¹ Blătc nâyx đomc dlayc, yaz numđ naih stingb năngđ munh đungx nâyx, yămz cah zâyc Tênb-toongh hamv Coong, “A-lê-lu-ya, tuz hingh, cloon Njâuv pôz, nyăngz Gwăngz-eng six yămz pănh nyăngz Zâu Tênb-Hungh. ² Zâu tingc munh stoif, seenz pengh stymz, yâuc manyh pec phămb pengh, Nănh phađ munh haov nyăngz stoif, wâyc woax tauh munh sab, maic phăngh nyăngz stoif, ayx phunz bamh canz munh huđ nzuf. Zâu clao phunz nănh, wâyc nănh hoiđ Zâu nyăngz cumh pâuz munh tayc. ³ Stiz hamv Coong, “A-lê-lu-ya, stiz zuc tâuf wav, woax cuyb tâuf sâuv pukb pukb têx stâyv quâyx. ⁴ Songđ naih nhlic săpc stâyx lanh munh côx, cloon pyâyz tauh stengb hauđ, quâyc nzac paix Tênb-Hungh cah đangc, six stâyv woa Hungh tync woax tauh, stiz hamv coong, “A-men, A-lê-lu-ya. ⁵ Zâyf naih woac tăng woa Hungh tync Coong seetb taih, “oix zuc tanv Zâu Tênb-Hungh, tinyh đoih cumh pâuz munh, lub jeenz oix zuc cumh nzav Zâu, yâuc tanv nănh. ⁶ Blătc quaix đangz, yaz numđ woac stingb năngđ naih munh đungx, năngđ womz lub buib, yâuc năngđ bah congz haoh nyăngz stingb, “ stiz songđ coong, "A-lê-lu-ya, Tênb-Hungh six pănh nyăngz Zâu, naih quênh ayx Hungh cun muif hungđ. ⁷ Pănh tinyh đoih oix zuc numđ nyađ, bongc phunz Tênb-Hungh tuz gwăngz-eng, wâyc pa-jiz yungh nyăngz coonx hynh taih tauv, munh sab stav, zoongz stynb dloih nzuf, zu stipx pa jiz yungh. ⁸ Munh sab stav tuz stipx đôc buyx, nongc zoongz stynb, pec đăngb zengh, đôc buyx six đăngb zengh munh, ayx pengh stymz nyăngz cumh pâuz. ⁹ Naih lanh Stynz-munh coong bux yaz, “mâyh zuc ja nâyx đomc woac, poou phunz laiv lanh tuz banh taih nhlync pa-jiz yungh coonx hynh năngv woax đomc munh naih oonz loc, Stynz-munh zâyf coong, "“nây six Tênb-Hungh coong seenz nyăngz woac. ¹⁰ Yaz paix nzac Stynz-munh staux synh, nănh coong bux yaz, mâyh max nongc ayx nâyx đêh! Yaz cloon mâyh ayx Zâu cumh pâuz, năngđ nyâuh yâuf pez nâyx, pănh cungb ayx zanyx manyf phunz Zâu Yê-su, mâyh zuc paix Tênb-Hungh, wâyc zuc stênx-stengb woac, six nănh nyăngz woac. ¹¹ Yaz phătc Tênb-toongh coib goib, yămz yaz cah đangc naih ah tauh maf pec, zâyh maf munh nyăngz bux, six hipđ ayx, “naih stymz cloon seenz gâyf woax tauh, nănh six pengh stymz stamđ stoif, cloon panx zax. ¹² Nănh nyăngz mâyc gwăngz năngđ tâuf byetc, nănh pyây đongx đungx nomz banyh tênb-moouc, nănh stynb ja ah nomz bux. Seetb nzuf nănh max naih mănv saz tuz woax nomz bux. ¹³ Nănh zuz gwuyz nyumc samđ, nănh bux six hipđ ayx Tênb-Hungh. ¹⁴ Yămz Tênb-toongh zâyh maf pec woax đomc pengz, zuz đôc buyx pec đăngb lêpc nănh ninyh. ¹⁵ Tăng nănh nzeetx nja seetb taih ah zungz nzuc đao njayc njemh, nănh nongc tingc manf Côkz munh nyăngz stoif, nănh nongc ah stynz njab pya cun Côkz, yâuc ănz nzac Tênb-Hungh hănđ stoif woax nomz mayx ngatc tungh cuđ tyu tongđ ninyh, seenz cumh nzav nzuf. nănh naih quênh cun muif hungđ. ¹⁶ Nănh nyăngz gwuyz saz, cloon nănh staux bongc naih staox ah nomz bux, “Muif hungđ Hungh nyăngz Hungh, “muif hungđ Zâu nyăngz Zâu. ¹⁷ Yaz năngx phătc ah tauh Stynz-munh stâuđ woa bah noib cah njaf, hamv êu đayv yămz đamx gungh muif hungđ noc, “taih gôh! Taih căpx dlonf nhlync Tênb-Hungh bênc wănb ănz hynh lub woax tonx năngv. ¹⁸ Taih nhlync Hungh stix, cloon pengz pyây, zâyh maf cloon naih Quyênh woax đomc munh nyăngz A, ayx nâuh, cloon max ayx nâuh, ayx côx, cloon pec stingx. ¹⁹ Yaz năngx phătc tauh stengb hiv cloon bamh canz Hungh stix, cloon stiz woax đomc pengz căpx dlonf taih, panx zax cloon zâyh maf woax tauh nyăngz pengz. ²⁰ Stengb hiv cloon ayx papz, ayx đungx hungđ jix caox njingc, jaf munh pamf stoif, cloon naih tăpx stengb hiv yeenx, năngx cloon paix stengb hiv hanyh woax đomc za stênx stengb, songđ zuc stayb quanyf ănz nzac tâuf coiđ ninyh, zuc wuôngh tâuf pu. ²¹ Năngx yăngc woax đomc munh, zâyf zuc zâyh maf woax tauh tăng nănh nzeetx nja seetb taih nyăngz nzuc đao, tayx stiz tayc stutc nzuf, yeetx stong noc nzac taih nhlync woax đomc munh A pêu banyz.