49 ¹ Ya-côpv, êu nănh nyăngz toonz taih dloih, nănh coong, "Nyâuh taih nzomf yămz yaz nây, yaz oix coong đangz phanx nyâuh pongh nyăngz dlayc. ² Ya-côpv, nyăngz toonz lex, nyâuh taih dlonf nâyx mungv nyâuh nyăngz pha Y-sa-la-ên, coong. Bên-ra-min ³ Ru-bên lex, mâyh ayx yaz nyăngz toonz coonz, mâyh six yaz nyăngz jab. yaz six săngh ah tauh munh côx tuz nyâuh muif lanh toonz, mâyh ayx toonz coonz nâyx peob toonz six mâyh năngx naih manyh yangh quaix, mâyh lauf năngx njoongh têx. ⁴ Mâyh pây năngđ womz lub nâyx, six mâyh max hayh tuz ayx lub, wâyc zuc mâyh cloon pha nyăngz au jeenz phâyx, ayx phunz pha nyăngz zâuv naih wâyx. Sê-mê-ôn cloon Lê-vi ⁵ Si-mê-ôn, cloon Lê-vi, six yâuf pez, nănh stiz nongc nzuc đao ayx okx nyăngz tungh zăngc. ⁶ Nănh stiz ta zux ix six yaz max cloon stiz sangv gwoangh. nănh stiz căpx dlonf nyăngz săngx huđ, yaz max cloon nănh stiz ayx toic, wâyc zuc nănh stiz siv totc tayx munh. Nănh stiz âyz cănh nyăngz nyâuđ baic ngongh câu staux njamc seetc. ⁷ Wâyc zuc nănh stiz siv lub oix ninyh ayx huđ, nănh stiz songđ zuc zaux, nănh stiz zuc zaux, six wâyc nănh stiz siv nhleenx ayx huđ dlayc. yaz songđ oix phunz nănh stiz lunc ninyh nzêux Y-sơ-ra-ên, stâyz phangz. yâuc oix phunz nănh stiz ninyh yămz zanb Y-sa-la-ên munh. Yu-đa ⁸ Yu-đa, lex, mâyh nyăngz yâuf pez oix tanv mâyh, mâyh nongc mâyh nyăngz puf nzauf mâyh yônz zaz nyăngz clangz, mâyh nyăngz yâuf pez oix quâyc nzac paix mâyh. ⁹ Yu-đa lex, mâyh six năngđ ah tauh njanh nâyx, yaz nyăngz toonz lex, mâyh seetb ninyh tăpc a năngx nzâyz phunb đangz lauf mâyh nyăngz tync, mâyh cumf nzac, yâuc phâyx nzac cayx năngđ njanh câu nâyx, năngđ njanh nyâyf nâyx max naih laiv tauh êu tuz nănh đyub? ¹⁰ Muif stingx Hungh six tăng Yu-đa seetb taih, Yu-Đa nyăngz sây stunz laiv zanyf lauf naih stâyv woa Hungh tync, Yu-đa, six cun tuz tauv laiv zanyf Si-lô, taih tauv, manf côkz munh six zuc mungv nănh nyăngz woac. ¹¹ Nănh pang maf lih câu ănz woa tungh cuđ mâyb coonz, yâuc pang maf lih ănz gongx quaix nyăngz tungh cuđ mâyb quah, nănh nongc tungh cuđ tyu đuv gwuyz-quav nongc tungh cuđ womz stib năngđ samđ nâyx đuv nănh nyăngz gwuyz đao, ¹² Nănh nyăngz mâyc njaox stib cayx năngđ munh hopb tyu, six nănh nyăngz nyah pec cayx năngđ hopb nu. Sa-bu-lôn ¹³ Sa-bu-lôn, tuz yămz woa coiđ synh, nănh ayx ah stynz jau nzeetx nongc zapz đangđ, nănh nyăngz căpx caix muf tauv Si-đôn stengb. Y-sa-ca ¹⁴ Y-sa-ca, njoongh năngđ maf lih nâyx, nănh nzâyz tungh zăngc cun sec cun ninyh. ¹⁵ Nănh mangc phătc tungh sec tync gongx woax nomz stâyz phangz cuyb yămz, nănh songđ nyax muif hungđ ah mạn muf nănh cănh nyungc phunz munh yac nănh ayx cumh pâuz zâuđ. Đan ¹⁶ Đan, six pengh stymz stămđ nănh nyăngz pec stingx, nănh nyăngz pec stingx six