12 ¹ Wâyc zuc pănh naih zanyx manyf munh đungx năngđ vănx nâyx wâyh pănh, pănh songđ zuc quanyf ayx longđ nyăngz jau, six hayh wâyb pănh woax đomc stoif, yâuc zuc tyuv hungv ninyh năngx tauv pănh njih mungc nyăngz tync. ² tyuv ninyh six zuc mangc tingc Yê-su, wâyc Yê-su ayx coonz phunz pănh zeen, yâuc phunz pănh tuz clakx clunh, nănh zuc yămz săpc đăngc zax, tanyđ zâuđ tanyđ nyayz, six max nongc seen, wâyc zuc cah đangz phanx songđ tuz oonz loc, nâyx zanyf nănh songđ tuz stâyv Tênb-Hungh nyăngz byaoh phanx. ³ Nyâuh yâuf pez nyâyh mangc jađ, nănh zuc tayv stoif-munh, cloon nănh tinyh tămx woax đomc, năngđ naz nyâuh năngx gâyf numđ stauh bix nămx nyâuđ. Tênb-Hungh năngđ pha ⁴ Nyâuh yâuf pez cloon stoif panx zax, six nyâuh max zengx zuc seetb samđ stêtb mengc tayc wâyc stoif. ⁵ Nyâuh yâuf pez nyâuđ cob Zâu Tênb-Hungh bux nyâuh woax đomc woac nzof? Nănh bux nyâuh cayx năngđ pha cloon sây, nănh coong, “Sây lex, yaz bopc nzaox mâyh nyăngz săngx huđ six zuc mungv năngx gongx, yaz panx nzaox nyăngz dlih, yâuc năngx gâyf nyâuđ nămx. ⁶ Wâyc zuc stăngz nănh bopc nzaox, laiv lanh săngh nănh nyăngz sây six zuc nongc pya panx nzaox. ⁷ Pănh zuc tanyđ zâuđ nanc, six wâyc pănh zuc bopc nzaox, Tênb-Hungh ayx phunz nyâuh yâuf pez, ayx năngđ nănh nyăngz sây, max naih laiv lanh sây bix max zuc nănh nyăngz pha panx nzaox quaix?” ⁸ Six coong nyâuh yâuf pez max nyunc zuc panx nzaox năngđ nănh nyăngz toonz, pănh six max zâyf seenz sây, cungb pênx sây haov. ⁹ Năngx naih ah hungđ, pănh nyăngz seenz pha panx nzaox pănh, pănh lauf zuc buc nănh stiz, pănh songđ lauf zuc mungv pănh nyăngz Tênb-toongh pha, panx nzaox phunz pănh tuz mengc săngh. ¹⁰ Pănh nyăngz seenz pha panx nzaox pănh ah dlapc (thơih gian), âyz pănh mangc hopđ zuc nzaox nyăngz gâyf, six Tênb-Hungh panx nzaox, wâyc phunz pănh tuz gongx, yâuc phunz pănh tuz đaox Stoif dlăngc đăngb zengh. ¹¹ Pănh zuc panx nzaox woax zanyf, seenz numđ munz nzongf, six nzaox blătc quaix đangz, pănh hođ tuz pâyz, ayx tuz hođ songđ naih pengh oonz. Nzaox munh nyăngz woac ¹² Năngđ nâyx, nyâuh yâuf pez, songđ zuc zaub nyâuh max naih jab nyăngz puf staox, phunz nănh năngx yongb taih. ¹³ Six zuc coib nyâuh yâuf pez nyăngz jau năngx yeenh, phunz staux quac nyăngz munh hayh yăngh jau, phunz nănh max zuc glinyf, taux woa hayh tuz gongx. ¹⁴ Zuc nongc nyâuh cloon songx munh hopđ stymz dlongh âyx yămz, nongc stymz nyâuđ ayx pênx đăngb zengh nyăngz munh, laiv lanh max dlăngc, six max hayh tuz phătc Zâu Tênb-Hungh. ¹⁵ Six nyâuh yâuf pez seenz zuc buôngh stymz, nongx gâyf bây naih laiv lanh pungx đutb Tênb-Hungh nyăngz pôz, yâuc năngx gâyf bây laiv naih ymz lemb nyăngz mađ đungh bêux seetb taih, loou phunz munh huđ nzuf, yâuc lunc nzuf. ¹⁶ Yâuc năngx gâyf bây laiv lanh ninyh tamb wab ayx