¹ Njâuv Zâu Yê-su nyăngz lauh yangh, tăng Tênb-Hungh payb phunz nănh nyăngz cumh pâuz Munh pâyz tuz max lauh songđ naih laiv hungđ dlayc hynđ seetb taih. Njâuv Zâu paiđ nănh nyăngz Stynz-Munh ninyh bux Giăng, pâyz tuz nâyx đomc dlayc. ² Giăng, yâuc ayx zanyx manyf lănv nzuf zuy njênf nănh phătc nyăngz dlayc, nănh lănv nâyx đomc six Njâuv Zâu Yê-su Tênb-Hungh nyăngz woac. ³ Pou phunz laiv lanh toc nâyx pun Tênb-Hungh nyăngz Stâub, yâuc săngx ja ănz nây stâub nâyx đomc woac, săngx huđ songđ seetb taih tauv stătx nzof gôh. ⁴ Yaz six Giăng ja jeenx zuyz phunz nhic nomz huyđ toongh yămz Zâu av. Jođ đangc dlih yămz, nâyx zanyf yămz, đangz phanx năngx taih woax tauh, cloon woax đomc nhlic nomz Mengc hoonh, sađ pôz sađ pengh oonz phunz cloon nyâuh yâuf pez ô stayx yămz. ⁵ Njâuv Zâu Yê-su, nănh seenz ayx zanyx manyf tayc blătc bix năngx săngh phunb stengb taih tah yeetx lanh, nănh cun nzuf bamh canz muif hungđ nyăngz Hungh. Nănh stăngz pănh songđ nyunc tayc nongc nănh nyăngz samđ stav phunz pănh gâyh đutb stoif .** ⁶ Nănh pyênv pănh pênx ah nomz Côkz, phunz pănh pênx stayb Munh bokc dlic nănh nyăngz Pha Tênb-Hungh. Nănh stâyv quâyx naih Gwăngz-eng, naih jab naih lanyf tauv banc stâyv banc Đaic! A-Men. ⁷ Mangc geh! nănh yămz woa vănx nzac taih, muif lanh Munh nyăngz mâyc six tuz phătc nănh, njynh cloon nzopb nănh woax đomc Munh, năngx cloon muif hungđ pec stingx yămz nây bamh canz, six zuc pungx stingb haoh wâyc nănh, toix nzuf A-Men. ⁸ Zâu Tênb-Hungh Coong, “Yaz six An-pha, yâuc ô-mê-ga. Six tăng đangc dlih yămz, nâyx zanyf yămz. Đangz phanx năngx taih yâuc naih lanyf woax tauh. ⁹ Yaz six giăng, ayx nyâuh yâuf pez ô stayx nyăngz yâuf, pănh cloon Njâuv Zâu songc Mengc săngh, yaz songđ cloon pănh tinyh đoih tanyđ zâuđ nanc, nongc Noic tanyđ, yâuc ayx Tênb-côkz nyăngz pec stingx, wâyc lănv Zâu Tênb-Hungh nyăngz gâyf songđ zuc luiđ ninyh yămz batv-mô coiđ synh. ¹⁰ Yămz Zâu nyăngz noib, yaz tuz Singx-lingh canyz tongf, yaz songđ numđ naih stingb buib yămz yaz woa cah đangz năngđ blungh blex stingb. ¹¹ “Bux yaz coong; "Mâyh zuc ja jeenx ănz stâub clonc, lănv mâyh phătc nâyx đomc dlayc, bix zuyz phunz nhlic nomz Huyđ-toongh, Ê-phê-sô, Sa-miêkc-nơ, Betc-găm, ti-a-ti-rơ, Satc-đe, phi-la-đen-phia, cloon Lau-đi-si stengv. ¹² Yaz wynb đangz lauf mangc jađ laiv lanh cloon yaz lănv woac, songđ phătc nhlic zây sămz toongz. ¹³ Yâuc phătc naih ah lanh cayx năngđ bamh munh nâyx zuz gwuyz đao pec tăpb nib, cah lapc yâuc naih sămz câuv pongz cah lapc. Stâuđ woa nhlic zây toongz mungh tongx congv. ¹⁴ Nănh nyăngz pyây đongz phangb pec cayx năngđ pa-jiz yungh pyâyz, yâuc năngđ toongb, mâyc yâuc eng năngđ tâuf bleetc. ¹⁵ . Nănh nyăngz iz saz staux cayx năngđ munh pu tongh stib đinyf đinyf têx, nănh nyăngz stingb yâuc năngđ womz buib glungz glungz têx. ¹⁶ Nănh nyăngz pyaoh puf nzauf nhlinc nomz stingz tau, nzeetx nja seetb ah zungz nzuc đao iz mynb njayc njemh, nănh nyăngz mynb yâuc gwăngz năngđ bah noib. ¹⁷ Yaz phătc nănh, songđ glinyf nzac nănh nyăngz staux synh ninyh, năngđ tayc nâyx, nănh yâuc nongc nănh nyăngz byaoh puf lupc yaz coong, “nongx gâyf cumh nzav, yaz six quef coonz, muf tauv stêtb mâyv woax tauh. ¹⁸ Yaz six tayc bix năngx stâyv quâyx săngh woax tauh, mangc geh yaz nâyx zanyf săngh tauv banc stâyv banc đaic. yaz nzauf yămz pâu zuc tayc nyănz ja zâyh. ¹⁹ Mâyh songđ zuc ja nâyx zanyf mâyh phătc seetb taih nyăngz dlayc, cloon đangz phanx six zuc naih seetb taih nyăngz dlayc. ²⁰ Nâyx đomc six pinyx nyăngz dlayc, âyz gâyf pây tauv nhlic zây sămz toongz, cloon nhlic nomz stingz tau, nây nhlic zây toongz six pây tauv nhlic nomz Huyđ toongh, nây nhlic nomz stingz tau, six pây tauv nhlic nomz Huyđ toongh nyăngz stynz-munh.