5 ¹ Ja̧'hua̧nö̧ ja̧'a̧ Israel ttö̧ja̧ ttahuaruhuä 'cotömä̧ o'catoi'önä̧ David Hebrón ötahuiyänä̧ ö̧ja̧'a̧ ichäjä'cotö pä'inätö̧: "Topittö̧, ujutumä̧ cucuojattömä̧ ji̧nä̧ yotute huotöjä̧. ² Ni̧po̧ jä̧ji̧nö̧, Saúl ujutu tu̧ru̧hua̧ jö̧nä̧ ö̧jä̧nö̧mä̧, ucu jä̧ja̧'a̧ Israel ttö̧ja̧ttö̧ su̧ro̧da̧u̧ ttu̧ru̧hua̧ jö̧nä̧ hue'äjimä̧. TÖ̧Ä̧NÖ̧HUA̧MÄ̧ pä'inö̧: Ucumä̧ ttö chumö̧huäyotö Israel ttö̧ja̧rö̧ to̧pä̧rö̧ tta̧cuä̧rä̧cua̧jä̧, ja̧'hua̧ta̧'a̧nö̧ ucumä̧ Israel ttu̧ru̧hua̧ ru̧hua̧ jö̧nä̧tä̧ cu'ärohuächä̧cua̧jä̧." ³ Ja̧'hua̧nö̧ ja̧'a̧ttö̧ Israel ttö̧ja̧ttö̧ ucuo ttö̧ja̧mä̧ ru̧hua̧ Hebrón ötahuiyänä̧ ö̧ja̧'a̧ ichäjätörö, ru̧hua̧ Davidmä̧ TÖ̧Ä̧NA̧HUA̧ to̧ä̧ro̧mȩttö̧ jahuätucu esecuinö̧. Jahuätömä̧ Davidrö a̧dȩja da'epö pojopö ku̧ni̧nä̧tö̧ Israel ttö̧ja̧ ttu̧ru̧hua̧ päi'önä̧. ⁴ Davidmä̧ 30nö a̧'ȩ ku̧nä̧ri̧nö̧ ruhuo kä̧mä̧dö̧ hueinömä̧, ja̧'hua̧nö̧ ja̧'a̧ttö̧ 40nö̧ a̧'ȩ jo̧mȩnä̧ ruhuomä hue'inö̧. ⁵ Hebrón ötahuiyättö Judá ttö̧ja̧rö̧mä̧ 7nö̧ a̧'ȩ ja̧'a̧nä̧ 6nö̧ kä̧hua̧tö̧ jo̧mȩnä̧ ruhuomä̧ hue'inö̧, ja̧'hua̧ta̧'a̧nö̧ Jerusalénämä 30nö a̧'ȩ jo̧mȩnä̧ ruhuomä̧ hue'inö̧, jua'atäcu Israel ttö̧ja̧rö̧'i̧nä̧, Juda ttö̧ja̧rö̧'i̧nä̧ o'catoi'önä̧rö̧mä̧ 3nö̧ a̧'ȩ jo̧mȩnä̧ ruhuomä̧ hue'inö̧. ⁶ Ru̧hua̧mä̧ u̧mö̧huäyotöcu Jerusalénra̧'a̧ 'chi̧nö̧ ja̧huä̧jä̧nä̧ ka̧cuä̧tö̧ Jebusitasccu rohuäu. Jahuätömä Davidrö pä'inä̧tö̧: "Ucumä pȩnȩmä̧ ichocö cuä̧cua̧jä̧, porömä ä̧to̧cä̧tö̧ jö̧ttö̧'i̧nä̧ cue'ächocotö jö̧ttö̧'i̧nä̧ rä'epö tti̧cuä̧cua̧jä̧. Davidmä pȩnȩmä̧ ichö juiyö'anö ja̧'a̧." ⁷ Ja̧'hua̧nö̧ ja̧'a̧nä̧ Davidmä Sión pättome juruhuä'ijome'inä̧ 'cho'ipinö̧, juȩnȩmä̧ jitämä David idepiyö pättomȩ. ⁸ Ja̧u̧nö̧ pä̧nä̧ Davidmä̧ pä'inö̧: Jitö Jebus ttö̧ja̧rö̧ rohuäu 'chä̧tö̧mä̧, ajiya 'cuäopäjunä̧ dodepö tti̧'chö̧'a̧nö̧ ja̧'a̧ ppi̧sä̧ ppi̧sä̧ ' chä̧tö̧rö̧'i̧nä̧, ä̧to̧cä̧tö̧rö̧'i̧nä̧, jahuätömä David abo'iyotö ja̧'a̧." Ja̧'hua̧nö̧ ja̧'ttö̧ ttö̧ja̧mä̧ pä'ätö. "Ä̧to̧ca̧mä̧ ja̧'hua̧ta̧'a̧nö̧ ppi̧sä̧ ppi̧sä̧ 'chö̧mä̧ ruhuodenämä do'ächotö ttacuotö. ⁹ Ja̧'hua̧nö̧ ja̧'a̧ttö̧ Davidmä juruhuä'ijomä̧ pättome kä̧mä̧di̧nö̧ ja̧'hua̧nö̧ ja̧'a̧ junȩmä̧ David idepiyu pä'ö o'inö. Ja̧u̧mä̧ juȩnȩ jäyänä ttoecuäbänä tto'epömä mö̧o̧mȩttö̧ kä̧mä̧dö̧ jacuä jubö päi'önä̧ tto'epinö. ¹⁰ David uruhuomä yabonö rö̧ä̧chi̧na̧'a̧, TÖ̧Ä̧NÄ̧HUA̧ su̧ro̧da̧u̧ TTÖ̧Ä̧NÄ̧HUA̧mä̧ ja̧u̧tä̧cu̧ ö̧ja̧'a̧ttö̧. ¹¹ Ja̧'hua̧nö̧ ja̧'a̧ Tiro ötahuiyättö ru̧hua̧ Hiramä huȩnȩ ȩcuä̧ ttö̧ja̧rö̧ hue'ö kä̧nö̧mä̧, cedro dauhuiyä'i̧nä̧, dauhuiyättö aditätörö'i̧nä̧, inähuiyättö aditätörö'i̧nä̧ hue'inö. Jahuätömä̧ David ojusode aditinä̧tö̧. ¹² Davidmä̧ Israel ttö̧ja̧ ttu̧ru̧hua̧ jö̧nä̧ pä̧di'önä̧ rutinömä TÖ̧Ä̧NÄ̧HUA̧tä̧ ja̧'a̧ pä'ömä̧ huo̧jui̧nö̧, ja̧'hua̧ta̧'a̧nö̧ Ja̧u̧tä̧ ja̧'a̧ u̧mö̧huäyotö Israel ttö̧ja̧ jähuänä uruhuo yabonö̧ rö̧'ä̧di̧nö̧ pä'ö'i̧nä̧. ¹³ Ja̧u̧nö̧ o'ca'a Davidmä Hebrón ötahuiyättö rä'opäji'ca̧ Jerusalén ötahuiyära̧'a̧ ichi'ömä̧, korotö irecua̧mö̧rö̧'i̧nä̧ ja̧'hua̧ta̧'a̧nö̧ Jerusalénä kä̧nö̧ irecua̧mö̧rö̧'i̧nä̧ ȩmi̧nö̧, ja̧'hua̧nö̧ jo̧mȩnä̧ i̧tti̧mö̧mä̧ yabonö u̧mä̧tö̧'i̧nä̧, nä̧tö̧'i̧nä̧ ttuhuäpächiniyä̧cu̧. ¹⁴ Jerusalén ötahuiyättö uhuäpächinä̧tö̧mä̧ pitö ja̧'a̧: Samúa'i̧nä̧, Sobab'i̧nä̧, Natán'i̧nä̧, Salomón,'i̧nä̧ ¹⁵ Ibar'i̧nä̧, Elisúa'i̧nä̧, Nefeg'i̧nä̧, Jafía'i̧nä̧, ¹⁶ Elisama'i̧nä̧, Eliada'i̧nä̧ ja̧'hua̧ta̧'a̧nö̧ Elifelet'i̧nä̧ jö̧nä̧. ¹⁷ Ja̧'hua̧nö̧ ja̧'a̧ filisteo ttö̧ja̧ Davidmä̧ Israel ttö̧ja̧ ttu̧ru̧hua̧ jö̧nä̧ pojopö ȩmö̧ a̧dȩja dattepäjäcu pätta'a a̧ju̧cu̧mä̧, ja̧u̧rö̧ usu 'chi̧nä̧nä̧tö̧. Ja̧'hua̧nö̧ tticha'a