¹ بعدِش یَ عده اِز فریسیاوعلما دینی اورشلیم اِوین تی عیسی،وِش گُون، ² سیچه شاگردا تو رسم ورسوم گََفترونِن اینِن زیرپا،چونکه اونو دستاشونِن قبل اِز غذا خَردن نیشورِن؟ ³ هوهم گو ایشا سیچه یس رسم ورسوم خوتون حکم خُدان زیرپا اینین؟ ⁴ چونکه خدا ایگووِپدرومادر خوت احترام بنه،وُ هرکی وُپدرومادر خوش ناسِزا بُگو وا کُشته ووه. ⁵ اماایشا ایگُوین هرکی وِ پدرومادرش بُگو هرکمکی که مو ایترُم بُکُنوم وقف خُدایه، ⁶ ایطورُنی دیه سی هو واجب نی وِ بُوش احترام بِنه ،ایطورونی سی رسم ورُسومتون حکم خدان باطل ایکُنین. ⁷ ای ریاکاران،اِشعیاچقدقشنگ دربارهء ایشا پیشگویی کِرد که گو، ⁸ ای قومو وا لُواشون وِمو احترام اینین،اما دِلاشون اِزمو دیره. ⁹ اونو مون عبادت ایکُونِن اما درساشون غیرازافکار انسانی هیچی نیست. ¹⁰ اوسومردمِن تی خوش جمع کردوُگُو گوش بین وبفهمین؛ ¹¹ هرچی که اینین مین دونِتون ایشان نِجست نیکُونه ، هرچی که اِزدونتون ایاهه وِدر،هو آدمِن نِجسن ایکونه. ¹² اوسو شاگِرداش اِویِن،وِش گُون،آیا ایدونی ای حرفا تو سی فریسیا ناپِسنده؟ ¹³ عیسی جُواودا هَر بُوته ای که پدر آسمونی مو نکاشته بوه،ریشه کن ایبو. ¹⁴ گو اونون وِ حال خوشون بِنین،ای کُورا راهنوما کورییَلِن،هَرسا کوری عصا کِش کوری دی ایبو هاردو ایبوفتن مین چَه. ¹⁵ پطرُس گُو ای مَثَلون سی ایما بُگو. ¹⁶ عیسی جواو دا،آیا ایشا هم هَنی نیفَهمین؟ ¹⁷ آیا ایشا نونین که هرچی اِزدون داخل ایبوایره مین کُوم و بعد دفع ایبو. ¹⁸ اما هرچی اِزدون ایدراهه،اِز دل سرچشمه داره وُ یونه که آدَمین نِجِست ایکونه. ¹⁹ چونکه اِزدله که فِکرا خِراو، قتل و زنا وبی عفتی و دزدی و شهادت دورو تهمت ایاهه وِدر. ²⁰ اینونن که آدَمین نِجست ایکُونِن، نه غذا خَردن وا دستها نَشوشته. ²¹ عیسی اوچون ترک کرد وُ رِه مین منطقه صوروصیدون. ²² یُهووه یَ زینهء کنعانی از مَردِمون هاموچواِوی تیش وُ لیکه زِنون ایگو،سَروَرُم ای کُر داوود وِ مو رحم کن دووَرُم کیلو وویه. ²³ اما عیسی هیچ جوواوِش نا تا شاگِرداش اِویِن وُ ازش خواهش کِردن، هون رَدِش کن،خیلی لیکه ایزِنه وُ وِ دیندامون ایاهه. ²⁴ مین جواوِشون گُو مو فقط سی گُوسفندیل بِلا وُویه اسرائیل اِویومه. ²⁵ اما او زینه یو اِوی جلوپاهاش زُونی زی گُو سَروروم وِدادُم بِرس. ²⁶ مین جواوِش گُو نون بَچییلِن اِستِیَنو تی سَگییَل بِستَن دُرُست نیست. ²⁷ او زینهُ هم گُو ، دُرسته سرورُم اما سَگییَلَم اِز نون کولایی که سُفره صاحاوِشون ایبوفته ،ایخورِن. ²⁸ اوسو عیسی گُو ای زینه! ایمونت خیلی زیاده! خواستت برآورده وُوی ،مین هاموساعت دووَر شفا گِره. ²⁹ عیسی اِز اوچو حَرکت کِرد ، تا وِ کنار دریاچه جلیل رِسی رَه َر یَ بُلندی کوهی نشست. ³⁰ وُ یَ جماعت زیادی اِوین وواخوشون شَلان وکُوران و گُنگ و لَنگان اِوردِن تیش و اونون شِفا دا. ³¹ مَردمون، که دیدِن گُنگا حرف ایزنِن وشَلا سالم ولَنگا وِ ره ایرِن وکورا ایبینِن،تعجب کِردن و خدای اسرائیلِن شُکر کردن. ³² عیسی جار شاگِرداش زی و گو،دلوم سی ای مَردِمونُ ایسُوسه چونکه حالاسه روزه وا مونِن هیچی سی خَردَن نارِن نیخُوم اونون گُسنه رَد بُکنوم بِره یَوقتی مین رَه ضعف ایکُنِن. ³³ شاگِردونش گون مین ای بیاوُنوکوجه ایتریم سی ای جماعتونون کِراکُن بِجوریم؟ ³⁴ پُرسی چندتا نون دارین؟ گون هفتا نون و چندتا ماهی کوچیر. ³⁵ پَ وِ مَردم دستور دا بِنِشینن ری زِمین. ³⁶ اوسو هفتا نون و چندتا ماهینِ گِره ، بعداِز شکر کردَن تیکه کرد دا شاگرداش وُشاگرداشم دان جماعت. ³⁷ همه خَردن و سیر وُوین وهفتا زنبیل اِز تیکه ها جَم کِردن. ³⁸ غیر از زَنگَلُ و بَچیل چهارهزارتا مِرد خوراک خَردِن. ³⁹ بعد عسی مَردِمونِن مُرخَص کرد رَه مین منطقه مَجِدون.