¹ Yaz stăngz nyăngz yâuf pez lex, nyâuh zeen gwăngz-eng nyăngz Zâu Njâuv Zâu Yê-su, Năngx gâyf mangc laiv tauh nyăngz mynb mâyc. ² Six coong năngđ naih laiv lanh munh zuz gwuyz quav saix quai, yâuc tăngh sămz bah đoz quynb, nzac nyâuh layf paix toongh taih, yâuc naih cloon munh zâuđ zuz gwuyz quav yotz byaif, nzac taih. ³ Nyâuh pâuh zuz gwuyz quav gongx woax tauh coong, “ninyh stâyv woa tync gongx gôh, yâuc năngx bux woax tauh munh zâuđ coong, “taih stâyv yaz nây staux synh zef. ⁴ Năngđ naz yămz Nyâuh yâuf pez cah njaf, nyâuh phunz goib ayx sax đomc munh max zâyf mah? Nyâuh nongc nyâuh okx njangh nyăngz nyâuđ, pâuh nâyx tauh, mangc stam woax tauh zâyf max? ⁵ Yaz stăngz nyăngz yâuf pez lex, mungv bef, Tênb-Hungh sên bamh canz nyăngz munh zâuđ munh taih, phunz nănh stiz nyăngz seenz stymz tuz puv quâyx, yâuc phunz nănh stiz tuz stipx Tênb-Hungh nyunc phunz nyăngz côkz. Six Tênb-Hungh nyunc phunz stăngz nănh woax đomc munh nyăngz côkz. ⁶ Six nyâuh yâuf pez mangc stam woax đomc munh zâuđ munh, six ayx peo nyâuh, yâuc ênz nyâuh ninyh woa stămđ stoif tync, max zâyf woax đomc puv quâyx mah? ⁷ Max zâyf woax đomc puv quâyx munh, coong peo nyâuh yâuf pez nhlimc saix nzongf woax nomz bux mah?” ⁸ Canyx-stâub ja lănv coong, “six zuc stăngz munh năngđ stăngz pănh nyăngz stynb, six coong nyâuh yâuf pez năngđ âyz tuz nâyx tyuh Tênb-Hungh nyăngz lanyf ayx, nyâuh songđ ayx tuz hođ gôh. ⁹ Six coong nyâuh yâuf pez năngđ mangc stam nâyx lanh, pâuh woax lanh, nyâuh songđ pamf Đoouc lif gâyf, nzof Đoouc lif gâyf songđ tingc nyâuh yâuf pez nyăngz stoif gôh. ¹⁰ Laiv lanh âyz tuz muif tyuh Đoouc lif gâyf nzuf, six cungb năngđ pamf ah tyuh, lauf năngđ nănh pamf muif tyuh nzuf. ¹¹ Tênb-Hungh coong, “max tuz stymz yêuz ninyh văngf munh, yâuc coong, “max cuyb tayx munh, “six coong nyâuh max pamf stymz yêuz văngf munh nyăngz stoif, six nyâuh pamf tayx munh nyăngz stoif, nyâuh lauf pênx pamf đoouc lif gâyf nyăngz munh. ¹² Nyâuh yâuf pez ayx nyăngz dlayc, cloon coong nyăngz woac, nyâuh six zuc săngx, Đoouc lif gâyf six hayh tingc munh nyăngz stoif, yâuc hayh pungx goib phunz munh woax hungđ gâyf. ¹³ Laiv lanh max hâuđ lênh munh, tauv stămđ stoif woax noib, Tênb-Hungh lauf max hâuđ lênh woax tauh. Hâuđ lênh munh nyăngz dlayc, tuz hingh quaix zuc tingc stoif nyăngz jau. ¹⁴ Songx yâuf pez lex, năngđ naih laiv lanh coong nănh naih seenz stymz, yâuc max ayx âyz nănh nzeetx coong nyăngz woac, hayh săngh nongc max? Woax hungđ seenz stymz hayh njâuv tuz nănh max?” ¹⁵ Six coong năngđ naih tix lanh zeen Yê-su nyăngz ôx stayx toic, max naih gwuyz quav zuz, yâuc max naih năngv nhlync seetc tonf. ¹⁶ Nyâuh yâuf pez năngđ naih laiv lanh coong bux nănh, “tuz zuz joomz, bix pengh oonz muf gôh, yâuc max phunz tuz laiv hungđ nănh yêmv nongc nyăngz phănc, nyâuh yâuf pez coong nyăngz woac naih stuyh muc max? ¹⁷ Seenz stymz six năngđ nâyx, cungb zeen cungv, yâuc max âyz ayx, seenz stymz six cănh tayc. ¹⁸ Naih munh oix coong, “nuz mâyh seenz stymz ayx nyăngz dlayc phunz yaz mangc geh, yaz songđ phunz mâyh mangc yaz seenz stymz ayx nyăngz dlayc phunz mâyh mangc. ¹⁹ Nyâuh yâuf pez zeen coong naih ah tauh Tênb-Hungh, seenz gongx gôh, năngx zeen njynh cloon manđ têx, seenz six cumh nzav tuz stynb synx nzuf. ²⁰ Munh oongx munh lex, cungb zeen cungv bix max âyz ayx têx, six max săngh nongc, nyâuh oix nongc lănv năngx manyh pec phunz nyâuh pâyz max? ²¹ Pănh nyăngz claof jex Apv-ra-ham, ayx năngđ laix tuz cloon Tênb-Hungh hopđ nyâuđ? Wâyc zuc nănh ayx nyăngz dlayc, nănh nzâyz nănh nyăngz toonz I-sakv, ninyh ănz woa congh toongh nongc congx phunz Zâu Tênb-Hungh. ²² Nyâuh yâuf pez tuz phătc max zengx? Apv-ra-ham, seenz stymz ayx nyăngz dlayc, căpx taih phunz nănh nyăngz seenz stymz cloon nănh ayx dlayc tuz clakx clunh dloih nzuf. ²³ Năngđ naz Canyx-stâub coong nyăngz muif zâux woac, seenz seetb taih toix nzuf, Canyx-stâub coong, “Apv-ra-ham naih seenz stymz zeen Tênb-Hungh, nănh songđ ayx tuz hođ Tênb-Hungh nyăngz stymz nyâuđ, Apv-ra-ham, songđ tuz manyh tauh gongx hipđ ayx pengh stymz nyăngz munh, yâuc tuz Tênb-Hungh hipđ Apv-ra-ham, ayx peo toic. ²⁴ Năngđ naz nyâuh tuz phătc ayx tuz hopđ Tênb-Hungh nyăngz stymz woax đomc munh, max zâyf cungb zeen cungv, năngx cloon nănh stiz seenz stymz ayx nyăngz dlayc. ²⁵ Woax tauh maic phăngh nyăngz munh nzif, La-hapv, wâyc nănh ayx nyăngz dlayc tuz cloon Tênb-Hungh hopđ nyâuđ, six wâyc nănh stipx camx côkz nyăngz Yiu-thai munh nzac nănh nyăngz pyau, yâuc năngx stungx nănh stiz seetb quaix pitc stynz jau ninyh. ²⁶ Six coong stynb stayđ max naih hoonh songđ zuc tayc, seenz stymz max ninyh ayx cumh pâuz lauf zuc tayc năngđ ha.