huo̧jui̧'ö̧ Davidmä̧ 'quiyönä adicuomecu̧ mȩyȩhuä̧chi̧nö̧. ¹⁸ Ja̧'hua̧nö̧ ja̧'a̧ filisteosmä rȩbȩhui̧pö̧ Refaim pä'ö micuomettö̧ pämä̧roppä päi'ome pperecuächi'inä̧tö̧. ¹⁹ Ja̧'hua̧nö̧ ja̧'a̧ Davidmä TÖ̧Ä̧NÄ̧HUA̧ ppädarö pä'ö jä'epömä̧ pä'inö̧: "¿Filisteoscumä churohuäcua'anö̧ tä̧ji̧? ¿Rohuäu isojuotepönä̧ ppäcuädäcuotöjä̧? TÖ̧Ä̧NÄ̧HUA̧mä̧ Davidrö pä'inö̧: Rohuähui, isopäi'önä̧tä̧ filisteosrömä̧ rohuäu isojuocuepönä̧ ppä̧dä̧dä̧cua̧jä̧," ²⁰ Ja̧'hua̧nö̧ ja̧'a̧ttö̧ Davidmä̧ Baal Perazim pä'ö micuomȩttö̧ rohuäu, juorömä̧ filisteosrö kä'ö icuinö̧. Ja̧u̧mä̧ pä'inö̧: TÖ̧Ä̧NÄ̧HUA̧mä̧ to̧chä̧ro̧mȩttö̧ chaboiyotö ttö̧'cä̧tȩ do'ächi'äji, ajiya pö̧ö̧nä̧ huerächa'a jä̧'i̧nö̧'a̧nö̧." Ja̧'hua̧nö̧ ja̧'a̧ttö̧ juȩnȩ i̧mi̧mä̧ Baal Perazim pä'ö o'inä̧tö̧. ²¹ Filisteos ttö̧ä̧nä̧hu̧ä'camä̧ juȩnȩtä̧ icuähui'inä̧tö̧, ja̧'hua̧nö̧ tticuähui'äji Davidmä̧ u̧mö̧huäyotöcu jäyäcu ȩpi̧nö̧. ²² Ja̧hua̧nö̧ ja̧'a̧ filisteosmä tto'ca'acu ppa̧'a̧chi̧'ö̧ Refaimttö̧ pämärächi'ome pää́ji jä̧ji̧ta̧'a̧nö̧ pperecuächi'inä̧tö̧. ²³ Ja̧'hua̧nö̧ ji̧yä̧cu̧ Davidmä̧ pä'äjita'anö Ö̧Ä̧NÄ̧HUA̧ ppädarö pä'ö usu jä'epäcumä̧ päinäcu̧: Ucumä ttä'canä̧ ja̧'a̧cu̧ kä̧mä̧dö̧mä̧ kurohuähuä, ja̧'hua̧nö̧ ja̧jueimä jahuätö ttippeyänä̧ kärächi'ö ttabobä ja̧'a̧cu̧ bálsamo pättö dauhuiyä ka̧cuo̧mȩnä̧ do'ächi'i. ²⁴ Dauhuiyänä̧ kä̧ru̧'coppa ppu'u kä̧nö̧ huä̧mȩnä̧ 'cha̧'a̧ rä̧mi̧pa̧'a̧ cuä̧ju̧cuo̧mȩnä̧, kä̧mä̧dö̧ cujurucu rohuähui. Pi̧yȩmä̧ jȩpi̧ isopäi'önä̧ TÖ̧Ä̧NÄ̧HUA̧tä̧ to̧'cuä̧ro̧mȩ kä'co rä'o'ö filiesteosttö su̧ro̧da̧u̧ru̧mö̧ urohuä̧huä̧cua̧." ²⁵ Davidmä̧ TÖ̧Ä̧NÄ̧HUA̧ hueäjita'anö̧tä̧ jȩpi̧nö̧. Ja̧u̧mä̧ cuä'u icuinö̧ filisteos ttö̧ja̧rö̧mä̧ Geba pä'ö micuomettö̧ kä̧mä̧dö̧ mä̧nä̧nä̧ ka̧cuä̧tö̧rö̧mä̧ o'catoi'önä̧rö̧ Gezer pä'ö micuome jubö cä'ädö.