8 ¹ Woax dlapc, naih munh taih nzomf woa hongđ nzongf, six nănh stiz max naih lungđ nhlync, Zâu Yê-su êu Nănh nyăngz stâyb-sây buz taih songđ bux nănh stiz, ² “Yaz numđ hâuđ lênh nâyx đomc munh nzongf, nănh stiz taih cloon yaz yămz nây tuz pôz noib nzof, six max naih laiv hungđ phunz nănh stiz nhlync.” ³ Yaz năngđ phunz nănh stiz tanyđ nyâuđ sab phunb đangz muf têx, sangx max đanyf naih ah po muf tauv bah đămx jau hayh nyâuđ sab đoonh, songđ wâyc nănh stiz naih ah po yămz côz taih. ⁴ Stâyb-sây buz tauz, yămz nây jêmh stymz, naih mănv hayh tuz caux phunz buc lâyc munh nhlync tuz pêu?” ⁵ Zâu Yê-su songđ naic, “Ha nyâuh năngx naih sax nomz nzu? Nănh stiz tauz, năngx naih nhlic nomz.” ⁶ Zâu Yê-su êu songx munh stâyv nzac, songđ zoz woa nhlic nomz nzu taih hâuđ Tênb-Hungh tuz nzof nzăngđ jaoz phunz stâyb-sây buz nzâyz ninyh patz phunz songx munh nhlync.” ⁷ Stâyb-sây buz năngx naih iz pôz tauh byauf stăm, Zâu Yê-su zoz taih hâuđ Zâu tuz nzof, nzăngđ êu stâyb-sây buz nzâyz ninyh patz phunz songx munh. ⁸ Songx munh nhlync pêu nzuf, nănh stiz ninyh sâub woax đomc nzu nhlync yăngc, năngx tuz nhlic đanz pong.” ⁹ Nhlync nzu nyăngz munh cayx bengc pyâyz tynb lanh, Zâu Yê-su songđ êu songx munh muf. ¹⁰ Songđ cloon stâyb-sây buz lênh dlih nzac đangđ ninyh Đan-ma-nu-tha stâyz phangz.” Ayx quanz munh jođ ah hungđ jix caox njingc mangc (Ma-thi 16:1-4) ¹¹ Naih đomc Pha-li-si munh taih tauv woa, nănh stiz oix cloon Yê-su nzengz gâyf, nănh stiz oix stâyv Zâu Yê-su, songđ jođ êu Nănh ayx ah nomz jix caox njingc nyăngz dlayc tăng gungh nzac taih. ¹² Zâu Yê-su tongb siv songđ coong, “Nâyx yeenh stâyv munh săngh laix bix cungb oix jođ jix caox njingc mangc? Yaz coong seenz bux nyâuh, nâyx yeenh stâyv munh yaz max phunz nyâuh phătc toix laiv hungđ jix caox njingc nyăngz dlayc đêh.” ¹³ Nănh gâyh stiz nzac đangđ ninyh woax nganc wăngx synh.” Zuc buôngh Pha-li-si munh Cloon Hê-lôtv hungh nyăngz nzu piny (Ma-thi 16:5-12) ¹⁴ Stâyb-sây buz nyâuđ cob max nzâyz nzu ninyh, yămz woa đangđ njaf nănh stiz cungb năngx naih ah nomz nzu.” ¹⁵ Zâu Yê-su bux nănh stiz coong, “Zuc stêu stymz buôngh Pha-li-si munh, cloon Hê-lôtv hungh nyăngz nzu piny.” ¹⁶ Stâyb-sây buz lanh coong ănz lanh, ha six pănh max naih nzu?” ¹⁷ Zâu Yê-su pâyz tuz nănh stiz coong ayx naz, Nănh songđ bux coong, “Săngh laix nyâuh bix lănv nyâuh max naih nzu? Ha nyâuh lauf max zengx phătc, max zengx pâyz mah? Săngh laix nyâuh lauf năngx nyâuđ nhlengc nâyx yeh?” ¹⁸ Ha săngh laix nyâuh bix naih mâyc yâuc mangc max phătc, naih bah noomh yâuc mungv max numđ lungđ? Nyâuh max săngx mah? ¹⁹ Yaz pyeenv pyaz nomz nzu phunz pyaz tynb munh nhlync woax zanyf, nyâuh ninyh sâub woax đomc nzu yăngc năngx tuz sax đanz pong? Nănh stiz tauz, tuz săpc nyâyc đanz.” ²⁰ Năngx naih woax hâyđ yaz pyeenv nhlic nomz nzu phunz pyâyz tynb munh nhlync woax hâyđ, nyâuh ninyh sâub woax đomc nzu nhlync yăngc năngx tuz sax đanz pong? Nănh stiz tauz, năngx tuz nhlic đanz.” ²¹ Zâu Yê-su năngx naic nănh stiz, “Ha nyâuh lauf max zengx pâyz mah?’ Yê-su zany tuz gongx munh mâyc buđ ²² Zâu Yê-su cloon stâyb-sây buz ninyh tauv Bêtv-sai-đa, munh ênz ah lanh mâyc buđ munh taih, jođ Nănh clatc tauv woax lanh munh. ²³ Zâu Yê-su songđ jinb woax lanh mâyc buđ munh seetb njăngv synh ninyh, nzuv nzanh womz hâuh ănz nănh nyăngz mâyc, nongc puf laoz nănh yâuc naic coong, “Mâyh mangc tuz phătc tix hungđ max? ²⁴ Woax lanh munh ngoongv mynb mangc songđ coong, “Yaz phătc munh cayx năngđ njăngx nâyx, gonx quaix ninyh quaix lauf. ²⁵ Zâu Yê-su năngx lupc nănh cah đangz hâyđ, woax hâyđ nănh seetb jab mangc, songđ mangc tuz phătc muif hungđ đăngb zengh.” ²⁶ Zâu Yê-su bux êu nănh muf pyau, yâuc bux nănh coong, “Năngx gâyf nzac njăngv muf bex!” Phê-rơ nhlimc Yê-su (Ma-thi 16:13-20; Lu-ca 9:18-21) ²⁷ Zâu Yê-su cloon stâyb-sây buz ninyh tauv Sê-sa-ri, Phi-lipv stengv nyăngz njăngv, jămc jau ninyh woax zanyf, Zâu Yê-su naic stâyb-sâyb buz coong, “Munh coong yaz six toix laiv lanh? ²⁸ Nănh stiz tauz, naih ah phanx coong, “Mâyh six stăngc munh ayx quaix womz nyăngz gâyf woax tauh Giăng, ah phanx coong, “Mâyh six Ê-li, ah phanx coong, “Mâyh six ah tauh tâuc woac munh. ²⁹ Zâu Yê-su năngx naic, ha nyâuh coong yaz six mănv? Phê-rơ tauz, mâyh six* Njâuv Zâu.” ³⁰ Zâu Yê-su songđ bux nănh stiz coong, “Năngx gâyf lănv bux munh coong Nănh six mănv.” Yê-su coong nănh zuc dlauc wâyb yâuc zuc tayc (Ma-thi 16:21-28; Lu-ca 9:22-27) ³¹ Taux woa Zâu Yê-su quef coonz nzaox stâyb-sây buz coong, “Yaz bamh munh nyăngz Toonz six zuc tanyđ đungx hungđ dlauc wâyb, zuc munh côx cloon stayb-munh năngx cloon nzaox gâyf stênx stengb nzêmh, zuc munh tayx tayc, six tauv tah stamz noib yaz năngx săngh phunb stengb taih.” ³² Nănh coong nâyx đomc dlayc manyh pec nzongf, Phê-rơ, songđ jinb nănh seetb ninyh lanyc ah tix, jođ Nănh. ³³ Zâu Yê-su wynb lauf mangc stâyb-sây buz songđ coong, “Phê-rơ, Sax-tanx lex! Năngx gâyf yămz stătx yaz cah đangz, mâyh max nyâyh tauv Zâu Tênb-Hungh nyăngz cumh pâuz, mâyh cungb nyâyh bamh munh nyăngz cumh pâuz. ³⁴ Zâu Yê-su songđ êu stâyb-sây buz cloon songx munh taih dloih, songđ coong bux nănh stiz, “Laiv lanh oix lêpc yaz, six zuc sez mengc, đamz nănh nyăngz săpc đăngc zax lêpc yaz ninyh.” ³⁵ Laiv lanh nyâyh tâuh cănh cungb tuz nzâux nănh nyăngz stynz mengc, songđ zuc stâyb mengc, six toix laiv lanh wâyc yaz, yâuc wâyc cuđ jeenx bix zuc quanyf mengc, woax lanh six tuz săngb mengc.” ³⁶ Toix laiv lanh tuz nzuf nây gungh đi nyăngz muif hungđ, bix zuc quanyf mengc, six naih lungđ phănc? ³⁷ Naih mănv hayh nzâyz tuz lungđ ninyh wănc nănh nyăngz mengc phunb đangz lauf?” ³⁸ Nâyx yeenh stâyv nyâuđ huđ, naih stoif nyăngz munh, toix laiv lanh nyayz yaz nzaox nzaox nyăngz woac, yaz bamh munh nyăngz toonz, yămz Nzangc pha nyăngz gwăngz-eng cah đangc, cloon đăngb zengh nyăngz Stynz-munh taih woax zanyf, yaz lauf nyayz woax lanh!”