¹ Woax zanyf stâyb sây buz taih naic Zâu Yê-su coong, “yămz woa Tênb-toongh Côkz laiv lanh ayx năngx lub têx? ² Zâu Yê-su songđ êu ah lanh munh sậy jeenz taih stâuđ stâyb sây buz nyăngz mungh tongx congv. ³ Yaz coong seenz bux nyâuh, năngđ coong laiv lanh max coi nyâuđ wănc stymz năngđ nâyx tauh munh sây, nyâuh six max tuz nzac Tênb-toongh Côkz. ⁴ Laiv lanh năngđ cănh nhlimc ayx jeenz năngđ nâyx tauh munh sây, yămz woa Tênb-toongh Côkz woax tauh six tuz ayx năngx lub quaix. ⁵ Laiv lanh tingz yaz nyăngz bux stipx ah tauh munh sây năngđ nâyx tauh munh sây, woax tauh lauf stipx yaz. ⁶ Năngđ Coong laiv lanh jaf zeen yaz nâyx đomc munh sây stăm pamf stoif têx, six zoz njauz mac đyux ănz nănh nyăngz clangz đi pungx nzac coiđ tay ninyh six năngx gongx têx. ⁷ Six wâyc woax đomc jaf munh pamf stoif nyăngz dlayc bamh canz songđ zuc dlaoc wâyb, jaf munh pamf stoif nyăngz dlayc muif dlih naih seetb taih, six jaf munh pamf stoif woax tauh songđ zuc zâuđ gôh. ⁸ Six Coong nyâuh nyăngz puf staux jaf nyâuh pamf stoif, six zuc cumv quanyf, stoc ah saz puf staux, six năngx gongx têx naih dloih iz saz puf staux bix zuc quanyf ănz stâyv quâyx max hayh tayc nyăngz tâuf coiđ ninyh. ⁹ Năngđ coong nyâuh nyăngz mâyc jaf nyâuh pamf stoif six ngwoai ayx quengx, stoc ah nomz mâyc bix tuz Stâyv quâyx nyăngz mengc six năngx gongx têx naih dloih iz nomz mâyc bix zuc quanyf ănz tâuf coiđ. ¹⁰ Six zuc buôngh stymz, năngx gâyf mangc stam nâyx đomc munh laiv lanh, pănh nyăngz Stynz-munh muif dlih yămz woa tênb-toongh Côkz phătc nzangc Pha nyăngz mynb. Wâyc zuc yaz bamh munh nyăngz toonz taih Njâuv gaih jêmh nyăngz munh. ¹² Nyâuh nyâyh ayx laix? Năngđ coong naih ah lanh munh naih ah pez tauh Pa-jiz yungh, bix bây zuc ah tauh gaih jêmh, nănh six ayx laix? Nănh max zâyf quanyf woa zu săpc zu tauh ănz woa đungc, bix ninyh lov woax tauh gaih jêmh mah? ¹³ Six yaz coong seenz bux nyâuh, nănh ninyh lov tuz pongh woax tauh gaih jêmh, nănh năngx numđ nyađ têx, woa zuz săpc zu tauh max gaih jêmh. ¹⁴ Hănđ six nyâuh nyăngz Tênb-toongh Pha lauf năngđ naz, nănh max oix nongc nâyx đomc munh sây jeenz zuc gaih jêmh. ¹⁵ “Năngđ coong nyâuh nyăngz yâuf pez ayx peo nyâuh, nyâuh six stingb njâuh ninyh bux nănh, six coong nănh năngđ mungv nyâuh têx, nyâuh six năngx tuz nănh ayx yâuf pez. ¹⁶ Six coong nănh năngđ max mungv nyâuh, nyâuh nzof mănc lov ah lanh iz lanh munh ninyh ayx zanyx manyf mungv woac. ¹⁷ Six coong nănh năngđ năngx staix max mungv nănh stiz têx, six zuc lănv nănh woax đomc dlayc bux Huyđ toongh munh, nănh năngđ năngx staix max mungv tymb têx, six stunx nănh năngđ max zeen Zâu nyăngz munh. Yâuc năngđ sâub