¹ Isaac junata Jacob, pejjania jume peto kueikueijei nejja yajawa itoroba: "Pitsipame nebaru ponaponaenejja cananeo wirieva. ² Nountapunare, ponare Padán Aram jawalia, Betuel pieja boo yabelia, éna pajjata, yajawa pitsiename bajara jota petiriwa niejawa nejja, Labán pejjunatoyo, éna pematapijinuta. ³ Dioso Pesourukaenu kabendiciebi, nejjeinaenutsane yajawa pekato nawitsinutsane ayeikueneta, pekato nawitsinejja nieja tomara. ⁴ Ponu karajutsi Abraham pebendiciebi kuenietsi, jjamu nejja yajawa nemomojji jjamu kuijinae, bajara pakuenia kanakopatsiename neponaponae ira, perajutsi jawatsi Dioso Abraham nejja." ⁵ Bajara pakuenia Isaac püjioba Jacob. Jacob poná Padán Aram, Labán jawabelia, Betuel pejjunato arameonu, Rebeca pematapijinu, Jacob yajawa Esaú penabeje. ⁶ Akonojjae Esaú taetaba Isaac pebendiciebijawatsi Jacob yajawa pe itorobijawa Padán Aram jawabelia, pe pitsinejja petiriwa piejawa nejja bajara jotalia. Ponu yajawa tane Isaac pebendiciebijawa yajawa najume itoroba pakuenia: "Putsa pitame nebaru ponaponaenejja Canaán petiriewanu." ⁷ Esaú yajawa táne Jacob pejume yeyataejawa pajja yajawa pena, yajawa peponaejawa Padán Aram jawabelia. ⁸ Esaú tane pajja Isaac apo petsita jjanepanaejawatsi piejawabeje Canaán petiriwabeje. ⁹ Nejjata ponu Ismael jawabelia pona yajawa pita, jjeinaya ata piejawabeje, Mahalat, Ismael pejjunatoyo, Abraham pejjunato, Nebaiot pejuyapijiwa, piejawa kuene. ¹⁰ Jacob pitsapa Beerseba wekua nejjata Harán jawabelia pona. ¹¹ Pataba itsajawayota nejjata barajota nukajopa dajjita merewi, tsipaji yamerewibatsi. Ponu pita iboto bajara jota pebobenaejjae, pemata bokoto bujjupana buota, yajawa bajara jota boka pe majitsinejja. ¹² Ponu amejitsinae nejjata tane escaleranae ira wetsia penukaejawa. Itabojjo jawatsia pata yajawa Dioso pieja angelwi junabiebaya yajawa runabiebika . ¹³ Pataema, PETUJJANENU nuka bajara jjua juma wetsika yajawa jumeitsi: " JJanu raja PETUJJANENUNU, Abraham ajja pieja Dioso nunu, yajawa Isaac pieja Diosonu. Pa irata bokame, JJanu karajutsienatsi yajawa nemomojji ata jawabelia tsane. ¹⁴ Nemomojji ayeibitsouto tsane be atsa puru, yajawa jjamu nakayajetsiename taju jawabelia pemutuabereka, wouyabetsia, ira nakua yenepana werena yajawa itsa mujjunene werena. JJamu jawata yajawa nemomojji yajawa dajjita tomara pijiwi pairata pejinonopaewi pejjania kuene rajutsienajü. ¹⁵ Taema, JJanu kayajawatsi, yajawa ka ewetsienatsi nejinarutsijawajjiya. Ka kanawietsierenatsi ikatsia pa irata jawaberena apo kakopatsitsanetsi. JJanu itsinutsane dajjita pakuenia kato kueikueijeitsi." ¹⁶ Jacob noukotojjuoba pe majitsikuijinae yajawa jumeitsi: "Pejjaniejei kueneta tsaena PETUJJANENU patusatota ponapona, yajawa jjanu apo yaputaenu." ¹⁷ Ponu kujunuwajjuoreka yajawa jumeitsi: "¡Waja junawi tusato! Beitsi baja kajena Dioso pieja boo. Boupa tsaina ruka atjubuyo waja tsia nejja." ¹⁸ Jacob bajayakunua nounkotaba yajawa pita iboto penatsi mata buotsijawa. Matakotanuta penakopjuntsi yaniwa yajawa aceitera tsijuma epanajjuoba. ¹⁹ Ponu wunu ruta bajara panakua Betel, beitsi jane itsieta kopieya bajara patomara kowumi pewunu Luz. ²⁰ Jacob nejjata najume kapanepaeya jumeitsi: "Itsa Dioso nebaru ponaena yajawa ne ewetsiena pa namutua jawa taponaponaejawajjiya, yajawa itsa nerajuta peri mujjupa tajjaenejja yajawa tanajjatabinejja, ²¹ itsa jjanewaitsia jjanu nawieta ponaerenajü yajawa itsa asounutsane tajja pieja boo yaberena, nejjata PETUJJANENU taja Dioso tsane. ²² Nejjata pa iboto ta kaituotetsijawa nayeiyataina. Dajjita jjua ne rajutsiename, jjanewaitsia kueneta Kato kanawietsienatsi diez pa epatoyo kuenia."