12 ¹ Năngx naih ah hungđ jix caox njingc nzongf tăng gungh hynđ seetb taih, naih ah lanh munh sab, zoongz zuz six nongc bah noib lav yămz nănh staux đi, pyây đongx moouc naih săpc nyâyc nomz stingz tau. ² Woax tauh munh sab naih sây, songđ bengc săngx huđ đutb stynb. Munz songđ hamv nâyx. ³ Năngx naih pitc hungđ jix caox njingc hynđ seetb woa gungh taih, naih ah tauh côngz lub njaox stiz, naih nhlic nomz pyây, săpc nomz joongz, muif nomz joongz đongx moouc nzuf, ⁴ Côngz tây vatc yămz gungh nyăngz stingz tau, pôz phănc ah phănc tuih nzac nib taih. Woax tauh Côngz songđ nzac taih tauv stâuđ woax munh sab woa cah đangc, zu tauh munh sây stengb stâyv taih nănh six naz săngh. ⁵ Woax tauh munh sab stengb tuz tauh Toonz, Nănh six nongc njab pya cun nyeenh mănh woax tauh munh sây, năngx naih ah lanh munh taih zab zoz woax tauh sây nzâyz ninyh tauv Tênb-Hungh nyăngz tync cah đangc. ⁶ Woax tauh munh nzif songđ tyuv nzac stâyz phangz blănf ninyh, six Tênb-Hungh bênc tync phunz nănh yămz woa, tuz ah tynb iz pez guc săpc noib. ⁷ Woax zanyf yămz woa gungh naih panx zax seetb taih, Mi-ca-ên, cloon lêpc nănh woax đomc Stynz-munh, ninyh cloon Côngz hungh panx zax, Côngz cloon manđ nyăngz Stynz-munh yâuc ninyh cloon stiz panx zax. ⁸ Six Côngz panx max hingh, manđ songđ zuc stâyb max tuz yămz Tênb-toongh Côkz. ⁹ Woax tauh Côngz songđ zuc quanyf nzac bamh canz taih, Six lôx noib ninyh yâuh nây gungh đi jaf munh woax tauh nangz six hipđ ayx Sax-tanx, manđ nyăngz Hungh, cloon lêpc nănh woax đomc Stynz-munh songđ zuc quanyf nzac nib taih. ¹⁰ Yaz numđ naih coong woac stingb lub buib nhlangđ woa gungh coong, “Tauv săngx huđ Tênb-côkz nyăngz Tênb-Hungh nongc lanyf Njâuv nănh nyăngz pec stingx, “Wâyc zuc Njâuv Zâu naih lanyf cun nây gungh đi, Cooux pănh yâuf pez quaix noib quaix munf woax tauh, nâyx zanyf songđ zuc Tênb-Hungh quanyf nănh nzac nib taih. ¹¹ Nănh stiz tuz hingh six wâyc Pa-jiz yungh samđ, cloon ayx zanyx manyf woac. Wâyc nănh stiz sez tuz tayc mengc max numđ stâyb. ¹² Yămz muif tađ Gungh cah njaf, munh cloon muif hungđ songđ seenz numđ nyađ, “Six nib cloon coiđ songđ numđ stauh, wâyc zuc manđ hungh nzac tauv nyâuh lâyc. Nănh seenz siv numđ pumh nzongf, wâyc nănh pâyz tuz nănh nyăngz săngx huđ cayx nzuf gôh. ¹³ Woax tauh Côngz pâyz tuz nănh zuc stayb quanyf nzac bamh canz, nănh songđ ninyh luiđ lêpc đanngz stengb tuz ah tauh toonz woax tauh munh nzif. ¹⁴ Woax tauh munh nzif tuz stipx ah pâuv Clang lub đatz đayv ninyh tauv bênc săngh tync phunz nănh yămz woa stâyz phangz blănf, songđ tuz Zâu jămđ nănh yămz woa pôz nyăngv phanx, tuz pyenv gâyh max zuc (côngz) (nangz sah) hoiđ nănh. ¹⁵ Côngz songđ nongc nănh nzeetx nja womz seetb taih, năngđ coiđ nâyx luiđ lêpc woax tauh munh nzif cah đangz, ayx zoz womz cutb nănh ninyh. ¹⁶ Six nib songđ Njâuv woax tauh munh nzif, nib songđ moongz quef quaf nzeetx naz nzuf Côngz nja seetb taih nyăngz womz. ¹⁷ Woax tauh Côngz seenz numđ nhleenx nzongf, songđ ninyh lov woax tauh munh nzif, cloon woax tauh munh nzif nyăngz sây stunz panx zax, âyz gâyf six pây tauv mungv Zâu Tênb-Hungh nyăngz lanyf, yâuc ayx Yê-su nyăngz zanyx manyf woax đomc munh. ¹⁸ Woax tauh Côngz songđ ninyh stâuđ woa coiđ synh. Iz tauh stengb hiv