¹ ها موروز عیسی اِز هُونَش زِی وِ دَر و بیرون هُونَش اِوِی، نِشست بال دریا. ² اما چُونو جمعیت گَپی دُورِش گِرِن که سُوار قای وُوی و نِشَست، طوری که مردم مین هُوشکی واستادِن بی. ³ اُوسُو خیلی چیان وا مِثَل سی شو تعریف کِرد گُو، یَه روزی یَه کِشاوَرزی سی تُحم رِدَن زِی وِ دَر. ⁴ تا دونه ایپاشی، بعضیاشون ایوَستِن سَر رَه و بِنگِشتون ایوِین ایخَردشون. ⁵ بعضیاشونَم ایوَستِن سَر کِل بَردا که زیاد خاک ناشتِن، و زی سُوز ایوُوی چونکه خاکِش کَم پی بی. ⁶ اما تا اَفتُو ایدِوِی ایسودِن و چونکه ریشه ناشتِن هُشک ایُوویِن. ⁷ بعضیاشونَم مین خار و گَشِه ایوَستِن و خارا گَپ ایوِوِیِن، اونُون خَفِه ایکِردِن. ⁸ اما بقیه دونه ها سَر زِمین خُو ایوَستِن وبار دادِن، بعضیا صد بِراوَر بعضیا شصت بِراوَر و بعضیا سی. ⁹ هَرکی گوش شنوا دارِه بِشنوِه. ¹⁰ اوسو شاگرداش ایوین تیش و وِش پُرسین،سیچه وا مردم وا مثل صحبت ایکونی؟ ¹¹ مین جواوِشون گو سِرِ پادشاهی آسمون فقط وِ ایشا داده وویه نه وِاونو، ¹² چونکه و هرکی داره بیشتر داده ایبوتا وِ فراوونی داشته بوهِ. وُ اِز هوکه ناره هاموهم که داره گِرِده ایبو. ¹³ سی هم چینو وا اونو مثَل طُور صحبت ایکُنوم چونکه سَیل ایکُنِن اما نیبینِن و شِنوا هستن امانیشنُونُ و نیفهمن. ¹⁴ پیشگویی اشعیا درباره شون وحقیقت رِسی که ایگو،وِگوشا خوشون اشنُون امانیفهمن و تیا خوشون ایبینِن اما درک نیکُنن. ¹⁵ چونکه دل ای قومو سخت وُویه وگوشاشون سنگین وویه و تیاشونن بَستِنه، که یَوقت وا تیاشون نَبیینن و واگوشاشون نَشنوفِن وُ مین دلشون نفهمِن وُ وَرگَردن و شفاشون بُوم. ¹⁶ اما خوش وِحال ایشا که تیَلِتون ایبینِن و گوشاتون اِیشنوفِن ¹⁷ آمین و ایشا ایگوم که خیلی اِز پیغُمبَرا و خداپرستا دلشون ایخواست اُوچی که ایشا ایبینین ، بینن وُ نیدِن وهرچی ایشا گوش ایدین بِشنُوفن اما نَشنییِن. ¹⁸ پَ ایشا معنیه مَثَلِ کشاورزن گوش بین. ¹⁹ وقتی کسی کِلُوم پادشاهی آسمونِن ایشنوه اما هُون درک نیکُنه شیطون ایاهه وهرچی مین دلش کاشته وویه ایبُره یو هامودونه ایه که مین رَه وَست. ²⁰ وُ دونه ای که سَر بَردا وَست کسی هست که بی معطلی کِلومِن ایشنووه وُ فوری هُون وا شادی ایپذیره، ²¹ اما چونکه ریشه ناره یکم دِووم ایاره اما تا وخاطر کِلوم یَخُوردهء سختی و اذیت ایاهه،فوری ایبوفته. ²² دونه ای که مین خارو گََشه وَست،هامو کسی هست که کِلومن ایشنووه اما نِگَرونیا دنیا وُ فریبِ مال و ثروت خَفَش ایکونه وُ بی ثَمرایمَنه. ²³ اما دونه ای که مین زمین خو وَست کسی هست که کِلومِن ایشنووه، هون ایفَهمه وُثمر و بار ایاره،بعضی صدتا بعضی شصتا و بعضی سی تا وِبار ایاره. ²⁴ عیسی یَ مَثَلی دی سیشون گو،پادشاهی آسمون مثل میره ایه که مین زمینش دونهء خو کاشت، ²⁵ اما موقعی که مردمون خُو بییِن دشمنشون اِوی وُ مین گندُمش عِلَف هَرز کاشت و رَه. ²⁶ اوسو که گندم سُوزوُوی علفاهم دِویدِن. ²⁷ کارگرا صاوهونه رَهدِن تیش وُوِش گُودِن،آقا مَر تو دونهء خو مین زمینت نَکاشتی؟پَ ای علفا هرزو اِز کُوجه اِوِیه؟ ²⁸ وِشون گُو یو کار دُشمِنونه. گُودِن :اِیخوی بریم اونون جمع بُکنیم؟ ²⁹ گو، نه،اَیربُخُوین عِلَفها هَرزن جمع بُکونین گندُمانم وِ ریشه ایدِرارین. ³⁰ بِلین هاردو تا موقع دِرو، وا یَک گَپ وُوِن اوسو موقع دِرو،وِ دروگرا ایگوم که اول عِلفها هُرزن جمع بُکونن و بِسوزنینِشون اوسو گندمان مین تاپو انبارِشون کنین. ³¹ دوواره یَ مِثَلی دی سیشون گو،پادشاهی آسمون مِثل دونهء خُردلی ایمَنه که یَ نفر هوُن بُرد مین زِمینش کاشت . ³² واحالی که دونه خَردل اِزهمهء دونه ها کوچیر تره اما وقتی رُشد ایکنه اِز همه دِرَدا باغ گَفترایبو،دِرَدی ایوُوه که همهء پَرَندیَل آسمون ایان مین لِتاش هونه ایکُنن. ³³ وُ مِثَلی دی سیشون گو،پادشاهی آسمون مثل مایهءخِمیریه که یَ زینه ای اِوی واسه تا کیسه گَپ آرد قاطیش کرد، تا وَر اِوی. ³⁴ عیسی همه ای حرفانه وا مِثَل سی جماعت ایگو،وُهیچی بدون مَثَل نَگو، ³⁵ یو وِ اَنجوم رِسی تا گُودِهء پیامبر وِاِتمام برسه،دونوم وِ مِثَل واز ایکونموُ هرچی که اِز اول دنیا قام بین، ایگوم ³⁶ اوسو عیسی جماعتن رَد کِرد، وُ رَه مین هونه و شاگرداش اِوین تیش،وِش گُون مَثَل علَفها هَرز وزمینن سی ایما بُگو. ³⁷ هوهم جواو دا ، اُو کسی که بذر خو ایکاره پسر انسانه، ³⁸ زمین ای دنیایه، و بذرخو هم بَچیل پادشاهی آسمونن،وعِلَفها هرزم بچیل شیطونِن. ³⁹ وُ دشمِنی که اُونون ایکاره، ابلیسه وفصل دِرو آخِرِزَمونه و فرشته هاهم دروگراین. ⁴⁰ هاموطور که عِلَفا هَرزین جَم ایکونِن و ایسوزنن، مین آخر زِمونم هَمیطور ایبو. ⁴¹ پسر انسان فِرشتیل خوشِن ایفرسته و اُونو هرکی که باعث گُنایه وُ هم بدکاران جَم ایکُونن، ⁴² وُ اونون اِیبِن مین کُورهء تَش،هاموچو که گیریوه و دندون و دندون سائیدن هِستو. ⁴³ اوسو خداپرستا مین پادِشاهی پِدر خوشون، مِثل اَفتُوی ایدرَخشن. هرکی گوش شِنوا داره ایشنُوه. ⁴⁴ پادشاهی آسمون مِثل گنجی هِستو، که مین دل زِمین پِنهونه وُ یکی ایره ایجورِشو باز قامِش ایکونه وُ ایره همه دارونَدارش ایقُروشه وُ ایاهه او زِمینون ایخره. ⁴⁵ دوواره پادشاهی آسمون مِثل تاجریه که دیندا مِرواریا اصله، ⁴⁶ تا یَ مِرواری وااَرزشی اِیبینه ایره هرچی داره ایفروشه و هون ایخِره. ⁴⁷ باز پادشاهی آسمون مِثل تورمایی هِستو که مین دریا ایبِنِش و هر نوع ماهی ایا مینِش، ⁴⁸ اوسو که پُر وُوی ایکِشِنش سَر آو ، وُاینِشینِن خووان ایریزِن مین سَلَح وُ لیشییَلِشون ایریزِن ایره. ⁴⁹ آخر زِمونم هَمی طورُنه ،که فرشتیَل ایاهِن بَدیَلِن اِز مین خُویل جدا ایکون، ⁵⁰ وُ اُنون ایبِن مین کورهء تَش هاموچو که گریوه ودندون و دندون سائیدنه. ⁵¹ عیسی وِشون گو،حالا فهمیدین اینویی که گُوم؟ گودِن ها خداوند. ⁵² دوواره وِشون گو، پَ هر عالم دینی ، که دربارهء پادشاهی آسمون درس گِرده، مثل صاوهونه ایه که مین خِزینه ش چی نو و کونه ایدراهه. ⁵³ وقتی عیسی ای مِثَلاهون تِموم کِرد اِز اوچو رَه. ⁵⁴ رَه مین شهرخوش وُ مین عبادتگاشون دَرس ایدا،مَردمم تعجب کِردن، وایپُرسین،ای شخصو چطور چونوحکیم و قدرتمند وُویه؟ ای معجزان اِز کوجه یاد گِرِده؟ ⁵⁵ مَر هو کُر نجار نیستو؟مَر اسم داش مریم نیستو؟وُ گویَلِش یعغو ویوسف و شمعون و یهودا؟ ⁵⁶ مَرهمه دییَلِش همیچو تی ایما نیستن؟پَ ای چیان اِز کوجه یاد گِرِده؟ ⁵⁷ ونظَرشون نادرست اِوی. اما عیسی وِشون گو، نَبی بی حُرمت نیبو بغیرازمین شهرخوش و هونهء خوش. ⁵⁸ وُ اوچو وِ خاطر بی ایمونیشون زیاد معجزه نکرد.