¹ Yaz mangc phătc ah tauh Stynz-munh tăng Tênb-toongh taih, nănh puf nzauf ah tauh ja zâyh, cloon ah stymz njab langb nongc coib woax nomz cotb đôz. ² Woax lanh munh nyopz zoz tauh côngz six lôx noib woax tauh nangz, six Sax-tanx manđ nyăngz Hungh, nănh zuc stayb ah tynb nyăngv. ³ Zâyf zuc quanyf ănz nzac woax nomz cotb đôz cah njaf ninyh, ja cotb nzeetx clangc nănh ănz woa, max phunz nănh ninyh yâuh gungh đi jaf nyeenh mănh, tauv nzuf hanf ah tynb nyăngv, nănh songđ tuz pungx seetb taih ah dlapc. ⁴ Yaz phătc stâyv woa muif nomz Hungh tync woax đomc muif lanh munh, tuz quênh stămđ, yaz phătc stăngc ayx zanyx manyf lănv Zâu Yê-su, phunz munh bix zuc cumv pyây woax đomc munh nyăngz mengc hoonh, nănh stiz max zengx congx stengb hiv, cloon miuc hanyh, stiz max zengx tăpb stengb hiv yeenx ănz pyây nyah, mah six ănz puf, stiz tuz săngh phunb stengb taih cloon Njâuv Zâu Yê-su cun ah tynb nyăngv. ⁵ Six năngx naih pitc đômc munh max zengx tuz săngh phunb stengb, zu tauv tuz pong ah tynb nyăngv, nzăngđ tuz săngh phunb stengb taih tah yeetx hâyđ. ⁶ Poou phunz laiv lanh naih phănc tuz săngh phunb stengb taih tah yeetx hâyđ, cloon zuc tayc tah nyâyc hâyđ nyăngz gâyf, max naih quênh hoiđ tauv stiz, stiz songđ tuz cloon Njâuv Zâu Yê-su ayx Tênb-Hungh nyăngz stayb munh cun ah tynb nyăngv. ⁷ Pong nzuf ah tynb nyăngv, Sax-tanx, songđ tuz pungx seetb nzauh taih. ⁸ Nănh zâyf ninyh jaf gungh đi munh, hox Gotv, pec stingx, zâyf cloon Ma-Gotv, pec stingx, căpx dlonf yămz ah nomz tync, bênc panx pengz, stiz hongđ năngđ coiđ synh njauz staiz. ⁹ Sax-tanx, tokz pengz ênz ninyh wâyh nzêux Tênb-Hungh stăngz nyăngz pec stingx woa singh cungh ngwoaic nib mync, six tâuf tăng gungh tuih nzac taih pu nănh stiz stutc taiv pengh. ¹⁰ Six Sax-tanx manđ nyăngz Hungh jaf munh, songđ zuc stayb quanyf ănz tâuf coiđ, cloon woax đomc za stênx stengb, năngx cloon woax tauh stengb hiv, zuc phađ yămz woa tâuf coiđ quaix noib quaix munf, wâyb tauv banc stâyv. ¹¹ Yaz phătc ah nomz tync lub phangb pec, woax tauh Hungh stâyv woax nomz tync cah đangc, gungh nib tyuv nzuf max naih lungđ. ¹² Yaz phătc woax đomc tayc blătc nyăngz munh, max cun lub six jeenz, zuc stâuđ yămz woa Hungh tync cah đangc, yâuc coib woax đomc stâub ănz woa, zâyf phătc coib ah zây săngh mengc tanz nyăngz stâub ănz woa, woax đomc munh tayc nyăngz hoonh zuc stămđ âyz nănh stiz yămz yangh stâyv ayx nyăngz dlayc. Ja staox ănz woa stâub bix âyz woa stămđ. ¹³ Coiđ stungx tuih womz tayc woax đomc munh taih ănz woa, tayc muf yămz pâu woax đomc munh, yâuc stungx taih ănz woa, muif lanh zuc stămđ âyz stiz ayx nyăngz dlayc. ¹⁴ Yămz stâyz zuc tayc nyăngz jab, zuc quanyf ănz nzac tâuf coiđ, woa tâuf coiđ six tayc tah nyâyc hâyđ. ¹⁵ Laiv lanh max naih bux ja ănz woa săngh mengc tanz, six zuc quanyf nzac Tâuf coiđ ninyh.