21 ¹ Yaz phătc naih săngb gungh săngb nib, six lôx gungh lôx nib quaix nzuf, njynh coiđ yâuc max naih. ² Yaz năngx phătc đăngb zengh nyăngz săngb Ye-lu-sa-lem stengv, Tăng Tênb-toongh Côkz, Tênb-Hungh woa nzac taih. woax nomz stengv bênc săngh phunz zu cayx năngđ săngb bongf bênc săngh zu stipx săngb langh nâyx. ³ Yaz numđ naih woac stingb yămz woa Hungh tync coong seetb taih, “Nâyx zanyf Tênb-Hungh yămz nyăngz tync, six munh gongx mungh toongx congv, Zâu six cloon stiz yămz, stiz yâuc ayx Zâu nyăngz pec stingx, Zâu yâuc ayx stiz nyăngz Tênb-Hungh. ⁴ Zâu yâuc oix stotb nănh stiz nyăngz mâyc womz, max naih laiv lanh năngx numđ stauh, max hayh zuc munz, yâuc max zuc dlauc wâyb, max zâuđ haoh, max hayh zuc tayc, wâyc zuc lôx nyăngz dlayc quaix blătc nzuf. ⁵ Stâyv woa coouz lauh tync woax tauh bux yaz coong, “Mangc geh! Nâyx zanyf yaz ayx phunz muif hungđ pênx săngb nyăngz taih nzuf, nănh năngx bux êu yaz ja staox nâyx đomc dlayc, nănh coong nâyx đomc dlayc six seenz gâyf, yâuc naih coonz tay wăn. ⁶ Nănh năngx bux yaz Coong, “Ayx nzuf nzof gôh! Yaz six ayx An-pha, yâuc ayx Ô-mi-ga, yâuc ayx quef coonz cloon môtc zapz woax tauh, laiv lanh nyâuđ gatb, yaz yâuc cungb phunz yungf mengc nyăngz womz sting phunz nănh hopb yâuc max naic nyanh. ⁷ Laiv lanh tanyđ tuz hingh, nâyx đomc phănc six săngh nănh nyăngz, yaz yâuc ayx stiz nyăngz Tênb-Hungh, nănh stiz yâuc ayx yaz nyăngz namh nyâuf. ⁸ Six woax đomc tam jeenz, max zeen tingc, ayx huđ dlayc, tayx munh, pungx papz hoiđ munh, ayx pongz lauh, Coong woac jaf munh, paix miuc hanyh, nănh stiz nyăngz phănc six yămz woa tâuf coiđ, yâuc zuc wuôngh tâuf pu tayc tah nyâyc hâyđ. ⁹ Woax đomc nhlic lanh Stynz-munh, naih nhlic zan staiz nanc pong nzuf, nzuf byăng woa tauh Stynz-munh bux yaz coong, “Taih nây mangc geh! Yaz oix nuz phunz mâyh mangc săngb bongf, six pa-jiz yungh jeenz nyăngz au. ¹⁰ Yaz mungc Singx lingh nyăngz jab, Stynz-munh songđ ênz yaz ninyh tauv nomz zoongz zâyc lub njăngb, nuz phunz yaz mangc phătc woax nomz săngb Ye-lu-sa-lem stengv đăngb zengh, tăng Tênb-toongh Côkz, Tênb-Hungh woa nzac taih.* ¹¹ Woax nomz stengv naih Tênb-Hungh nyăngz gwăngz-eng syux pong nzuf, eng năngđ njauz poou, yâuc năngđ poou zâuz eng pec nzomz. ¹² Stengv nyăngz singh lub njăngb nzongf, naih săpc nyâyc tungđ jengh, yâuc naih săpc nyâyc tauh Stynz-munh zu woa lanh tungđ singh jengh, năngx ja săpc nyâyc stingx Y-sa-la-ên munh nyăngz bux ănz woa singh jengh cah zâyc. ¹³ Tongz puôngz naih pôz tungđ jengh, namh puôngz naih pôz tungđ, stayz puôngz naih pôz tungđ, pakx puôngz naih pôz tungđ jengh. ¹⁴ Singh yâuc nongc săpc nyâyc nomz njauz pyây zâyv ayx coonz tay, yâuc naih pa-jiz yungh, nyăngz săpc nyâyc lanh stâyb sây nyăngz bux ja ănz woa njauz payh. ¹⁵ Cloon yaz coong woac woax tauh Stynz-munh puf nzauf ah stynz sămz tungh gaob pya, nongc gaob singh cloon pengh. ¹⁶ Stengv zâyv phanx tanyz, đao cloon quăng tinyh gwătb, Stynz-munh nzauf pya ninyh gaob stengv đao naih 2.400 gâyf. Quăng cloon njangb đao tinyh đauz. ¹⁷ Stynz-munh gaob Singh gongc njăngb 144 tôx, (Cu-đê) âyz bamh munh nyăng tungh gaob. ¹⁸ Singh gongc nongc poou zâuz pec zâyv, stengv cah njaf nongc sămz bôkc zâyv, đăngb năngđ canyx nâyx. ¹⁹ Nongc pâub stengv zoz caux muif hungđ saix nyăngz laiv hungđ poou zâuz zâyv. Tah yeetx six poou zâuz pec nzomz, tah nyâyc six zâuz pyênz wăngh, tah stamz six mengz ymz buđ, tah stâyx six mengz eng đăngb. ²⁰ Tah ngâuf six stib nonc, tah guc six pyaof wăngh. Tah jeetb six mengz ymz đăngb, tah pêtz six wăng âuz, tah zu six wăngh côx, tah săpc six mengz ymz utc, săpc byetx six stib côx, săpc nyâyc six pec mengz. ²¹ Săpc nyâyc tungđ singh jengh naih săpc nyâyc nomz zâuz engz lub, singh cah njaf jau nongc sămz bôkc pâub đăngb zengh eng canyx. ²² Yaz max phătc stengv cah njaf naih laiv nomz congx Hungh tync, wâyc zuc pengh quaix Zâu Tênb-Hungh cloon pa-jiz yungh six congx Hungh tync. ²³ Woa nomz côkz cah njaf max nongc tauv bah noib lav syux gwăngz, wâyc zuc Tênb-Hungh nyăngz gwăngz-eng cănh syux, pa-jiz yungh six ayx toongz syux phunz woax nomz côkz. ²⁴ Gungh đi nyeenh mănh păngc nâyx nomz côkz nyăngz gwăngz-eng yăngh jau, cloon manf Côkz hungh stix, nzâyz stiz nyăngz gwăngz-eng nzac nâyx nomz côkz ninyh. ²⁵ Singh jengh nzangh dlih coib ănz woa, njynh leox max omz, wâyc zuc yămz woa max naih bah nzămc. ²⁶ Muif stingx nyeenh mănh, six nzâyz stiz nyăngz manyh yangh, cloon gwăngz-eng nzac woa ninyh. ²⁷ Woax đomc max dlăngc naih wâyx, cloon puv maoh, ayx bah lotb nyăngz munh, max tuz nzac woax nomz côkz cah njaf ninyh, jangx tuz naih bux ja ănz pa-jiz yungh nyăngz săngh mengc tanz woax đomc munh, nzăngđ tuz phepb nzac woax nomz côkz cah njaf ninyh.* Yungf mengc womz nyăngz coiđ