¹ Nâyx zanyf Yaz six lănv tauv căpx nyanh stăngc Zâu nyăngz pec stingx nyăngz jau, Yaz bux Ga-la-ti Huyđ toongh nyăngz Munh ayx lungđ, nyâuh yâuf-pez zuc ayx woax hungđ. ² Muif nomz Layf-paix yeetx noib,* dluyh nyâuh muif lanh yâuf-pez njengx tuz buf laiv nyanh lanyc njâuh ănz woa, Yaz ninyh tauv woax zanyf songđ max zuc căpx nyanh. ³ Yaz ninyh tauv nyâuh woa woax zanyf, nyâuh yâuf-pez paiđ laiv đomc Munh nzâyz nâyx đomc căpx taih nyăngz nyanh ninyh, Yaz nzăngđ ja jeenx zuyz phunz nănh stiz nzâyz ninyh Yê-lu-sa-lem stengv. ⁴ Six coong yaz năngđ hopđ zuc ninyh têx, nănh stiz cloon yaz ninyh lauf tuz. ⁵ Yaz six cayx căngv quaix Ma-si-đoan Stengv, Quaix đangz nzof nzăngđ zav ninyh tayđ nyâuh yâuf-pez. ⁶ Naih dlih yaz six ninyh tayđ nyâuh yâuf-pez ah dlapc, Cloon nyâuh yămz ah dlapc lauh-lauh ha quaix tongz dlih gungh, Quaix đangz yaz six mungc nyâuh yâuf-pez stăngc stungx yaz ninyh tauv, Yaz oix tingc nyâuđ ninyh nyăngz tync. ⁷ Yaz max zâyf cungb oix quaix jau tayđ nyâuh yâuf-pez cungv đêh, Zâu năngđ phunz phepx têx, Yaz oix cloon nyâuh yămz năngx lauh-lauh ha. ⁸ Six nâyx zanyf yaz lauf năngx yămz nây Ê-phê-sô Stengv, tauv quaix săngb blauh stêtz. ⁹ Wâyc zuc yaz yămz nây naih ah hungđ cumh pâuz ayx Zâu nyăngz cumh pâuz gongx nzongf, six lauf naih Munh đungx oix zengv Yaz. ¹⁰ Six coong Ti-mô-thê ninyh tauv nyâuh woa, nyâuh yâuf-pez six zuc stipx nănh năngx gongx, năngx gâyf bây nănh cumh nzav laiv hungđ, wâyc zuc nănh lauf ayx Zâu nyăngz cumh pâuz cayx năngđ yaz nâyx. ¹¹ Năngx gâyf bây laiv lanh phătc nănh stam, six zuc stăngc nănh pengh oonz seetb jau lauf tauv yaz nây, wâyc zuc yaz zu nănh cloon woax đomc yâuf-pez phunz đangz lauf. ¹² Six A-bô-lô nyăngz phănc, Yaz seetb jab quynb cloon woax đomc yâuf-pez ninyh tayđ nyâuh, six nănh max zengx hopđ zuc ninyh. zu nănh naih congv nzof nănh nzăngđ ninyh. ¹³ Six zuc canyz nyâuđ, yâuc zuc lif gongx seenz stymz, six zuc tam lub yâuc zeen wăn yâuc yongb. ¹⁴ Nyâuh ayx laiv hungđ dlayc, six zuc naih nyâuđ stăngz Munh. ¹⁵ Nyâuh yâuf-pez pâyz tuz Tê-pha-na nyăngz pyau Munh zeen Zâu đangc quaix yămz Miênh Nam Hi-lapc, Nănh stiz nzuf stymz nyâuđ stăngc Zâu nyăngz pec stingx, Yâuf-pez lex, Yaz jođ nyâuh yâuf-pez. ¹⁶ Six zuc buc nâyx hungđ lanyv đaof nyăngz Munh, Cloon nâyx đomc songc congz ayx nyăngz Munh. ¹⁷ Yaz numđ nyađ wâyc zuc Tê-pha-na, Cloon Pho-tu-na, Cloon A-zai-cutv, taih tauv nây, nyâuh yâuf-pez hănđ max Stăngc tauv, six nănh stiz stăngc nzuf. ¹⁸ Nănh stiz oonz yaz nyăngz nyâuđ, năngđ nănh stiz oonz nyâuh yâuf-pez nyăngz nyâuđ oonz loc nâyx. nyâuh yâuf-Pez seenz zuc pâuh nâyx hungđ Munh. ¹⁹ Yămz Miênh av-Zâu nyăngz Huyđ-toongh Munh zuyz woac tayđ nyâuh yâuf-pez A-qui-la, Cloon Bikv-si-la, Năngx cloon yămz nănh stiz nyăngz pyau ayx Layf-Paix woax đomc Huyđ-toongh Munh zuyz woac tayđ nyâuh yâuf-pez ô stayx Zeen Zâu nyăngz Munh. Nănh stiz songđ tinyh đoih săngx tauv nyâuh yâuf-pez ô-stayx tinyh đoih. ²⁰ Yămz nây nyăngz songx yâuf-pez zaoh nyâuh tinyh đoih, nyâuh six zuc ayx nyâuđ đăngb zengh lanh tomz lanh mynb phunz nyâuh yâuf-pez naih pengh oonz. ²¹ Yaz Phao-lô yaz cănh nongc puf nzauf pătx ja nâyx đomc woac phunz nyâuh yâuf-pez. ²² Six coong laiv lanh max Stăngz Zâu têx, nănh six jic tuz zaux tayc ah stâyv Munh! Jođ mâyh taih zef gôh. ²³ Jođ Zâu Yê-su sađ pôz phunz nyâuh yâuf-Pez ô stayx tinyh đoih. ²⁴ Yaz nyăngz tinyh stăngz toic cloon nyâuh yâuf-pez ô stayx yămz Njâuv Zâu Yê-su nyăngz cah njaf. A-Men.