14 ¹ Yaz mangc songđ phătc Pa-jiz yungh stâuđ woa Si-ôn zoongz, Cloon nănh yămz woa woax đomc munh, six 144. 000 lanh munh, yâuc naih cloon nănh nyăngz bux, cloon nănh Pha nyăngz bux staox ănz woa pyây nyah. ² Yaz mungv numđ naih stingb buib woa gungh stymz cayx năngđ womz lub buib, yâuc cayx năngđ bah côngz haoh, yaz mungv yâuc numđ naih stingb buib cayx năngđ munh quetb lanyh njămh. ³ Stiz ayx ah gwoanc săngb nzungz yămz woa Hungh tync cah đangc, yămz woa pyâyz tauh stengb hauđ, cloon munh côx nyăngz cah đangc, seetb nzuf woa 144. 000 lanh munh tuz suc Njâuv gâyh nib mync woax đomc munh, max naih laiv lanh hayh saz tuz woax gwoanc nzungz. ⁴ Nâyx đomc munh baox njif tuz đăngb, max zengx naih wâyx cloon munh nzif, pa-jiz yungh ninyh laiv, nănh stiz yâuc lêpc đangz, woa six 144. 000 lanh munh tuz suc, yâuc tuz Njâuv stiz gâyh bamh canz nongc ayx stanyb lanyh congx phunz Zâu Tênb-Hungh, cloon pa-jiz yungh jeenz. ⁵ Nănh stiz nyăngz nzeetx max zengx naih coong woac puv maoh, stiz max naih lungđ săngh nzêmh. Pôz lanh Stynz-munh ⁶ Yaz phătc ah lanh Stynz-munh đayv woa đamx gungh, nzâyz banc stâyv săngh nyăngz cuđ jeenx ninyh lănv bux muif stingx nyeenh mănh, muif nomz Côkz, Coong muif hungđ woac. ⁷ Nănh hamv lub coong, “Seenz zuc cumh nzav Tênb-Hungh, wâyc zuc tauv săngx huđ, Nănh stămđ bamh munh, nyâuh zuc canyx bongc zâyx gungh nib, zâyx coiđ, zâyx cloon nof womz sting woax tauh." ⁸ Năngx naih nyâyc lanh Stynz-munh ninyh lêpc zeetx tauh cah đangz yâuc hamv Coong, “Ba-bi-lôn stengv lub lex, plupc lakb! plukc lakb zef gôh, nănh stiz ayx phunz muif nomz Côkz munh hopb pongz lauh tyu, âyz gâyf six Tênb-Hungh hănđ pongz lauh nyăngz tyu." ⁹ Tah stamz lanh Stynz-munh ninyh lêpc cah đangc woa iz lanh stynz-munh nănh hamv coong, “Laiv lanh canyx paix stengb hiv, cloon nănh nyăngz miuc hanyh, yâuc tăpb yeenx ănz pyây nyah, cloon puf woax đomc munh. ¹⁰ Nănh stiz six zuc hopb Tênb-Hungh zămđ hănđ stoif nyăngz tyu jetz ănz woa zan. Laiv lanh hopb songđ munz năngđ wuôngh tâuf pu nănh zuc dlauc wâyb yămz woa đăngb zengh Stynz-munh cloon pa-jiz yungh cah đangc. ¹¹ Wâyb nănh stiz woax lâuh tâuf sâuv đynz đynz têx staox gungh ninyh tauv banc stâyv banc đaic, laiv lanh congx paix stengb hiv, cloon nănh nyăngz miuc hanyh, năngx cloon woax đomc tuz tăpb yeenx ănz pyây nyah cloon puf nyăngz munh, stiz six zuc tanyđ dlauc wâyb quaix noib quaix munf max naih laiv dlih tuz gongx. ¹² Nây six Tênb-Hungh nyăngz woac bux êu zeen nănh nyăngz munh, seenz zuc nongc naih seenz stymz tanyđ, yâuc zuc ayx âyz nănh nyăngz lanyf, yâuc naih seenz stymz yămz Zâu Yê-su. ¹³ Yaz numđ naih woac stingb coong yămz woa gungh stymz, “Mâyh six zuc ja nâyx đomc woac; "Poou phunz laiv lanh tăng nây staox ninyh, tayc six tayc yămz Zâu cah njaf; "Singx lingh tauz coong; "zâyf gôh, "phunz stiz tuz sec hitb conv, stiz ayx nyăngz congz lekc cănh lêpc nănh stiz nzuf. Sâub nzuf bamh canz zunb jengz ¹⁴ Yaz mangc phătc naih ah lanh cayx năngđ bamh munh nâyx, nănh zâyh ah tungđ vănx pec nzac taih, pyây đongx sămz banyh tênb moouc, nănh puf nzauf bah tôz njayf njemh. ¹⁵ Zâyf naih pitc tauh Stynz-munh tăng woa congx Hungh tync seetb taih, nănh hamv bux zâyh vănx woax lanh Stynz-munh coong, “Nongc mâyh nyăngz bah tôz quănf bamh canz jengz zunb gôh, wâyc zuc bamh canz jengz zunb bengc săngx huđ sâub nzof. ¹⁶ Stâyv woa vănx cah zâyc woax tauh, songđ quanyf nănh bah tôz nzac nib taih, bamh canz nib tâyc songđ zuc quănf sâub nzuf. ¹⁷ Zâyf năngx naih pitc tauh Stynz-munh tăng woa congx Hungh tync seetb taih, nănh nzauf ah zungz bah tôz njayc njemh. ¹⁸ Zâyf năngx naih pitc tauh Stynz-munh, nănh naih quênh cun tâuf woax tauh, yămz woa congx Hungh tync seetb taih coong bux woax tauh Stynz-munh, zoz mâyh lâyc bah tôz quănf nib mync tungh cuđ pyâu gôh, wâyc tauv săngx huđ tungh cuđ pyâu suđ nzof." ¹⁹ Stynz-munh songđ quanyf nănh bah tôz nzac nib taih, sâub dlonf bamh canz tungh cuđ pyâu ănz nzac Tênb-Hungh hănđ stoif nyăngz mayx ngatc ninyh. ²⁰ Woax nomz ngatc pyâu mayx tongđ, ănz woa singh cungh ngwoaic, naih samđ njâuc seetb taih, samđ yămx bengc maf clangz đi, yămx ninyh jau đao cox naih 300 gâyf. Nzuf woax hâyđ staiz nanc