13 ¹ Yaz mangc songđ phătc naih ah tauh stengb hiv tăng woa coiđ womz seetb taih, nănh naih nhlic nomz pyây, săpc nomz joongz, muif nomz joongz đongx banyh tênb moouc, woax đomc pyây naih ja pamf Zâu Tênb-Hungh nyăngz bux. ² Yaz phătc woax tauh stenyb hiv hanyh jangx năngđ njanh meof, staux năngđ jăpx staux, nzeetx năngđ njanh zongh, woax tauh Côngz jaoz nănh nyăngz lanyf cloon tync phunz nănh cun. ³ Woax tauh stengb hiv woax đomc pyây naih ah nomz cayx năngđ zuc munz tayc, bix cănh tuz gongx, wâyc năngđ nâyx gungh đi munh phătc njingc, songđ ninyh lêpc nănh. ⁴ Stiz songđ paix woax tauh Côngz, wâyc zuc nănh phunz lanyf woax tauh stengb hiv, stiz zâyf paix cloon woax tauh stengb hiv yâuc coong, "Naih mănv hayh zengv tuz hingh nănh stiz? ⁵ Woax tauh stengb hiv tuz lanyf coong woac zanyb lub, yâuc tuz coong peo Tên-Hungh, yâuc tuz phepb ayx huđ stâyx săpc nyâyc lav. ⁶ Woax tauh stengb hiv goib nzeetx coong peo Tênb-Hungh nyăngz bux, yâuc coong pamf Tênb-Hungh yămz nyăngz tync, cloon yămz woa Tênb-toongh woax đomc munh. ⁷ Woax tauh stengb hiv tuz phepb cloon đăngb zengh munh panx zax, nănh songđ tuz hingh woax đomc munh. nănh zâyf năngx tuz quênh cun muif nomz Côkz, muif stingx munh, coong muif hungđ woac. ⁸ Gungh đi munh songđ Canyx paix woax tauh stanyb hiv, woax đomc munh nyăngz bux six tăng zâyx gungh nib taih woax zanyf, max zengx naih staox ănz nzac zuc tayx tayc woax tauh Pa-jiz yungh nyăngz săngh mengc tanz. ⁹ Laiv lanh naih bah noomh oix zuc nongc cayb mungv. ¹⁰ Laiv lanh mengc taix zuc nzuf đao tayx, seenz zuc nzuc đao tayx, laiv lanh mengc taix zuc yămz nzauh, nănh songđ zuc yămz nzauh, nây âyz gâyf six pây tauv Zâu nyăngz đăngb zengh pec stingx, six zuc nongc seenz stymz tanyđ. ¹¹ Yaz năngx phătc pitc tauh stengb hiv tăng woa nib đi seetb taih, nănh seetb iz nomz joongz cayx năngđ pa jiz yungh jeenz gunx. Coong woac cayx năngđ Côngz. ¹² Seetb taih đangz woax tauh, tuz stipx seetb taih đangc woax tauh nyăngz quênx lanyf yac yămz nây nib mync nyăngz nyeenh mănh, canyx paix taih đangc woax tauh, six zuc munz quaix bix năngx tuz gongx taih woax tauh stengb hiv. ¹³ Tah nyâyc tauh stengb hiv, yâuc naih quênh ayx tuz đungx hungđ jix caox njingc nzongf, nănh seenz hayh ayx tuz tâuf tăng Gungh tuih nzac bamh munh cah đangc taih. ¹⁴ Nănh nongc jix caox njingc yămz tah yeetx tauh cah đangc ninyh jaf Gungh đi munh jâux hanyh jangx cayx năngđ zuc nzuc tayx, bix năngx săngh woa zeetx tauh stengb hiv hanyh jangx taih nongc congx. ¹⁵ Tah nyâyc tauh stengb hiv naih gâyf ănz siv ayx phunz tah yeetx tauh phunz nănh tuz săngh, năngx ayx tuz woax tauh hanyh jangx hayh coong woac, laiv lanh max congx paix woax tauh stengb hiv hanyh, six zuc tayx. ¹⁶ Nănh yac muif lanh munh, max jez lub jeenz, puv quâyx, six zâuđ, ayx nâuh, mah six dluyh stymz, six zuc tăpb yeenx ănz byaoh puf, mah six pyây nyah. ¹⁷ Laiv lanh maif maic, bix năngđ max naih nâyx tauh stengb hiv yeenx cloon bux cloon sôx tăpb ănz. ¹⁸ Six zuc nongc naih tongb manyh, laiv lanh naih bănh sangz, six zuc stunx nâyx tauh stengb hiv nyăngz sôx, nây six pênx ah lanh munh nyăngz sôx, nâyx nomz sôx six 666. Tuz Njâuv nyăngz munh ayx tyuh săngb nzungz