¹ Six coong nyâuh cloon Njâuv Zâu songc Mengc săngh, nyâuh yâuf-pez songđ joomz nyâuđ. Six nyâuh cloon Singx-lingh naih tinyh tongb, nyâuh songđ naih nyâuđ lanh Stăngz lanh, lanh ayx gongx phunz lanh. ² Jođ nyâuh yâuf-pez phunz yaz hônb hiđ tauv tauh, nyâuh six zuc hopđ stymz dlongh âyx tongh tyuh nyâuđ songc cloon Singx lingh. ³ Năngx gâyf ayx laiv hungđ wâyc tâuh cănh tuz lôif, mah six zanyb lub, six zuc lanh cloon lanh nhlimc ayx jeenz, stunx Munh năngx gongx têx pănh. ⁴ Max zâyf cungb tâuh cănh tuz lôif, six zuc naih nyâuđ nyâyh tauv pitc lanh. ⁵ Nyâuh six zuc naih stymz nyâuđ năngđ Njâuv Zâu. ⁶ Nănh lauf naih stymz nyâuđ năngđ Tênb-Hungh. Six Nănh max nzengz ayx lub. ⁷ Phunb đangz nănh naih nyăngz muif hungđ nănh nyunc quanyf nzuf, “Nănh stipx nâuh Munh nyăngz hanyh jangx stengb stâyv pênx Bamh Munh. ⁸ Six tauv nănh pênx Bamh Munh nănh nyunc ayx jeenz Mungv Zâu Tênb-Hungh nyăngz woac tauv nănh zuc tayc yămz săpc đăngc zax. ⁹ Wâyc năngđ ha Tênb-Hungh songđ pâuh nănh ayx năngx lub quaix muif hungđ. Yâuc phunz Nănh naih Manyh bux năngx lub quaix muif nomz bux. ¹⁰ Năngđ ha wâyc bongc Zâu Yê-su nyăngz bux. Yămz Tênb-toongh, yămz pâuz cloon bamh canz six zuc quâyc nzac paix Nănh. ¹¹ Năngđ naz muif lanh Munh songđ oix nhlimc Yê-su ayx Njâuv Zâu. nzâyz Gwăngz-eng taih phunz Nzangc Pha Six Zâu Tênb-Hungh. ¹² Yaz stăngz nyăngz yâuf-pez lex! Lôx noib Yaz cloon nyâuh yâuf-pez yămz woax zanyf, nyâuh yâuc Mungv Zâu nyăngz woac, six nâyx zanyf Yaz max naih mynb cloon nyâuh yâuf-pez yămz, six nyâuh lauf năngx zuc Mungv năngx gongx têx. yâuc zuc cumh nzav stynb synx ayx săngh tuz Njâuv nyăngz congz dlayc. ¹³ Wâyc zuc Zâu Tênb-Hungh muif dlih yămz nyâuh yâuf-pez nyăngz nyâuđ njaf ayx cumh pâuz. Phunz nyâuh naih stymz nyâuđ oix ayx hopđ nănh nyăngz stymz nyâuđ. ¹⁴ Ayx lungđ yâuc nongx gâyf tinyh yônx, yâuc nongx gâyf nzeetx pleov. ¹⁵ Nyâuh yâuf-pez songđ ayx Tênb-Hungh Đăngb zengh nyăngz Namh-nyâuf. Nyâuh six zuc yămz bamh canz okx njangh cuyx quaiz pamf Stoif nyăngz-Munh mungh tongx congv ayx Gwăngz năngđ stingz tau nâyx syux nănh stiz. ¹⁶ Nzônh yangh săngh Mengc nyăngz gâyf phunz nănh stiz, nyâuh năngđ nâyx ayx tauv Njâuv Zâu năngx taih woax Noib yaz songđ numđ nyađ nzongf. wâyc zuc Yaz pâyz tuz seetb jab ayx nyăngz cumh pâuz zâuđ songđ max stâyb. tinyh tâu tyuv nyăngz jau Yaz songđ tuz hingh. ¹⁷ Max cun hănđ six zoz yaz nyăngz samđ taox ănz nyâuh nyăngz stanyđ lanyh cah zâyc yaz lauf numđ nyađ bênc nyâuđ cloon nyâuh yâuf-pez. ¹⁸ Nyâuh yâuf-pez lauf zuc cloon yaz numđ nyađ. ¹⁹ Âyz Zâu Yê-su nyăngz zux ix têx! Yaz six paiđ Ti-mô-thê ninyh tauv nyâuh yâuf-pez woa năngx njâu, Yaz songđ hayh tuz numđ lănv nyâuh yâuđ-pez nyăngz jau. ²⁰ Yaz max naih laiv lanh năngđ Ti-mô-thê, Nănh cloon yaz naih stymz dlongh âyx oix nyâyh tauv nyâuh yâuf-pez ô stayx. ²¹ Pitc lanh cungb tâuh cănh tuz lôif, max nyâyh tauv Njâuv Zâu Yê-su. ²² Nyâuh yâuf-pez lauf pâyz Ti-mô-thê nyăngz stymz nyâuđ năngđ laix. Nănh cloon yaz songc congz ayx năngđ iz pha toonz nâyx. ²³ Yaz oix pâyz tuz nyâuh nyăngz jau năngx naih laiv hungđ dlayc seetb taih, Yaz songđ paiđ Ti-mô-thê ninyh nyâuh yâuf-pez woa năngx njâu. ²⁴ Yaz zeen tingc coong yaz coouv Zâu stăngc six tuz ninyh tayđ nyâuh yâuf-pez njâu. ²⁵ Yaz nyâyh taih yaz six zuc paiđ tauh pănh nyăngz yâuf-pez, Ê-ba-phô-đikv ninyh nyâuh woa bênc yaz sămv nongc nyăngz tax’ hungđ. Wâyc zuc nănh six cloon yaz congz ayx cumh pâuz nzengz max phunz cuđ jeenx tuih nyăngz Munh. ²⁶ Nănh seenz stăngz nyâuh yâuf-pez nzongf, wâyc zuc nyâuh yâuf-pez numđ lănv coong nănh săngh gumc cayx tayc gôh. ²⁷ Nănh seenz săngh gumc cayx tayc gôh, six Tênb-Hungh lauf năngx hâuđ lênh nâyx tauh nauf, yâuc năngx hâuđ lênh cloon Yaz. Phunz yaz max zuc numđ stauh pâu. ²⁸ Wâyc năngđ nâyx, Yaz songđ zuc êu nănh phunb đangz lauf. Nyâuh yâuf-pez năngx tuz pongh nănh songđ numđ Gwoanb têx, max zuc phunz pănh năngx staix numđ stauh. ²⁹ Nănh ayx tauh zeen Zâu nyăngz Munh, nyâuh zuc numđ nyađ stipx nâyx hungđ ya Munh. ³⁰ Wâyc zuc nănh sez Mengc ayx Zâu nyăngz cumh pâuz cayx tayc gôh, wâyc zuc nyâuh yâuf-pez max hayh stăngc yaz ayx. Nănh yâuc max zâuh Mengc stăngc yaz ayx.