¹ Stynz-munh nuz phunz yaz mangc yungf mengc womz đăngb cayx năngđ canyx nâyx, tăng woa Tênb-Hungh cloon pa-jiz yungh nyăngz tync đunh seetb taih. ² Yămz côkz mungh tongx, iz nganc coiđ synh naih săngh mengc njăngx, ah nyăngv săngh săpc nyâyc toongv pyâu. ah lav săngh ah toongv, woax đomc njăngx noomh nongc zany tuz manf Côkz munh nyăngz gumc gongx. ³ Laiv hungđ zuc Tênb-Hungh zaux six max tuz phepb nzac stengv, wâyc Tênb-Hungh cloon pa-jiz yungh nyăngz tync six yămz stengv cah njaf, Tênb-Hungh nyăngz cumh pâuz munh, songđ canyx bongc tanv nănh. ⁴ Stiz tuz mangc nănh mynb, wâyc stiz nyăngz pyây nyah naih nănh nyăngz bux ja ănz woa. ⁵ Songđ max naih bah nzămc, stiz max zâuđ nongc toongz, cloon bah noib syux gwăngz. Wâyc Zâu Tênb-Hungh ayx gwăngz phunz stiz, nănh stiz songđ ayx Hungh cun tauv banc stâyv. ⁶ Stynz-munh coong bux yaz, “nâyx đomc woac six seenz nyăngz jic tuz zeen, Zâu Tênb-Hungh sađ Singx-lingh phunz nănh nyăngz stênx stengb, nănh paiđ Stynz-munh ninyh lănv bux nănh cumh pâuz munh pâyz tuz cayx naih laiv hungđ dlayc seetb taih. ⁷ Mungv bef! Yaz cayx ninyh gôh, poou phunz laiv lanh mungv stênx stengb ja ănz nâyx zây stâub nyăngz woac." ⁸ Yaz six Giăng, tuz numđ yâuc phătc nzuf nâyx đomc dlayc, yaz mangc phătc năngđ nâyx, songđ quâyc nzac Stynz-munh staux synh ninyh paix nănh. ⁹ Six nănh bux yaz coong, “năngx gâyf paix yaz, ‘yaz lauf cloon mâyh ayx yâuf pez tinyh năngđ lêđ, stênx stengb, năngx cloon woax đomc ayx âyz nâyx zây stâub nyăngz munh, hopđ zuc paix Zâu Tênb-Hungh." ¹⁰ Stynz-munh năngx bux yaz coong, “năngx gâyf omz stênx stengb nyăngz woac yămz nâyx zây stâub, wâyc zuc nâyx đomc dlayc cayx seetb taih nzof gôh. ¹¹ Laiv lanh ayx huđ, six dluyh nănh ayx huđ, laiv bah lotb, dluyh nănh bah lotb, laiv lanh ayx gongx, lauf dluyh nănh ayx gongx, laiv lanh ayx đăngb zengh, six dluyh nănh stâyv quâyx ayx đăngb zengh. ¹² Cayb mungv bef! Yaz cayx ninyh gôh! Yaz cayx nzâyz phănc ninyh clao phunz stiz tinyh đoih âyz stiz ayx nyăngz cumh pâuz. ¹³ Yaz six An-pha, cloon ô-mi-ga, ayx quef coonz, cloon stêtb mâyv, sangđ coonz, tauv nzuf zomc woax tauh. ¹⁴ Poou phunz laiv lanh đuv nănh nyăngz gwuyz tuz dlăngc, songđ tuz quyênh nhlync yungf mengc nyăngz njăngx pyâu, yâuc tuz nzac singh jengh cah njaf ninyh. ¹⁵ Yămz cungh ngwoaic stengv woax đomc six clô, ayx papz hoiđ munh, ayx za gâyf, puv maoh jaf munh, ayx pongz lauh, paix miuc hanyh woax đomc munh six yămz woa. ¹⁶ Yaz six Yê-su! Yaz paiđ yaz nyăngz Stynz-munh ninyh ayx zanyx manyf bux woac bây mâyh, phunz mâyh lănv bux huyđ toongh, Yaz ayx Đa-vitv, nyăngz stung zez tâuh sây stunz, yaz six bah đoomz njâu nyăngz stingz tau gwăngz. ¹⁷ Singx-lingh cloon săngb bongf coong, “taih gôh! Laiv lanh numđ coong, “bix taih gôh! Laiv lanh nyâuđ gatb nyămh dlongh taih lov, laiv lanh oix hopb, yâuc phunz nănh nzac taih hopb săngh mengc womz, taih lov yaz cungb sangđ phunz nănh. ¹⁸ Yaz bux quaix laiv lanh tuz numđ stênx stengb ja ănz nâyx zây stâub cah njaf nyăngz woac, laiv lanh năngđ pâu laiv hungđ woac nzac nâyx zây stâub, Tênb-Hungh six pâu nâyx zây stâub lănv nyăngz dlauc wâyb phunz nănh. ¹⁹ Six coong laiv lanh năngđ quanyf, stênx stengb nâyx zây stâub nyăngz gâyf, Tênb-Hungh songđ zoz nănh yungf mengc nyăngz phănc seetb taih, cloon staox ănz nâyx zây stâub lănv nyăngz jau. ²⁰ Nây six Zâu Yê-su ayx zanyx manyf phunz nâyx đomc woac six seenz nyăngz, "zâyf gôh, yaz songđ cayx ninyh gôh, (A-Men) Jođ mâyh coonx taih zef gôh! ²¹ jođ Zâu Yê-su sađ pôz phunz pec stingx (A-men)*