pongz lauh nyăngz dlayc, mah six max zanyb Tênb-Hungh năngđ Ê-sau, nâyx cungb wâyc ah tonx năngv, maic nănh nyăngz toonz coonz stungđ dlaih nyăngz gâyf. ¹⁷ Nyâuh yâuf pez lauf pâyz tuz, oix nongc nănh nyăngz pha poou woac phunz nănh woax tauh, six max tuz nănh nyăngz pha poou woac phunz, Ê-sau numđ nhleenx, seetb jab haoh lov tuz mâyc womz tuih, six lov max tuz pongh nănh nyăngz phănc. ¹⁸ Nyâuh yâuf pez max zâyf năngđ lôx noib Y-sa-la-ên munh, ninyh lumz tuz tauv Si-nai zoongz, naih tâuf sac, yâuc naih tâuf sâuv mătb jaz nzămc mengh, yâuc naih nzaox. ¹⁹ Naih blungh blex stingb buib, yâuc numđ naih woac stingb coong, numđ woac nyăngz munh, nănh stiz seetb jab jođ coong, jođ năngx gâyf năngx cloon buz coong woac gôh. ²⁰ wâyc zuc nănh stiz max jiuc mungv zăpx nănh stiz nyăngz woac, njynh stanyb hauđ ninyh stătx zuc woax nomz zoongz, songđ zuc zoz njauz pyây ôx tayc. ²¹ Nănh stiz phătc nâyx đomc dlayc, seenz numđ cumh nzav nzongf, njynh cloon Mô-sê năngx coong, “yaz seenz cumh nzav tuz stynb synx nzuf. ²² Nyâuh yâuf pez ninyh, six ninyh Si-ôn zoongz, ninyh tauv yămz Tênb-toongh côkz nyăngz Ye-lu-sa-lem stengv, yâuc naih sax tynb sax panc lanh stynz-munh yămz woa. ²³ Nyâuh yâuf pez ninyh tauv Tênb-Hungh toonz coonz woa six naih bux ja yămz woa Tênb-toongh, căpx dlonf hônb hiđ nyăngz tync, nyâuh ninyh tauv Tênb-Hungh nyăngz stămđ stoif quanz Hungh nyăngz tync, yâuc ninyh tuz tauv Tênb-Hungh nyăngz munh gongx munh, mengc hoonh tuz clakx clunh yămz woax nomz tync. ²⁴ Nyâuh yâuf pez yâuc tuz ninyh tauv Yê-su woa, six njăpc săngb nyunc woac woax tauh mungh tongx munh woa, yâuc ninyh tauv stav wâyx nyăngz samđ woa, Yê-su nyăngz samđ lănv nyăngz jau, six năngx gongx têx, A-bên nyăngz samđ. ²⁵ Six zuc jâuz stymz buôngh, năngx gâyf aox max mungv coong woac woax tauh, six coong woax đomc max mungv bamh canz munh bux nyăngz woac, yâuc tyuv max đutb têx, six lauf max mungv yămz Tênb-toongh woax đomc munh bux nyăngz woac, nănh cangf njynh phav tyuv max tuz đutb. ²⁶ Woax zanyf, Nănh nyăngz stingb đănz tuz nib tongf nzuf, six nâyx zanyf, nănh năngx nyunc coong, “Năngx naih ah hâyđ yaz max zâyf cungb ayx phunz nib tongf cungv, njynh năngx đănz tuz tongf tauv gungh stymz. ²⁷ Coong năngx naih ah hâyđ woax zâux woac nyăngz âyz gâyf six năngđ nâyx, laiv hungđ zâyx taih hayh đănz tongf, six zuc mêtc nzuf, laiv hungđ max hayh đănz tongf, nzăngđ tuz stâyv quâyx yămz. ²⁸ Năngđ naz pănh six zuc hâuđ Zâu Tênb-Hungh, wâyc zuc pănh tuz ah nomz max hayh đănz tongf nyăngz côkz, pănh six zuc tanv yâuc hâuđ Tênb-Hungh nyăngz pôz, pănh zuc cumh nzav nănh yâuc ayx hopđ nănh nyăngz nyâuđ. ²⁹ Wâyc zuc pănh nyăngz Zâu Tênb-Hungh, six ah lâuh yongb nzongf nyăngz tâuf, hayh pu tuz sac muif hungđ.” Ayx tuz hođ Tênb-Hungh nyăngz nyâuđ