2 ¹ Zâu Yê-su stengb stâyv yămz Yu-đê stengv, Bêtv-le-hem muôngf toix Hê-lôtv ayx hungh woax nzêuh, blătc woa naih ah đomc tongb manyh stênx stengb tăng tongz phanx taih tauv Ye-lu-sa-lem stengv. ² Zah naic, “stengb stâyv taih ayx Yiu-thai munh nyăngz Hungh woax tauh munh sây yămz laiv? Buz phătc nănh nyăngz stingz tau tăng tongz phanx seetb taih, buz bix taih lov paix nănh. ³ Hê-lôtv hungh numđ nâyx đomc woac, nănh nyâuđ max gwoanb tiny stăngv. njynh yămz Ye-lu-sa-lem stengv nyăngz songx munh yeetx stong nyâuđ yâuc max gwoanb tiny stăngv. ⁴ Hê-lôtv Hungh songđ êu Yiu-thai munh, cloon nzaox gâyf stênx stengb cloon stayb-munh taih căpx dlonf dloih woa songđ naic nănh stiz, “Njâuv Zâu stengb stâyv taih yămz laiv tix loz? ⁵ Nănh stiz tauz, yămz Yu-đê stengv, bêtv-le-hem muôngf, songđ wâyc tâuc woac munh ja coong nâyx. ⁶ Yămz Yu-đê stâyz phangz Bêtv-le-hem muôngf nyăngz stâyz phangz lub lex! Mâyh max zâyf năngx jeenz têx, Songđ Wâyc naih ah tauh đaic quanz seetb taih yeenv nănh nyăngz pec stingx Y-sa-la-ên munh. ⁷ Hê-lôtv hungh songđ êu woax đomc tongb manyh stênx stengb taih nimv nimx naic nănh stiz woax nomz stingz tau six tăng laiv zanyf seetb taih. ⁸ Naic nzuf Hê-lôtv hungh songđ êu nănh stiz ninyh Bêtv-le-hem nănh bux coong, “nyâuh phanv ninyh lov woax tauh munh sây năngx gongx, lov pongh bix lauf bux yaz, yaz nzăngđ hayh ninyh paix nănh. ⁹ Mungv hungh stix bux nzuf nănh stiz songđ seetb jau ninyh, tăng tongz phanx seetb woax nomz stingz tau ninyh đangc nănh stiz, ninyh tauv woax tauh munh sây yămz woax nomz tync cah zâyc songđ yămf woa. ¹⁰ Woax đomc stênx stengb phătc woax nomz stingz tau, nănh stiz seenz numđ nyađ nzongf. ¹¹ Nzac pyau ninyh phătc woax tauh munh sây cloon nănh nyăngz nzif Ma-li-ya stiz songđ quâyc nzac nib paix woax tauh sây, năngx zoz nănh stiz nzâyz taih nyăngz sămz cloon (zâmh hương) cloon (nhựa thơm) njăngx stungz đangz stungx phunz nănh. ¹² Zâu Tênb-Hungh pooux bâyx coong bux woax đomc stênx stengb, “nyâuh năngx gâyf muf Hê-lôtv woa, nănh stiz songđ quaix pitc stynz jau muf nănh stiz nyăngz stâyz phangz. Yô-sepv tyuv ninyh Y-yiêpv-tô stâyz phangz ¹³ Woax đomc stênx-stengb muf blătc nzof, naih ah tauh Zâu nyăngz stynz-munh taih pooux bâyx coong bux Yô-sepv, “nyoongz quef ênz nâyx tauh sây cloon nănh nyăngz nzif tyuv ninyh Y-yiêpv-tô stâyz phangz, yămz woa zu tauv yaz bux mâyh, songđ wâyc Hê-lôtv hungh cayx lov nâyx tauh sây tayx. ¹⁴ Yô-sepv songđ nyoongz quef njynh nzămc ênz nâyx tauh sây cloon nănh nyăngz nzif tyuv ninyh Y-yipv-tô stâyz phangz. ¹⁵ Yămz woa zu tauv Hê-lôtv hungh tayc blătc, nâyx đomc dlayc seetb taih toix nzuf tâuc woac munh coong nyăngz woac. Nănh coong, “Yaz êu yaz nyăngz toonz yămz Y-yiêpv-tô stâyz phangz seetb taih.” Hê-lôtv hungh tayx munh sây toonz ¹⁶ Hê-lôtv pâyz coong woax đomc stênx stengb jaf nănh, nănh seenz siv nhleenx nzongf, songđ seetb lanyf tayx nzuf iz nyăngv cah đi nyăngz munh sây toonz, Yămz Bêtv-le-hem muôngf, cloon cah synh woax đomc munh sây, six âyz nănh naic woax đomc stênx stengb tăng woax zanyf stunx staox taih. ¹⁷ Nâyx đomc dlayc seetb taih toix nzuf woax tauh tâuc woac munh Yê-lê-mi Coong nyăngz woac. Yê-lê-mi coong. ¹⁸ Numđ munh yămz woa Lô-ma stengv pungx stingb haoh ngwoăngz ngwoăngz têx, La-sên haoh six wâyc nănh nyăngz sây tayc, nănh yâuc max nongc mănv stăngc nănh zay stauh, wâyc zuc nănh nyăngz sây tayc nzuf max naih nzof. (Yê-lê-mi 31:15-) Yô-sepv buz tăng Y-yiêpv-tô phunb đangz lauf ¹⁹ Hê-lôtv hungh tayc blătc nzof, yămz Y-yiêpv-tô stâyz phangz naih ah tauh Zâu nyăngz Stynz-munh taih pooux bâyx bux Yô-sepv. ²⁰ Stynz-munh coong, “nyoongz quef ênz nâyx tauh sây cloon nănh nyăngz nzif phunb đangz muf Y-sa-la-ên stâyz phangz gôh, songđ wâyc oix tayx nâyx tauh sây woax đomc munh tayc blătc nzof gôh. ²¹ Yô-sepv songđ nyoongz quef ênz nâyx tauh sây cloon nănh nyăngz nzif phunb đangz lauf Y-sa-la-ên stâyz phangz. ²² Six Yô-sepv numđ lănv coong, “A-zê-la-u stipx nănh nyăngz pha, Hê-lôtv ayx Yu-đê stengv nyăngz hungh, Yô-sepv songđ cumh nzav max nzađ muf woa. Tênb-Hungh pooux bâyx bux Yô-sepv buz, Yô-sepv buz songđ max nzađ muf Ga-li-lê stengv. ²³ Nănh stiz ninyh yămz woax nomz stengv bux hipđ ayx Na-sa-letv, nâyx đomc dlayc seetb taih toix nzuf tâuc woac munh coong nyăngz woac, munh oix hipđ nănh ayx Na-sa-letv munh. Ayx quaix womz nyăngz gâyf woax tauh Giăng ayx cumh pâuz (Makv 1:1-8; Lu-ca 3:1-18; Giăng 1:19-28)