¹ Zâu Yê-su năngx coong bux stâyb sây buz, yaz coong seenz bux nyâuh, stâuđ nây nâyx đomc munh, naih ah po quaix stâyv max zengx nzuf, songđ tuz phătc naih lanyf nyăngz Tênb-Hungh taih ayx Zâu cun munh gôh.” ² Quaix đangz joz noib, Zâu Yê-su ênz Phê-e-rơ, Gia-cơ, cloon Giăng, staox ah nomz zoongz njangb ninyh, Nănh yămz stiz woa cah đangc wav jangx.” ³ Nănh nyăngz gwuyz quav phangb pec đăngb zengh, gungh đi munh max naih mănv đuv gwuyz quav tuz pec dlăngc đăngb năngđ nâyx.” ⁴ Ê-li-ya, cloon Mô-sê hynđ seetb taih, yămz woa cloon Zâu Yê-su lănv woac.” ⁵ Phê-e-rơ coong ănz Zâu Yê-su, stênx stengb lex! Buz yămz nây seenz gongx nzongf, jođ phunz buz ayx pôz siênz njiuh, ah siênz phunz mâyh, ah siênz phunz Mô-sê, ah siênz phunz Ê-li-ya.” ⁶ Nănh stiz pôz lanh cumh nzav nzongf, Phê-e-rơ, six lôx max pâyz tuz nănh coong lungđ. ⁷ Naih ah tâu vănx nzac taih plongz nănh stiz, yâuc naih woac stingb coong yămz văn cah njaf, nây six yaz stăngz nyăngz toonz, six zuc mungv nănh nyăngz woac.” ⁸ Stâyb sây buz lênh dlih wynb mangc max phătc naih mănv, cungb phătc Zâu Yê-su ah lanh đokc cloon nănh stiz yămz woa. ⁹ Tăng woa zoongz nzac lauf woax zanyf, Zâu Yê-su zăpx êu nănh stiz nongx gâyf lănv nănh stiz phătc nyăngz dlayc bux mănv, zu tauv bamh munh nyăngz toonz tayc blătc năngx săngh phunb stengb taih nzof mănc coong, ¹⁰ “Stâyb sây buz songđ săngx nănh nâyx đomc woac, six nănh stiz năngx lanh naic lanh coong, “tayc blătc năngx săngh phunb stengb taih woax zâux woac naih nhleenz tâuv âyz gâyf?” ¹¹ Stâyb sây buz songđ naic nănh coong, “ha săngh nzaox gâyf stênx stengb bix lănv coong Ê-li-ya six zuc taih đangc?” ¹² Zâu Yê-su tauz, Ê-li-ya seenz zuc taih đangc zany muif hungđ năngđ lôx coonz nâyx, ha wâyc săngh laix Canyx-stâub bix ja coong, “bamh munh nyăngz toonz six seenz zuc tanyđ max pâyz sax hungđ zâub nanc yâuc zuc munh nzêmh? ¹³ Six yaz coong seenz bux nyâuh, Ê-li-ya bêc taih tauv nzof gôh, munh cănh dluyh âyx oix ayx peo ănz nănh tuz caux muif hungđ dlayc, năngđ Canyx-stâub ja lănv tauv nănh nâyx.” ¹⁴ Zâu Yê-su cloon woa pôz lanh stâyb sây buz lauf pongh woax đomc stâyb sây buz, phătc naih munh đungx nzongf quib nzêux nănh stiz nzuf, nănh stiz cloon woax đomc nzaox gâyf stênx stengb yămz woa stâyv gâyf.” ¹⁵ Ah yađ phătc Zâu Yê-su, nănh stiz numđ njingc nzongf, songđ coonz tyuv ninyh đeh stipx nănh. ¹⁶ Zâu Yê-su naic stâyb sây buz, nyâuh cloon nănh stiz nzengz nhleenz tâuv nâyx yeh?” ¹⁷ Yămz woa songx munh mungh tongx, naih ah lanh munh coong, “Stênx stengb lex, yaz ênz yaz nyăngz toonz taih lov mâyh, nănh zuc manđ ayx max hayh coong woac.” ¹⁸ Nănh muif hâyđ zuc manđ ayx tauv six glinyf nzac nib ninyh, tăpc nyah nhletz nhletz