¹ Maniando jundo ku Éle, tambié suto ta pirí enú ke nú kuje ma nglasia ri Rioso numá nú. ² Pokke Éle chitiá: "ENDI TIEMBO GUENO I PRETA ENÚ TAÑIO, I ENDI RIA RI SABBASIO I YULÁ ENÚ". Miná, aora sendá tiembo gueno. Miná, aora sendá ria ri sabbasió. ³ Suto nú poné piegr ri tropieso ri lande na nú, poke suto nú kelé ke miniterio kai endi bajesa. ⁴ Po kontraio, suto atá probá kiene sendá ku asion ri suto memo, suto sendá moso ri Rioso. Suto sendá moso ri Éle endi to lucha, akongojamiendo, agutia, abesirá, ⁵ asote, apresamiendo, motine, endi makaneo ndulo, po kurana ri amanesia, endi kanatule, ⁶ endi puresa, konusimiendo, pasiensia, endi Epiriyu Sando, gongoroko ri bela belá. ⁷ Suto sendá moso endi palabra ri bela belá, endi kutú ri Rioso, ⁸ Suto makania endi onra i ku resonra, endi kalunia i alabansa. Ma gende ta akusa suto ri ingañaro, suto senda bera. Suto se makania kumo gende furastero, i suto sendá kunosió. Makaniando kumo moribundo i ¡miná! suto sigí bibo. ⁹ Makaniando kumo katigao po asion suto, poro nú kumo kondenao ri muete. ¹⁰ Makaniando kumo akongojao, Poro siempre suto regosija. Makaniando kumo kusubé, poro ku aseé ma uto galipotano. Makaniando kumo le ke ten na nú, i teniendo to. ¹¹ Suto a kombesáa to ma bela a enú, Korintio, i ma kolaso suto atá empenankao. ¹² Ma kolaso ri ané nú ta selao po suto, poro atá selao po sendimiendo ri ané memo. ¹³ Aora sendá kambio malo, i ta kombesa kumo a ma monasito, empenanka kolaso. ¹⁴ Nú ta jundo ku ma inkredulo. Pokke ¿Ke jundamiento ten ma jutisia ku ma rebeldia? ¿ i ke kompañia ten ma lu ku okurana? ¹⁵ ¿Ke akuedo ten Kristo ku Belial? ¿Ke polé chitiá kreyente ku lo ke nú kreé? ¹⁶ ¿Ke akuedo abe endi templo ri Rioso ku ma idolo? Pokke suto sendá templo ri Rioso, kumo éle a chitiá: " I TAN BIBÍ LENDRO RI ENÚ I TAN JARRIA LENDRO RI ENÚ. I TEN KE SE RIOSO RI ENÚ, I ANÉ TEN KE SE TERRUÑO MÍ". ¹⁷ Po tando: "SALINO LENDRO RI ANÉ, I APATTÁ," a chitiá Ño. " NÚ TOKA KUSA IMUNDA, I TAN DALE MA BIENBENIA. ¹⁸ I TAN BOBBÉ TATÁ RI ENÚ I ENÚ TEN KE MONÁ MÍ," a chitiá Ño ri to kutú.