¹ Yaz phătc stâyv woa Hungh tync woax tauh, byaoh puf nzauf Ah zây stâub, ja đăngc ănz cungh gwoaic, cloon cah njaf, ja wănx tăpb nhlic nomz yeenx ănz. ² Yaz phătc ah tauh Stynz-munh njoongh nzongf hamv lub coong, “naih laiv lanh payh tuz coib nây nhlic nomz yeenx? Cloon nâyx zây stâub? ³ Yămz Tênb-toongh mah six yămz bamh canz, mah six yămz nib đi, max naih laiv lanh hayh coib tuz nâyx zây stâub mangc cah njaf six lănv laiv hungđ. ⁴ Yaz seenz haoh tuz caux, wâyc zuc max naih laiv lanh payh tuz coib nâyx zây stâub mangc cah njaf. ⁵ Woax đomc munh côx naih ah lanh bux yaz Coong, “năngx gâyf haoh gôh, mangc geh! Wâyc zuc Yu-đa, woax stingx, six năngđ njanh zongh, Đa-vitv woax zâyz, tuz hingh, nănh songđ hayh coib tuz nây nhlic nomz yeenx, cloon nây zây stâub. ⁶ Yaz mangc phătc naih ah tauh Pa-jiz yungh cayx năngđ ah yađ zuc tayx tayc yămz woa pyâyz tauh stengb hauđ mungh tongx, cloon munh côx quib woa. Naih nhlic nomz joongz, cloon nhlic nomz mâyc, âyz gâyf six pây tauv Tênb-Hungh nănh paiđ nây nhlic nomz hoonh ninyh nzêux bamh canz. ⁷ Pa-jiz yungh songđ ninyh lumz zoz stâyv woa Hungh tync woax tauh byaoh puf nzauf woax zây stâub nzâyz taih. ⁸ Nănh ninyh zoz stâub woax zanyf, woa pyâyz tauh stengb hauđ, cloon nhlic săpc stâyz lanh munh côx, yâuc paix nzac pa-jiz yungh cah đangc, stiz muif lanh nzauf lanh nomz lanyh njămh, cloon lanh nomz sămz engz ănz pong nzuf, Tênb-Hungh nyăngz munh clo Zâu woac. ⁹ Nănh stiz yâuc ayx ah gwoanc săngb nzungz tanv Coong, “mâyh gâyf hođ zoz nâyx zây stâub, coib nâyx đomc yeenx, wâyc mâyh nyunc tayc nongc mâyh samđ suc muif stingx nyeenh mănh, muif hungđ woac, muif nomz Côkz nzâyz lauf phunz Zâu Tênb-Hungh. ¹⁰ Nănh wav woax đomc munh pênx ah nomz Côkz, yâuc wav nănh stiz săngh stayb munh bokc dlic Zâu Tênb-Hungh. stiz songđ tuz cun nây bamh canz. ¹¹ Yaz mangc yâuc mungv numđ săngh jeof săngh panc stynz-munh stingb. Woax đomc stengb hauđ, cloon woax đomc munh côx quib woa Hungh tync. ¹² Tinyh đoih hamv lub tanv nănh coong, “Pa-jiz yungh zuc tayx tayc, mâyh jic tuz naih lanyf, naih puv quâyx, naih jab, naih tongb manyh, naih manyh yangh phunz munh tanv. ¹³ Yaz numđ yămz Tênb-toongh, yămz bamh canz, yămz nib đi, yămz coiđ tayc, yămz jêmh sangc, Zâu zâyx taih muif hungđ tanv nănh Coong, “tanv stâyv woa Hungh tync lub quaix woax tauh, Cloon Pa-jiz yungh, naih manyh yangh, naih jab naih gwăngz-eng. cun tauv banc stâyv banc đaic. ¹⁴ Pyâyz tauh stengb hauđ coong, “A-men! woax đomc munh côx songđ quâyc nzac paix.”