¹ Zâu Yê-su tăng woa zoongz nzac lauf woax dlih, naih munh ninyh lêpc nănh đungx nzongf. ² Naih ah lanh munh săngh maoh pongz gumc, taih quâyc nzac nănh nyăngz cah đangc ninyh coong, “Zâu lex! Mâyh Năngđ oix têx, mâyh six hayh zany tuz yaz nyăngz gumc gongx. ³ Zâu Yê-su stungb puf laoz nănh yâuc coong, “yaz oix zany lêc, mâyh nyăngz gumc gongx gôh, woax lanh munh nyăngz gumc lênh dlih gongx nzuf. ⁴ Zâu Yê-su bux nănh coong, “năngx gâyf lănv bux mănv bex! Muf zac stayb munh woa phunz nănh stiz mangc yâuc âyz Mô-sê nyăngz gâyf nzâyz stanyb lanyh ninyh congx phunz Zâu Tênb hungh, wâyc ayx zanyx manyf phunz nănh stiz pâyz tuz mâyh nyăngz gumc gongx. ⁵ Zâu Yê-su nzac Ca-bê-na-um woax dlih, naih ah tauh Lô-ma pengz pyây taih jođ nănh stăngc, ⁶ “Pengz pyây coong, “Zâu lex! Yaz nyăngz pâuz săngh gumc quac phâyx woa pyau dlauc wâyb nzongf. ⁷ Zâu Yê-su tauz Coong, “yaz oix ninyh zany nănh năngx gongx. ⁸ Pengz pyây coong, “Zâu lex! Yaz max payh tuz stipx mâyh nzac yaz nyăngz pyau, mâyh cungb coong woac seetb yaz nyăngz pâuz six tuz gumc gongx nzof gôh. ⁹ Yaz zuc yămz pitc tauh pengz nyăngz puf đi, yâuc năngx naih đungx lanh pengz yămz yaz nyăngz puf đi. Yaz êu nâyx tauh ninyh, nănh yâuc zuc ninyh, yaz êu woax tauh lauf nănh yâuc zuc lauf. Yaz êu yaz nyăngz nâuh ayx lungđ, nănh yâuc zuc ninyh ayx. ¹⁰ Zâu Yê-su numđ nănh coong nâyx đomc woac, nănh seenz numđ njingc nzongf, songđ coong bux lêpc nănh woax đomc munh, “njynh I-sa-la-ên munh yaz max zengx phătc naih laiv lanh zeen tuz gongx năngđ nâyx tauh ya munh. ¹¹ Yaz lănv bux phunz nyâuh yâuf pez ô stayx pâyz, naih munh tăng tongz phanx, cloon stez phanx taih cloon Apv-ra-ham, I-sakc, Ya-côpv yămz Tênb-toongh Côkz songc hynh nhlync năngv. ¹² Woax đomc hopđ zuc tuz yămz Tênb-toongh Côkz, nănh stiz yâuc zuc luiđ seetb cungh ngwoaic ninyh yămz njih nzămc tync, pungx stingb haoh yâuc zuc tăpc nyah tanyc. ¹³ Zâu Yê-su bux pengz pyây coong, “muf pyau gôh, âyz mâyh zeen nyăngz jau, seenz naih dlayc seetb taih năngđ nây nâyx.” toongx woax dlih nănh nyăngz pâuz songđ tuz gumc gongx nzuf. ¹⁴ Zâu Yê-su nzac Phê-e-rơ nyăngz pyau ninyh, phătc Phê-e-ơ nyăngz Nzif ti săngh gumc phâyx woa zâuv stynb joomz bongh. ¹⁵ Yê-su nzauf nănh nyăngz puf, gumc lênh dlih gongx nzuf, nănh songđ nyoongz quef bokc dlic Zâu Yê-su buz. ¹⁶ Woax noib gungh cayx nzămc, munh ênz woax đomc zuc manđ wâyb nyăngz munh taih lov Zâu Yê-su đungx nzongf, nănh cungb coong ah zâux woac cungv, songđ luiđ tuz manđ seetb nzuf, zany tuz muif hungđ gumc gongx nzuf phunz nănh stiz. ¹⁷ Nănh ayx nâyx đomc dlayc seetb taih toix nzuf tâuc woac munh Ê-sai coong nyăngz woac, nănh đamz bamh munh nyăngz gumc, yâuc tayv bamh munh nyăngz staiz nanc. ¹⁸ Zâu Yê-su phătc munh đungx taih wâyh nzêux nănh, nănh songđ bux stâyv sây buz ênz nănh clangv quaix woax nganc lepb coiđ synh ninyh. ¹⁹ Naih ah tauh nzaox gâyf stênz stengb taih lov nănh yâuc coong, “Stênx stengb lex! Max cun mâyh hănđ ninyh laiv yaz lauf cayx lêpc mâyh ninyh.” ²⁰ Zâu Yê-su tauz nănh, “njab clô naih njauz ngamh yămz, noc yâuc naih njauf yămz. Six yaz bamh munh nyăngz toonz max tync nzomx pyây. ²¹ Woax đomc stâyb sây naih ah lanh taih bux nănh coong Zâu lex! Jođ phunz yaz muf plopx yaz nyăngz pha đangc. ²² Zâu Yê-su tauz nănh coong, “phanv taih lêpc yaz, dluyh pyenz munh tayc cănh plopx munh tayc. ²³ Zâu Yê-su nzac đangđ woax dlih, stâyb sây buz yâuc lêpc nănh ninyh. ²⁴ Tâuc đangđ ninyh woax dlih, max săngx buôngh naih ah tâuc nzaox lub vănc womz gapb longc nzac đangđ njaf ninyh. Six Zâu Yê-su phâyx woa đangđ njaf mâyc njoomh. ²⁵ Stâyb sây buz ninyh êu nănh đyub taih yâuc coong, “Zâu lex! Njâuv buz nyăngz mengc đôih. pănh cayx tuih womz tayc nzuf gôh. ²⁶ Zâu Yê-su tauz nănh stiz, Nyâuh săngh laix bix cumh nzav? Nyâuh nyăngz seenz stymz zeen tuz hanyb nâyx yeh? Nănh songđ nyoongz quef êu nzaox cloon womz tingc, muif hungđ lênh dlih tingc stingb njâuh nzuf. ²⁷ Stâyb sây buz nyâyh ganc songđ lanh naic lanh Coong, “lâyc tauh munh six mănv bix njynh womz cloon nzaox yâuc mungv nănh nyăngz woac nâyv? ²⁸ Zâu Yê-su buz clăngv Quaix woax nganc lepb wăngx jeenz synh ninyh tauv Ga-đa-la stâyz phangz, pongh iz lanh blaz manđ nyăngz munh tăng woa stâu jêmh seetb taih, nănh stiz huđ nzongf max naih mănv nzađ pitb woax stinz jau. ²⁹ Nănh stiz hamv Coong, “Tênb-Hungh nyăngz toonz lex! Mâyh cayx taih buz nây ayx lungđ? Mâyh taih nây wâyb buz mah? Six max zengx tauv săngx huđ tingc buz nef? ³⁰ Naih ah peob tungf yămz woa lov nhlync gâyh batz côz. ³¹ Woax đomc manđ songđ jođ Zâu Yê-su coong, “mâyh năngđ luiđ buz seetb ninyh bix phunz buz ninyh nzac woax peob tungf bef! ³² Zâu Yê-su seetb lanyf coong, “ninyh gôh stac! Manđ seetb gâyh woa iz lanh munh songđ ninyh nzac woax peob tungf, njynh woax peob tungf đanyz ngoom tuih womz tayc nzuf. ³³ Jămđ tungf nyăngz munh tyuv muf woa stengv lănv nâyx đomc dlayc bux munh, cloon woa iz lanh blaz manđ woax đomc munh nyăngz dlayc. ³⁴ Njynh săngh nomz stengv munh tinyh ênz seetb ninyh lov Zâu Yê-su, lov pongh nănh, nănh stiz jođ êu Zâu Yê-su ninyh năngx blătc stiz ngăngz căpx caix.