¹ Năngx naih ah hungđ jix caox njingc nzongf tăng gungh hynđ seetb taih, naih ah lanh munh sab, zoongz zuz six nongc bah noib, lav yămz nănh staux đi, pyây đongx moouc naih săpc nyâyc nomz stingz tau. ² Woax tauh munh sab naih sây, songđ bengc săngx huđ đutb stynb. Munz songđ nâyx hamv. ³ Năngx naih pitc hungđ jix caox njingc hynđ seetb woa gungh taih, naih ah tauh côngz lub njaox stiz, nhlic nomz pyây, săpc nomz joongz, muif nomz joongz đongx moouc nzuf, ⁴ Côngz tây vatc yămz gungh nyăngz stingz tau, pôz phănc ah phănc, tuih nzac nib taih. Woax tauh Côngz songđ nzac taih tauv stâuđ tauh munh sab woa cah đangc, zu tauh munh sây stengb stâyv taih nănh six naz săngh. ⁵ Woax tauh munh sab stengb tuz tauh toonz, nănh six nongc njab pya cun nyeenh mănh woax tauh munh sây, năngx naih ah lanh taih zab zoz woax tauh sây nzâyz ninyh tauv Tênb-Hungh cah đangc. ⁶ Woax tauh munh nzif tyuv nzac stâyz phangz blănf ninyh, six Tênb-Hungh bênc tync phunz nănh yămz woa, tuz ah tynb iz pez guc săpc noib. ⁷ Woax zanyf yămz woa gungh naih panx zax seetb taih, Mi-ca-ên, cloon lêpc nănh Stynz-munh, ninyh cloon Côngz panx zax, Côngz cloon manđ nyăngz Stynz-munh yâuc ninyh cloon stiz panx zax. ⁸ Six Côngz panx max hingh, manđ songđ zuc stâyb Tênb-toongh Côkz nyăngz tync. ⁹ Woax tauh Côngz songđ zuc quanyf nzac bamh canz, Six lôx noib ninyh yâuh nây gungh đi jaf munh woax tauh nangz six hipđ ayx Sax-tanx, manđ nyăngz Hungh, cloon lêpc nănh woax đomc Stynz-munh zuc quanyf nzac nib. ¹⁰ Yaz numđ woac stingb lub nhlangđ woa gungh coong,, “tauv săngx huđ Tênb-côkz nyăngz, Tênb-Hungh nongc lanyf Njâuv nănh nyăngz pec stingx, “wâyc zuc Njâuv Zâu naih lanyf cun nây gungh đi, Cooux nyâuh yâuf-pez quaix noib quaix munf woax tauh, nâyx zanyf songđ zuc Tênb-Hungh quanyf nănh nzac nib taih. ¹¹ Nănh stiz tuz hingh six wâyc Pa-jiz yungh samđ, cloon ayx zanyx manyf woac. Wâyc nănh stiz sez tuz tayc mengc. ¹² Yămz Muif tađ Gungh cah njaf, munh cloon muif hungđ songđ seenz numđ nyađ, “six nib cloon coiđ songđ numđ stauh, wâyc zuc manđ Hungh nzac tauv nyâuh lâyc. Nănh seenz Siv pumh nzongf, wâyc nănh pâyz tuz nănh nyăngz săngx huđ cayx nzuf gôh. ¹³ Woax tauh Côngz pâyz tuz nănh zuc stayb quanyf nzac bamh canz, nănh songđ ninyh luiđ zoz stengb tuz toonz woax tauh munh nzif. ¹⁴ Woax tauh munh nzif tuz stipx ah pâuv Clang lub đatz đayv ninyh tauv bênc săngh tync phunz nănh yămz woa stâyz phangz blănf, songđ tuz Zâu jămđ nănh yămz woa pôz nyăngv phanx, tuz pyenv gâyh max zuc nangz hoiđ nănh. ¹⁵ Côngz songđ nongc nănh nzeetx nja womz seetb taih, năngđ coiđ luiđ lêpc woax tauh munh nzif cah đangz, ayx zoz womz cutb nănh ninyh. ¹⁶ Six nib songđ Njâuv woax tauh munh nzif, nib quaf nzeetx naz nzuf Côngz nja seetb taih nyăngz womz. ¹⁷ Woax tauh Côngz seenz numđ nhleenx nzongf, songđ ninyh lov woax tauh munh nzif, cloon pitc đomc sây stunz panx zax, âyz gâyf six pây tauv mungv Zâu Tênb-Hungh nyăngz lanyf, yâuc âyz Yê-su ayx zanyx manyf bux woax đomc munh. ¹⁸ Woax tauh Côngz songđ ninyh stâuđ woa coiđ synh.