1
To ikun yǝwan tuku mi gawa, pakurraucin a tǝka sǝguna aɗau-aɗau tunu, se ngurgur da vǝrai da ri yahudaucin mi a kǝmu miyak helinaucin iɗak ibraniyaucin, gaɗa a ankalta na gudugwamcin shi bai, lakwtu ɓera masana gafa tawanke.
2
Mawanaucin gu daure i cacpa pakuraucin da ramma, "Dlam kalkal bai ja jaivi na tǝlam Kakasǝku gaɗa bari masana.
3
Gaɗa kasǝn, a cikɗina ndawa gatkasa da witakun, ndawa mi na hal bǝlan mi ganeyak na nǝnwa Sǝku, na zǝgaya mi wamǝpkshi i ɗak wana tuku.
4
Amman ja nǝn, fatawanke ja ta kǝma na magita i ri wana tǝlam Kakasǝku."
5
Ndau da kǝmi na karak ramakshu. Se akshi da cikdi Istifanus, nǝn mi na iman da niya na Nǝnwa Sǝku, zam na Filibus, na Burokoras, na Nikanar, na Timan, na Barrminas, na Nikolass nǝn Antakiya mi waci a dǝga aɗa yahudaucin.
6
Ndak iman na Yeso gu, da ni na akshi i kǝma mawanaucin gu, da dlamikshi magita, nda mpǝkshi aikok i aɗak.
7
Da sǝn, se tǝlam Kakasǝku da jǝb sǝkuna gawa pakuraucin ke da sǝkuni ga ra tlaparr i kun Urshalima nak kada bai. Zam Piristaucin gawa ke da barna jire.
8
Lakwtu Istifanus ganiyak na herr, a dlamak bǝk ajap tlaparr i wita ndawa.
9
Amman ndawa dagai ke lemak ri cacpa yahudaucin mi nda ɗaurau ma ri cacpa ndawa mi bana aɗa; wato kuraniyaucin na iskandariyaucin, na nɗau dagai ke lardi kilikiya na Asiya, da tltli gamɗaya na Istifanus.
10
Amman akshi dǝmabai da dlam gaba na asǝn, na kǝrmai mi Istifanus a rama na atu.
11
Se akshi da shikshikci ndawa dagai dan da ramma, "Ja kǝma Istifanus dlamu rama kalkal bai i ɗak nabi Musa na Kakasǝku."
12
Se da shikshikci ndawa gasgaraucin na malamcin dumaya, se akshi dar'i kǝma Istifanus, da jǝbci, danna a ci kǝma majakis.
13
Akshi danna ndak bari saida ke papeya, da ramma, "Warrangu bezu rama aibu bai i dak dumaya na retku mi go aibu.
14
Gaɗa ja kǝmaci ramu ma, Yeso ke nazarat tǝku, a rabga na rǝtku, da miscina aɗadin mi warra nabi Musa bǝziwa."
15
Tike mi dan mbasu i kun majalis gu da pici ɗa, se daiki jampel gǝri kaki jampel kǝ malaika kakasǝku