kun a dlaɓangara na ɓədla. Amman daa kun bəlan binin, təka mak a dlaɓangara aiwa tlaparr. ³⁵ To, a dlamina alkal pa! Gaɗa ɓelda warra a rikun da dlaɓa aiwa bai. ³⁶ Təka kun mak ganayak na ɓədla nin, ke go aiwakwina ko rrap nin, to təka kun mak a dlaɓa gara ka pətəle mi a bari ɓədla gara i aɗa kun." ³⁷ Lakwtu mi Yeso damu na rama tənu, se nəən parise ɗagai da ɗauraci i ta masana i wənduwa gəri, se Yeso da yi da mbashi i ri tau. ³⁸ Se nən parise gu da dlam ajap, ika Yeso vəyi aikwak gəri ba tənu. ³⁹ Amman Məgənyu da ramici ma, "Kun parrisauci kwa vəya aku gərgiyayin na gadakuwawin, amman kwakuna kun ganiyak na mbamba na kəlaɗo. ⁴⁰ Kun kakaɓaucin ndawa! Nən warra dlam wurzu, aci ne dlam kwakunu bai? ⁴¹ Abarina bee mi a kwakunu indak tluwa, tamke ke a cəltangara i kun. ⁴² Amman wadarre kun parrisaucin, gaɗa kwa bari zakka harr kə gangamin awai na karre dlugwan, amman kwa shalu na jirrewa na ntu Kakasəku bai. Dlaməngara dolle nda dlam adalta na ntu Kakasəku, amman a jəba dlama bee mi bəlalmin jəgab cam ke. ⁴³ Wadarre kun parrisaucin, gaɗa kulum kwancu nda bari kun ri mbasu martapa i kun ləma ri cacpa yahudaucin, ke kwancu nda jəb ndəma kun i patatatin asək. ⁴⁴ Wadarre kun, gaɗa kwa dlam nakun ka auɗaɗin mi go saida, warra ndiwa a takɗau go zəgaya." ⁴⁵ Se gayi da kun malamcin dumaya da wuri Yeso ma, "Maləm, bee warra ka ramu rro, nangu naja rro cam." ⁴⁶ Yeso da ramma, "Kun ke wadarre kun , malamcin dumaya! Gaɗa kwmpi karre dukshi, da kakəri da kerr, amman kun ko damtu karregu ngum kwa ni bai, balle kwa lənci ko na zhigwet kun gayi. ⁴⁷ Wadarre kun, gaɗa kwa ləmak bi tana i ɗak aɗaɗin nabaucin, amman rro rəbagshi nin kakancin kakacin kun. ⁴⁸ Kane kwa dlam nakun saida, wato kwa zəga na bee warra kakancin kakancin kun dlamu kenang, gaɗa jirre akshi rəbu nabaucin, warra kwa ləmu bik tana i aɗa auɗaɗinshi. ⁴⁹ Gaɗa dalil təku ke, Səku i kun asəm gəri ramma, 'Naye wanyekshi nabaucin na muwanaucin, ashi ke aye tatkeshi daraari bone da təki na jəgab.' ⁵⁰ Zaman təku dolle da mi alakə dədəm nabaucin mi nda pau mak, tin dlaɓa duniya, ⁵¹ da dədəm Habila i nye dədəm Zakariya mi nda təku i gadava bagadi na ri mi go aipu kə wənduwa Səku. Auwo na ramekun, zaman təku aye ma lakəgu. ⁵² Wadarre kun malamcin dumaya yahudaucin, gaɗa kwa ma na surram zəgaya, kun ke kwa təfu bai, kwa daptuna nda ntu təfa ke. ⁵³ Aku Yeso bəzu na wənduwa nən parrise gu, se malamcin taran, na parrisaucin da tashaci, da ɓanji nguptagəri tlaparr, a gamɗaya na aci i ɗa bee gawa. ⁵⁴ Akshi təka mpici kambudi jəba gəri i kun təlalmin gəri,