¹ Simone Petero, umusha kabili umutumwa wakwa Yesu Kristu, kuli abo abapokelela icicetekelo icalingana ne cesu, icicetekelo mu bulungami bwakwa Lesa wesu no mupusushi wesu Yesu Kristu. ² Ukusenamina no mutende fifule mu bwingi mukwishiba kwakwa Lesa na Yesu Shikulu wesu. ³ Mu maka yakwe, ifintu fyonse ifya mweo na bulesa fyapelwa kuli fwebo ukupitila mu kwishiba kwa uyo uwatwita ukupitila mu bukata bwakwe no lulumbi. ⁴ Ukupitila muli ifi alitupele ifilayo ifikankala kabili ifikalamba, pakwebati mwakwatamo icakaniko mu bulamba, ukufulumuka ku fibola ifya mu calo ificitwa na matontonkanyo yabubi. ⁵ Napa mulandu wa ifi, mucite icisuma pakulunda ubune bwa cicetekelo cenu, na ku bune mulundeko amano, ⁶ ku mano lundenipo ukuiteka, kukuiteka lundenipo ukushipikisha, kukushipikisha lundenipo bukapepa, ⁷ kuli bukapepa lundenipo ukutemwa kwaba munyina na kukutemwa kwaba munyina lundenipo ukutemwa. ⁸ Ifi fintu nga fili muli mwebo noku kula muli mwebo, fikomulenga ukukanaba ingu'mba nangu ukukana twala ifisabo mu kwishiba kwakwa Shikulu Yesu Kristu. ⁹ Lelo uyo onse uwa bulisha ifi fintu ninshi alamwena mupepi kabilli ni mpofu, na laba ukwebati alisambwa ku membu shaku kale. ¹⁰ Eco, bamunyina, beni abashangila pa bwite no kusalwa kwa cine, pantu nga mwacita ifintu, tamwakaipunune. ¹¹ Muli iyi nshila mukaba abakankala no kupelwa ukwingila mu bufumu bwa muyayaya bwakwa Shikulu kabili Umupusushi Yesu Kristu. ¹² Eco nakulaba uwaipekanya lyonse pakumibukishako kuli ifi fintu, nangula mulifishibile, kabili nangu muli abakukosa mu cine mukwete pali nomba. ¹³ Ndimwene ukuti cililingile kuli nebo, apo ndi mwi hema, mu nshila ya kwibukisha. ¹⁴ Pantu ndi shibile ukwebati ukufumishiwapo kwe hema lyandi kwalafika nomba line, pantu Shikulu Yesu Kristu alisokolwele ifyo kuli nebo. ¹⁵ Nko panga amaka yakumona ukutila panuma nga naya muli no kwibukisha ifi fintu. ¹⁶ Pantu tatwa konkele imilumbe yashikwa mubucenjeshi ulo calengelwe ukwishibikwa kuli mwebo amaka no kwisa kwa Shikulu Yesu Kristu, lelo twali bakambone ba bumulopwe bwakwe. ¹⁷ Pantu alipokelele bushimucindikwa no bukata ukufuma kuli Lesa Wishi lintu ishiwi lyaletelwe ukufuma ku bukata ubukalamba ubwacilishamo, aliti, "Uyu e Mwana wandi uwatemwikwa, uo mbekelwamo." ¹⁸ Fwebo fwebene twalyumfwile ishiwi lyakwe ukufuma ku mulu ulo twali nankwe pa lupili lwa mushilo. ¹⁹ Pantu tulikwete cebo ca busesemo ica cine, ico mufwile mwaposako amano ngefyo tuposa mano ku nyali mpakabwaca no lutanda lwa kumaca lwaima mu mitima yenu. ²⁰ Pali fyonse, mufwile ukwishiba ati takuli malembo ya busesemo ayengafuma kuli umbi no kuyelula. ²¹ Pantu ubusesemo tabwaletelwe no bufwayo bwa muntu, lelo abantu balandile kuli Lesa ulo basendelwe no Mupashi wa Mushilo.