¹ Zâu Yê-su tăng woa layf paix pyau seetb taih woax zanyf, stâyb sây buz nuz quaix woa layf paix pyau cah synh woax đomc pyau phunz nănh mangc. ² Zâu Yê-su naic coong, ‘nyâuh phătc lâyc đomc pyau max? Yaz coong seenz bux nyâuh, lâyc đomc pyau naih ah noib six zuc zeb huđ nzuf pênx pyau huđ, njynh max naih ah nomz njauz tih clapb tăpx ănz lâyc. ³ Zâu Yê-su stâyv woa Ca-lanv zoongz woax zanyf, stâyb sây buz lanyc taih naic nănh, jođ Zâu bux bây buz pâyz woax đomc dlayc tauv laiv zanyf nzăngđ seetb taih? Mâyh nyăngz săngx huđ taih tauv woax noib, naih toix laiv hungđ dlayc seetb taih nongc ayx njih houc? ⁴ Zâu Yê-su bux Coong, “zuc buôngh stymz, năngx gâyf bây munh jaf zuc nyâuh. ⁵ Hayh naih munh đungx nongc yaz nyăngz bux jaf munh coong, “yaz six seenz zâyf Njâuv Zâu gôh.” ⁶ Tauv woax zanyf, nyâuh numđ đâuf munh tinyh bopc zax nyăngz jeenx six nyâuh năngx gâyf cumh nzav, nâyx đomc dlayc hănđ six ayx laix lauf zuc naih seetb taih. Six lauf max zengx tauv stêtb mâyv nyăngz noib.” ⁷ Nâyx stingx munh cloon woax stingx munh max tinyh zuc, nâyx nomz Côkz cloon woax nomz Côkz max tinyh zuc. Naih lauh đoif pongh zuc nyâuđ sab, naih đungx đoif pongh zuc nib tongf” ⁸ Nâyx đomc dlayc seetb taih stunx coong môtc zapz nyăngz noib quef coonz tauv.” ⁹ Tauv woax zanyf, nyâuh zuc zoz jaoz phunz munh huđ munh ayx peo, ah phanx wâyc yaz zuc tayx tayc, ah phanx wâyc yaz zuc munh hănđ.” ¹⁰ Woax zanyf naih munh đungx quengx max zeen yaz, lanh hănđ lanh.” ¹¹ Yâuf năngx naih za tâuc woac munh đungx seetb taih jaf munh đungx ninyh longđ jau.” ¹² Okx njangh nyăngz dlayc pumh staox taih, ayx phunz tinyh stăngz jau nămx nzac.” ¹³ Six laiv lanh tanyđ tuz tauv tauh six tuz Njâuv. ¹⁴ Tênb-toongh Côkz nyăngz Cuđ jeenx lănv pong nây Gungh đi, wâyc ayx zanyx manyf phunz muif stingx đâuf munh pâyz, nzof nzăngđ tauv stêtb mâyv noib gôh.” ¹⁵ Nyâuh tuz phătc quaix Đa-ni-ên stênx stengb coong seetb taih nyăngz dlayc, Naih ayx phunz muif hungđ huđ woax tauh okx Hungh yămz đăngb zengh tync, toc stâub nyăngz munh six zuc pâyz nâyx đomc dlayc.” ¹⁶ Yămz Yu-đê stengv woax đomc munh zuc tyuv staox woa zoongz ninyh.” ¹⁷ Laiv lanh yămz woa pyau tungx, six max tuz nzac pyau muf zoz laiv hungđ nzâyz ninyh. ¹⁸ Laiv lanh yămz jêmh đi, six max tuz muf pyau zoz gwuyz quav nzâyz ninyh. ¹⁹ Woax đomc noib, naih sây nyăngz munh nzif, cloon naih sây hopb nu nyăngz munh nzif. Seenz six dlaoc wâyb nzongf!” ²⁰ Tauv nyâuh tyuv mem nyăngz săngx huđ, six zuc jođ Zâu Tênb-Hungh năngx gâyf bây toix zuc tongz dlih gungh. Mah six toix tingc congz noib. ²¹ Tauv woax zanyf naih tumx staiz nanc, tăng quef coonz zaoc gungh nib woax dlih taih tauv nâyx zanyf, max zengx naih quaix năngđ nâyx hâyđ. Blătc nây staox ninyh songđ lauf max naih năngđ nâyx nzof gôh. ²² Six coong Zâu Tênb-Hungh năngđ max phunz nâyx đomc staiz nanc nyăngz noib lav stoc nzac, six max naih laiv lanh hayh tuz mengc săngh. ²³ Woax zanyf năngđ naih laiv lanh bux nyâuh coong, “Njâuv Zâu yămz nây, mah six yămz woa, six max cuyb zeen.” ²⁴ Songđ wâyc hayh naih za Njâuv Zâu, cloon za stênx stengb hynđ seetb taih, ayx jix-caox njingc lub nzongf jaf munh đungx. Nănh stiz năngx hayh jaf cloon tuz sên taih nyăngz munh. ²⁵ Mungv bef! Nâyx đomc dlayc max zengx naih seetb taih yaz bêc lănv bux quaix đangc nzof bef! ²⁶ Năngđ naih munh bux nyâuh coong, “wef nănh yămz woa stâyz phangz blănf, yâuc max cuyb zeen bix ninyh lov nănh, mah six coong, “wef! Nănh yămz woa pyau njaf yâuc năngx gâyf zeen.” ²⁷ Songđ wâyc bungh bitc tâuf gwăngz nzăpc tăng tongz