têx, yâuc seetb nzanh byaoc pumh pumh têx, puf staux jotx tuz jong nhlengc nzuf, yaz jođ mâyh nyăngz stâyb sây buz stăngc luiđ manđ, six nănh stiz luiđ max tuz.” ¹⁹ Zâu Yê-su tuz, nâyx yeenh stâyv max zeen nyăngz munh lex, yaz năngx zuc cloon nyâuh yămz tuz buc laiv lauh? Yaz năngx zuc yeenv nyâuh tuz tauv laiv zanyf? Ênz nănh taih nây phunz yaz zef!” ²⁰ Nănh stiz songđ ênz woax tauh toonz taih, ah yađ phătc Zâu Yê-su woax dlih, manđ ayx bây woax tauh nauf jeenz puf staux jotx jong nzuf, clinyx woa nib jâuc jâuc têx, yâuc seetb nzanh byaoc pumh pumh têx.” ²¹ Zâu Yê-su naic woax tauh nauf jeenz nyăngz pha coong, “nănh săngh năngđ nâyx lauh nzof? Nănh stiz pha tauz, nănh tăng năngx jeenz bix săngh nzof gôh.” ²² Manđ ayx nănh max pâyz sax hâyđ, glinyf nzac tâuf ninyh, yâuc quanyf nănh tuih nzac womz ninyh cayx ta hoiđ nănh, Stênx stengb năngđ hayh ayx laix zany tuz nef têx, jođ hâuđ lênh buz, yâuc stăngc buz.” ²³ Zâu Yê-su tauz, “săngh laix bix năngx coong, “mâyh hayh stăngc max hayh? Tinyh phanv toix laiv lanh zeen, muif hungđ dlayc six hayh ayx tuz nzuf.” ²⁴ Woax tauh nauf jeenz nyăngz pha lênh dlih hamv coong, “yaz zeen lêcc, six toix laiv tix yaz zeen max tauv, jođ mâyh stăngc phunz yaz hayh zeen tuz tauv!” ²⁵ Zâu Yê-su mangc phătc songx munh nzomf woa hongđ nzongf, nănh songđ mađ luiđ woax tauh manđ coong, “mâyh lâyc tauh bah noomh đungz nyăngz manđ oongx lex, yaz seetb lanyf luiđ êu mâyh tyuv năngx blătc lâyc tauh ya nauf jeenz, blătc nây mâyh max năngx tuz phunb đangz lauf nzac lâyc tauh ya munh.” ²⁶ Manđ hamv ngwăngz ngwăngz têx, songđ ayx bây woax tauh nauf jeenz puf staux jotx nzuf, stoong glekc glekc têx, manđ nzăngđ pletx seetb ninyh, woax tauh toonz cayx năngđ tayc nâyx, năngx bây munh coong nănh tayc nzof gôh.” ²⁷ Six Zâu Yê-su nzauf nănh nyăngz puf njăpc nănh nyoongz quef, nănh songđ nyoongz quef stâuđ woa.” ²⁸ Zâu Yê-su nzac pyau muf woax zanyf, stâyb sây buz nimv nimx taih naic nănh coong, “ha săngh laix buz bix luiđ woax tauh manđ max tuz nâyx loz?” ²⁹ Zâu Yê-su tauz coong, “six zuc clo Zâu nzăngđ hayh luiđ tuz woax đomc manđ seetb ninyh.” ³⁰ Ninyh gâyh woax nomz tync, Zâu Yê-su nzăngđ cloon stâyb sây buz ninyh Ga-li-lê stengv, six nănh stiz max oix bây mănv pâyz.” ³¹ Songđ wâyc nănh nzaox stâyb sây buz coong, “bamh munh nyăngz toonz, hănđ six ayx laix yâuc zuc maic, zoz jaoz phunz yămz munh nyăngz puf đi, zuc munh tayx tayc, six quaix đangz pôz noib, nănh năngx săngh phunb stengb taih.” ³² Six stâyb sây buz max saz tuz nâyx đomc woac nyăngz âyz gâyf, six stiz cumh nzav yâuc max nzađ naic nănh.” ³³ Zâu Yê-su cloon stâyb sây buz lauf tauv Ca-bê-na-um, nzac pyau muf woax zanyf, nănh naic stâyb sây