sôiv munh nâyx. ¹⁸ Yaz coong seenz bux nyâuh, nyâuh stayb laiv hungđ yămz nây bamh canz, yămz woa tênb-toongh lauf stayb woax hungđ, nyâuh pungx laiv hungđ yămz nây bamh canz, yămz woa Tênb-Toongh lauf pungx woax hungđ. ¹⁹ Yaz năngx bux nyâuh ah hâyđ tymb, six coong năngđ naih iz lanh munh yămz nây bamh canz tongh nyâuđ jođ laiv hungđ, yaz nyăngz Tênb-toongh Pha songđ sađ woax hungđ phunz nănh stiz. ²⁰ Songđ wâyc yămz laiv tix naih iz pôz lanh munh căpx dlonf tingz tauv yaz nyăngz bux, yaz lauf yămz nănh stiz mungh tongx. ²¹ Phê-e-rơ taih naic Zâu Yê-su, Zâu lex! Năngđ coong yaz nyăngz yâuf pez muif dlih ayx peo yaz, yaz six zuc quanyf stoif phunz nănh stiz sax hâyđ tuz loz? Nhlic hâyđ tuz max? ²² Zâu Yê-su bux coong, yaz max zâyf cungb êu quanyf nhlic hâyđ, six zuc quanyf jeetx săpc đomc nhlic hâyđ.” ²³ Wâyc zuc Tênb-toongh Côkz six năngđ ah tauh Hungh cloon nănh nyăngz pâuz stunx zaix tanz. ²⁴ Quef Coonz stunx zaix woax zanyf, munh ênz ah tauh pâuz taih, woax tauh pâuz sămv Hungh stix, ah panc stynh. ²⁵ Woax tauh pâuz yâuc max naih lungđ clao zaix, Hungh stix songđ seetb lanyf êu munh ênz nănh nzâyz ninyh maic, maic njynh cloon nănh nyăngz au sây jax toongx nzuf nzâyz woax đomc nyanh taih nongc clao zaix. ²⁶ Woax tauh pâuz songđ quâyc nzac jođ nănh nyăngz Zâu coong, “jođ Zâu nyangc phunz yaz đangc, zu yaz lov tuz nzof mănc clao năngx nzuf. ²⁷ Woax tauh Zâu songđ numđ hâuđ lênh, Quanyf zaix phunz nănh phunb đangz muf. ²⁸ Woax tauh pâuz phunb đangz muf pongh ah tauh pâuz toic, sămv nănh ah pez đơ-ni-ê, nănh lênh dlih ninyh topz woax tauh pâuz nyăngz clangz neng songđ coong ănz, “mâyh sămv yaz nyăngz zaix mâyh clao yaz căn. ²⁹ Woax tauh pâuz toic songđ quâyc nzac jođ nănh coong, “jođ tah nyangc phunz yaz đangc, zu yaz lov tuz nyanh, yaz mănc clao năngx nzuf. ³⁰ Six nănh max nyangc phunz, songđ ênz woax tauh toic ninyh clangđ ănz nzauh, zu tauv nănh clao zaix nzuf. ³¹ Pitc tauh pâuz mangc phătc nănh ayx max hođ, nănh stiz numđ munz stymz songđ ninyh lănv nănh ayx nyăngz dlayc bux nănh stiz nyăngz Zâu. ³² Nănh nyăngz Zâu songđ êu munh ênz nănh taih coong ănz nănh, mâyh lâyc tauh đokc nzongf nyăngz pâuz lex! Mâyh sămv yaz nyăngz zaix, mâyh max naih lungđ clao yaz, yaz nyangc tuz phunz mâyh nzuf. ³³ Six nyâuh tinyh đoih ayx pâuz toic, mâyh songđ zuc hâuđ lênh nănh năngđ yaz hâuđ lênh mâyh nâyx sta? ³⁴ Nănh nyăngz Zâu siv nhleenx nzongf! Songđ êu cun nzauh quanz taih ênz nănh ninyh wâyb, tuz tauv nănh clao zaix nzuf.” ³⁵ Six coong nyâuh năngđ max naih stymz nyâuđ quanyf stoif phunz nyâuh nyăngz yâuf pez têx, nyâuh nyăngz Tênb-toongh Pha lauf max quanyf stoif phunz nyâuh.