9 ¹ Tah ngâuf lanh Stynz-munh pyom blungh blex, naih ah nomz stingz tau tăng gungh tuih nzac nib taih. Woax nomz stingz tau tuz stipx ah tauh ja zâyh nongc coib woax nomz cotb đôz max naih cah tôz. ² Woax nomz stingz tau coib woax nomz cotb songđ naih tâuf sâuv staox taih năngđ tâuf đauc lub nâyx pukb pukb têx đayv staox gungh stymz ninyh tăng bah noib nzămc mengh. ³ Tăng woa cotb tâuf sâuv staox taih yâuc naih ah đomc jengz đekx lunc pong nib mync, nănh stiz tuz stipx stăpb congz nyăngz lanyf. ⁴ Nănh stiz max naih gâyf ayx hoiđ nib mync njăngx lauđ mađ mengz, nănh stiz cungb tuz lanyf hoiđ max naih Tênb-Hungh nyăngz maiđ houđ ănz pyây nyah woax đomc munh. ⁵ Six nănh stiz max tuz lanyf hoiđ munh tayc, cungb wâyb nănh stiz caux pyaz lav, nâyx đomc jengz đekx tăpc munh munz seetb, munz nyuiv cayx năngđ stăpb congz (gapc) tăpc munz nâyx. ⁶ Woa pyaz lav cah njaf, woax đomc munh seenz oix lov jau tayc, six max hayh tayc, wâyc zuc tayc nyăngz jau năngx pyeenv gâyh stiz côz nzongf. ⁷ Woax đomc jengz đekx, yâuc phătc năngđ zoongz maf ninyh panx zax, nănh stiz nyăngz pyây năngđ munh đongx sămz mouc đunb wăngh, mynb yâuc cayx năngđ munh mynb. ⁸ Stiz nyăngz pyây đongz yâuc năngđ munh nzif đongz, nyah yâuc năngđ njanh zongh nyah. ⁹ Nănh stiz nyăngz cah lapc năngđ njab zapz pongz nâyx, stiz nyăngz đatz beb taih năngđ zoongz maf sex ninyh panx zax bix buib nâyx. ¹⁰ Stiz yâuc naih tây năngđ stăpb congz tây nâyx, hayh tănx munh, nâyx đomc jengz đekx tây naih njaiz hoiđ munh munz plaz lav cah njaf. ¹¹ Nănh stiz naih ah tauh Hungh six (manđ) nyăngz Stynz-munh, Hipc-lu, woac hipđ ayx A-ba-đôn, Hi-lapc, woac six hipđ ayx A-bô-li-ôn, nănh cun woax nomz staiz nanc Cotb. ¹² Tah yeetx hungđ staiz nanc quaix nzuf, cah đangz năngx naih iz hungđ staiz nanc năngx seetb taih. ¹³ Tah guc lanh stynz-munh pyom blungh blex, yaz songđ numđ naih woac stingb coong seetb woa Tênb-Hungh nyăngz gongc hoomb pyâyz nomz sămz joongz taih. ¹⁴ Coong bux nzauf blungh blex woa tah guc woax tauh Stynz-munh Coong, “Zay phunz zuc stayb woa pyâyz lanh Stynz-munh yămz woa Ơ-phơ-ratv coiđ lub. ¹⁵ Nâyx đomc pyâyz lanh Stynz-munh zuc stayb njâuh ănz nây zu tauv bengc săngx huđ, noib lav nyăngv, nănh stiz tuz zay pungx ninyh tayx bamh munh pôz phănc ah phănc yămz nây nib mync. ¹⁶ Yaz numđ coong zâyh maf woax đomc pengz naih (iz pez jeof) 200. 000. 000. lanh munh. ¹⁷ Yaz phătc nâyx đomc hynđ yangh nyăngz dlayc six năngđ nâyx, zâyh maf nyăngz pengz yâuc naih njab zapz pongz nănh stiz cah lapc njaox stib cayx năngđ yangh wuôngh tâuf, mengz buđ, nzeetx yâuc cayx năngđ njanh zongh nzeetx, stiz nja tâuf seetb nzeetx taih yâuc naih tâuf sâuv njămx mengz cayx năngđ wuôngh tâuf nâyx. ¹⁸ Pôz phănc nyeenh mănh ah phănc zuc tayx tayc wâyc nâyx đomc maf nyăngz nzeetx nja seetb taih nyăngz wuôngh tâuf sâuv. ¹⁹ Woax đomc maf nyăngz jab six yămz nănh stiz nyăngz nzeetx cloon tây, nănh stiz nyăngz tây cayx năngđ nangz nâyx, yâuc naih pyây hayh nongc hoiđ munh. ²⁰ Năngx yăngc woax đomc max zuc nâyx đomc staiz nanc hoiđ nyăngz munh, yâuc max nyunc coi nyâuđ quanyf nănh stiz ayx nyăngz stoif, nănh stiz lauf max nyunc quanyf nănh stiz congx manđ paix miuc hanyh nyăngz jau, nănh stiz nongc sămz, nongc nyanh, nongc njăngx, nongc njauz, jâux ayx miuc hanyh nongc paix, six max hayh yăngh, max hayh mangc, max hayh mungv lungđ nyăngz manđ hanyh. ²¹ Nănh stiz lauf max nyunc coi nyâuđ quanyf stiz ayx stac, ayx pongz lauh, ayx papz tayx munh nyăngz stoif Stynz-munh nzauf stâub jeenz