phanx, ninyh tauv stez phanx woax zanyf, tauv yaz bamh munh nyăngz toonz taih woax zanyf lauf năngđ woa nâyx.” ²⁸ Tax hungđ tayc yămz toix laiv tix, clang lub six ninyh dlonf yămz woa.” ²⁹ Woax đomc staiz nanc nyăngz noib ah blătc têx, bah noib songđ nzămc mengh, lav yâuc max syux gwăngz, yămz gungh nyăngz stingz tau tuih nzac nib taih nzuf, yămz gungh naih quyênh naih lanyf nyăngz muif hungđ yâuc đănz tongf.” ³⁰ Woax zanyf, yaz bamh munh nyăngz toonz, nyăngz njih houc songđ hynđ seetb taih yămz woa Gungh, Gungh đi muif stingx đâuf munh songđ pungx stingb haoh, nănh stiz songđ tuz phătc yaz bamh munh nyăngz toonz naih lanyf cloon gwăngz-eng zâyh vănx tăng woa gungh nzac taih.” ³¹ Naih blungh blex buib woax zanyf, yaz songđ paiđ yaz nyăngz Stynz-munh ninyh tauv pyâyz phangz gungh coonz, tăng nâyx phanx ninyh tauv woax phanx gungh coonz sâub dlonf yaz sên taih nyăngz munh.” ³² Nyâuh zuc nongc vănx tauh njăngx hođ ah tyuh woac pây, nyâuh phătc njăngx seetb tunb goib noomh gunx, nyâuh songđ pâyz tuz cayx tauv hakc quayx gôh.” ³³ Lauf năngđ naz, nyâuh phătc nâyx đomc muif hungđ dlayc seetb taih, nyâuh songđ pâyz tuz yaz bamh munh nyăngz toonz taih tauv stătx, songđ taih tauv woa jengh cah đangc.” ³⁴ Yaz coong seenz bux nyâuh, nâyx nzêuh munh quaix stâyv max zengx nzuf, nâyx đomc dlayc songđ seetb taih gôh. ³⁵ Gungh nib zuc quaix zuc nzuf, six yaz nyăngz woac stâyv quâyx yămz.” ³⁶ Woax noib, woax săngx huđ max naih laiv lanh pâyz, njynh yămz Tênb-toongh nyăngz stynz-munh lauf max pâyz, toonz lauf max pâyz, cungb Pha ah lanh pâyz cungv.” ³⁷ Nô-ya woax Nzêuh Gungh đi năngđ laix, tauv yaz bamh munh nyăngz toonz taih woax zanyf, lauf năngđ woa nâyx.” ³⁸ Bungc womz max zengx yămx Gungh đi woax zanyf, bamh munh yâuc cungb lov nhlync, lov hopb, pungx sab ayx coonx, tuz tauv Nô-ya nzac Đangđ woax noib.” ³⁹ Nănh stiz max pâyz tuz bungc womz hayh yămx tuz tauv nănh stiz cutb ninyh nzuf, tauv yaz bamh munh nyăngz toonz năngx taih woax zanyf lauf năngđ woax nâyx.” ⁴⁰ Woax zanyf, naih iz lanh munh yămz woa njăngx, tuz stipx ah lanh muf, quengx ah lanh ănz woa.” ⁴¹ Năngx naih iz lanh munh nzif yămz woa mah tungh mâyf, tuz stipx ah lanh ninyh quengx ah lanh ănz woa.” ⁴² Năngđ naz nyâuh six zuc jâuz stymz buôngh zu, songđ wâyc nyâuh max pâyz tuz nyâuh nyăngz Zâu toix laiv zanyf taih tauv.” ⁴³ Nyâuh zuc pâyz nâyx đomc dlayc, pyau Zâu năngđ coong pâyz tuz stac munh toix laiv zanyf oix taih, pyau Zâu six pâyz buôngh leđ max phunz stac munh nzac pyau taih.” ⁴⁴ Năngđ naz nyâuh six zuc muif dlih canyz nyâuđ buôngh zu nyâuh nyăngz Zâu, songđ wâyc nyâuh max săngx tuz woax zanyf, yaz bamh munh nyăngz toonz songđ taih tauv gôh.” ⁴⁵ Laiv lanh ayx nyâuđ zanyx nyăngz pâuz, woax tauh six tuz Zâu paiđ cun nănh nyăngz pyau munh, âyz muif săngx huđ patz nhlync hopb phunz nănh stiz toix săngx huđ.” ⁴⁶ Pyau Zâu lauf tauv mangc phătc pâuz buz ayx tuz nyâuđ zanyx, nănh stiz nyăngz Zâu seenz numđ nyađ nzongf.” ⁴⁷ Yaz coong seenz bux nyâuh, Zâu six oix phunz woax tauh nyâuđ zanyx nyăngz pâuz cun nzuf nănh nyăngz jax toongx.” ⁴⁸ Six năngđ coong toix woax tauh pâuz max gongx, nănh yămz nyâuđ nyâyh coong, “yaz nyăngz Zâu max zengx lauf căn đêh.” ⁴⁹ Nănh songđ nyoongz quef coib puf bopc pitc tauh pâuz, yâuc cloon hopb tyu bynz nyăngz munh songc nhlync hopb.” ⁵⁰ Pâuz yâuc max săngx tauv noib săngx huđ, nănh nyăngz Zâu phunb đangz lauf tauv. ⁵¹ Zâu songđ bopc nănh topz clangz neng, yâuc luiđ nănh ninyh cloon pâyh zac nyâuđ ngokx nyăngz munh yămz woa, pungx stingb haoh yâuc tăpc nyah tanyđ.”