Y-sa-la-ên munh. ¹⁷ Đan, six cayx năngđ nangz đokc yămz woa jau synh, zu tăpc maf staux nzengz, ayx phunz zâyh maf nyăngz munh zuc tuih maf. ¹⁸ Zâu Ye-hô-wa, lex, yaz zu mâyh nyăngz Njâuv pôz taih Njâuv yaz. Gatv ¹⁹ Gatv, six zuc ah peob stac munh taih jâu nănh, six nănh năngx luiđ đangz bopc tuz hingh. A-se ²⁰ A-se, nyăngz stâyz phangz six ayx tuz zunb jengz đungx, yâuc năngx phatb năngv mâyđ phunz Hungh pâuz nhlync. Nepv-ta-li ²¹ Nepv-ta-li, six năngđ ah tauh cumh nzayh janx pungx ănz woa đungc, nănh ênz jeenz taih seenz quai nzongf. Giô-sepv ²² Yô-sepv, six năngđ tungh cuđ mâyb, yămz wăngx synh săngh pyâu nyauh, nănh nyăngz mâyb quah lêuz blătc singh. ²³ Phăn nađ songz nyăngz munh six oix phăn nănh, numđ nhleenx gub nzac nănh ninyh phăn. ²⁴ Six nănh nyăngz iz saz puf nzauf nađ songz seen đăngz yâuc naih jab, jab six Ya-côpv, lemđ quaix nyăngz Tênb-Hungh phunz jab, six jămđ pa jiz yungh woax nomz Y-sa-la-ên munh nyăngz njauz pyây. ²⁵ Wâyc zuc pha nyăngz Tênb-Hungh six stăngc mâyh, lemđ quaix nyăngz Tênb-Hungh six sađ pôz gongx phunz mâyh, sađ cah zâyc nyăngz pôz, cloon cah đi nib nyăngz pôz gongx phunz mâyh, nănh sađ gongx nyăngz pôz phunz mâyh nyăngz au naih sây stunz đungx staox. ²⁶ Mâyh nyăngz pha phunz mâyh tuz nyăngz pôz, six năngx lub quaix stâyv quâyx yămz nyăngz zoongz tuz taih nyăngz pôz, yâuc năngx lub quaix yaz nyăngz stu stongz phunz taih nyăngz pôz, yaz jođ nâyx đomc pôz phunz yămz Yô-sepv, nyăngz pyây cah zâyc, yâuc yămz gâyh nănh nyăngz yâuf pez toic woax tauh nyăngz pyây ploongh. Bên-ra-min ²⁷ Bên-ya-min, six năngđ tauh njab clô, bah đoomz tonx nănh nhlync nănh tăpc tuz taih nyăngz a, gungh nzămc nănh yâuc patz nănh zab tuz taih nyăngz laiv hungđ." ²⁸ Nây six săpc nyâyc stingx Y-sa-la-ên munh, âyz nănh stiz nyăngz pha poou phunz nyăngz woac, coong tuz hopđ nănh stiz muif lanh munh. ²⁹ Ya-côpv, zăpx woac phunz nănh nyăngz toonz coong, "yaz cayx quaix stâyv gôh, tauv yaz quaix stâyv nyâuh bix nzâyz yaz muf plopx (mokb) ănz woa ngamh cloon stu stongz yămz woa, Êpv-rôn munh Hê-titv nyăngz nib ³⁰ Woax nomz stâu ngamh six yămz stătx Makv-bi-la, Mam-rê, Ca-na-an, stâyz phangz, Apv-ra-ham, maif tăng Epv-rôn, munh Hê-titv nyăngz nib tâyc nongc ayx stâu jêmh. ³¹ Woax cuyb tync nongc (plopx - mokb) Apv-ra-ham, cloon nănh nyăngz au Sa-ra, lauf plopx ănz woa, nzof Y-sakv, cloon nănh nyăngz au Rê-be-ca, lauf plopx ănz woa, yaz lauf năngx plopx (mokb) Lê-a, ănz woax nomz tync. ³² Woax nomz zoongz nyăngz nib tâyc, cloon bengx ngamh six maif tăng Hê-titv, munh nyăngz jêmh. ³³ Ya-côpv, coong nzuf nâyx đomc woac bux nănh nyăngz toonz, nănh songđ cunz staux ănz staox woa zâuv cah zâyc ninyh songđ siv seetc quaix stâyv gôh. Yô-sepv plopx (mokb) nănh nyăngz pha