buz coong, “jămc jau lauf woax zanyf, nyâuh tih nzengz nhleenz tâuv weh?” ³⁴ Six nănh max nyaoc, songđ wâyc jămc jau lauf woax zanyf, nănh stiz tih nzengz coong, “mangc jađ toix laiv lanh tuz ayx năngx lub têx. ³⁵ Nănh stâyv nzac, êu woa săpc nyâyc lanh stâyb sây buz taih, bux coong, “toix laiv lanh oix ayx pyây, six zuc ayx cah đany, yâuc zuc ayx songx munh nyăngz pâuz. ³⁶ Zâu Yê-su songđ jinđ ah tauh munh sây taih, jom nănh nyoong quef stâuđ stâyb sây buz mungh tongx congv.” ³⁷ Toix laiv lanh tym yaz nyăngz bux stipx ah tauh munh sây jeenz năngđ nâyx tauh sây nâyx têx, woax tauh six stipx yaz. Toix laiv lanh stipx yaz, nănh six stipx paiđ yaz taih woax tauh, nănh max zâyf cungb stipx yaz.” ³⁸ Giăng coong bux Zâu Yê-su, “Stênx stengb lex, buz phătc naih ah lanh munh nongc mâyh nyăngz bux luiđ manđ, buz bix cangđ max phunz nănh ayx, songđ wâyc nănh max lêpc pănh.” ³⁹ Zâu Yê-su tauz, “năngx gâyf cangđ nănh, songđ wâyc max naih mănv hayh nongc yaz nyăngz bux ayx jix caox njingc, blătc ah zanyf têx, bix zâyf năngx coong peo ănz yaz đêh.” ⁴⁰ Toix laiv lanh max zengv pănh, six cloon pănh ayx ah đomc. ⁴¹ Yaz coong seenz bux nyâuh, toix laiv lanh tym yaz nyăngz bux phunz ah zan womz nyâuh hopb, nănh six săngh tuz Njâuv nyăngz munh, woax tauh nyăngz phănc seenz max tuih.” ⁴² Năngđ toix laiv lanh jaf zeen yaz nâyx đomc ah lanh munh sây jeenz pamf stoif têx, six zoz njauz mac đyux ănz nănh nyăngz clangz đi pungx ănz nzac coiđ gwâyc ninyh, six năngx gongx têx phunz nănh săngh.” ⁴³ Năngđ coong nyâuh nyăngz puf jaf nyâuh pamf stoif nef têx, six zuc cumv quanyf, stoc ah saz puf, bix tuz stâyv quâyx nyăngz mengc, six năngx gongx tex, naih dloih iz saz puf, bix zuc quanyf ănz nzac tâuf coiđ ninyh, yămz woa tâuf stâyv quâyx max hayh tayc.” ⁴⁴ Yămz woa naih jengz stayv yâuc max tayc, tâuf yâuc max jac.” ⁴⁵ Năngđ coong nyâuh nyăngz staux jaf nyâuh pamf stoif, six zuc zăm quengx, stoc ah saz staux bix tuz mengc săngh six năngx gongx têx, naih dloih iz saz staux bix zuc bomf ănz nzac tâuf coiđ ninyh. ⁴⁶ Yămz woa six naih jengz stayv yâuf max tayc, tâuf yâuf max jac. ⁴⁷ Năngđ coong nyâuh nyăngz mâyc hox nyâuh pamf stoif, six zuc ngwâyz quengx, stoc ah nomz mâyc bix tuz nzac Tênb-Hungh nyăngz côkz, six năngx gongx têx, naih dloih iz nomz mâyc bix zuc quanyf ănz nzac tâuf coiđ ninyh.” ⁴⁸ Yămz woa naih jengz stayv yâuc max tayc, naih tâuf yâuc max jac.” ⁴⁹ Songđ wâyc muif lanh munh six zuc nongc tâuf stynx, yâuc nongc đau ipx.” ⁵⁰ Đau six gongx, six coong năngđ bây đau nyăngz mic toiv stam, ayx laix năngx hayh ayx tuz đau đaih yeh? Nyâuh hopđ zuc naih đau nyăngz mic camz yămz nyâuh nyăngz nyâuđ cah njaf, yâuc hopđ stymz tongh âyx yămz.”